11 އަހަރުގެ ކުއްޖެއްގެ ފުއްޕާމެއިން ޕިނެއް ނަގައިފި

އުމުރުން 11 އަހަރުގެ ކުއްޖެއްގެ ފުއްޕާމެއިން އަނެއްކާ ވެސް ޕިނެއް ނަގައިފި އެވެ.

އައިޖީއެމްއެޗުން މިއަދު ބުނީ އީއާރާއި ރޭޑިއޮލޮޖީ އާއި އެނެސްތެސިއޮލޮޖީ އަދި ނަރުހުންގެ އެހީއާ އެކު، ދިވެހި ކުއްޖެއްގެ ފުންޕާމޭގެ ވާތުފަޅިން ޕިނެއް ނަގާފައިވާ ކަމަށެވެ. އެ ކުއްޖާގެ ހާލު ރަނގަޅު ކަމަށް، ސަރުކާރުގެ މައި ހޮސްޕިޓަލުން ބުންޏެވެ.

އައިޖީއެމްއެޗުގައި މަސައްކަތް ކުރައްވާ، ނޭވާލާ ނިޒާމުގެ ޑރ. މުހައްމަދު އިސްމާއިލް ކުރެއްވި ޓްވީޓެއްގައި ވިދާޅުވީ، ބުރުގާ އަޅާ މީހުން ޕިން އަނގަޔަށް ނުލުމަށް އިލްތިމާސް ކުރައްވާ ކަމަށެވެ.

މީގެ ކުރިން ވެސް އެފަދަ ހާދިސާތައް ހިނގައިގެން އައިޖީއެމްއެޗުގައި ފަރުވާ ދީފައި ވެ އެވެ.

ޕިން ނަގަނީ މީހާ ހޭނައްތާލައިގެންނެވެ. އެހެންކަމުން މިއީ އުނދަގޫ އަދި ނުރައްކާ ވެދާނެ ފަދަ ޕްރޮސީޖާއެކެވެ.

ޕިނެއް ދިރުވާލައިގެން ހޮސްޕިޓަލަށް ގެންގޮސްފި ނަމަ އެކްސްރޭ ނަގައި، އެ ޕިން އޮތް ތަން އެންމެ ފުރަތަމަ ދެނެގަންނަނީ އެވެ. ނޭވާލާ ހޮޅި ނުވަތަ ފުއްޕާމޭގެ ތެރޭގައި ޕިން އޮންނަ ތަނުގެ ސަބަބުން އެކްސްރޭ އިން ނުފެނިއްޖެ ނަމަ ޖެހެނީ ސީޓީ ސްކޭން ހައްދާށެވެ. ޕިން އޮތް ތަނާއި ނޭވާލާ ހޮޅިއަށް ޕިން ހެރިފައި ހުރިތޯ އާއި ހޮޅިތަކުގެ ފަލަމިން ވެސް އެ އެކްސްރޭއިން އެނގޭނެ އެވެ.