ބަލި ގިނަވެ، އައިޖީއެމްއެޗުގެ ކުޑަކުދިންގެ ވޯޑު ފުރިއްޖެ

ބަލިވެގެން ހޮސްޕިޓަލުގައި އެޑްމިޓްކުރަން ޖެހޭ ކުދިންގެ އަދަދު ގިނަވެ އައިޖީއެމްއެޗުގެ ކުޑަކުދިންގެ ވޯޑު ފުރިއްޖެ އެވެ.

އެ ހޮސްޕިޓަލުގެ ކުޑަކުދިންގެ ޑރ. އަހްމަދު ފައިސަލް މިއަދު "މިހާރު" އަށް ވިދާޅުވީ 32 އެނދުގެ ޖާގަ އޮންނަ އައިޖީއެމްއެޗުގެ ވޯޑު މިހާރު ފުރިފައިވާ ކަމަށެވެ.

އެޑްމިޓްކޮށްފައިވާ ކުދިންގެ ތެރޭގައި ގިނައީ ނިއުމޯނިއާ، ޑައިރިއާ، ގޭސްޓްރައިޓިސް އަދި ޑެންގޫ އަށް ފަރުވާ ހޯދާ ކުދިން ކަމަށް ފައިސަލް ވިދާޅުވި އެވެ.

"އެސްތުމާއަށް ފަރުވާ ހޯދާ ކުއްޖަކު ވެސް އައިސިޔޫގައި އެބައޮތް،" އޭނާ ވިދާޅުވި އެވެ.

"މިހާރު" އަށް އެނގިފައިވާ ގޮތުގައި ވޯޑުގެ ޖާގަ ފުރިގެން ބައެއް ކުދިން ކިއޫގައި ވެސް އެބަ ތިއްބެވެ.

ފައިސަލް އިއްޔެ ކުރެއްވި ޓުވީޓެއްގައި ވިދާޅުވީ އަރިއަތޮޅުން ޑެންގޫ ޖެހިގެން ހާލު ދެރަވެގެން އެ ހޮސްޕިޓަލަށް ގެނައި ކުއްޖަކު އީއާރުގައި ވެސް އެބައޮތް ކަމަށެވެ. އެ ކުއްޖާ އީއާރުގައި އޮތީ ވޯޑު ޖާގަ ނުލިބިގެން ކިއުގައި ކަމަށް އޭނާ ވިދާޅުވި އެވެ.

އާންމު އެކި ބަލިތަކުގައި ޑޮކްޓަރަށް ދައްކާ މީހުންގެ އަދަދު ވެސް މި ދުވަސްވަރު ވަނީ ވަރަށް ބޮޑަށް އިތުރުވެފަ އެވެ.