ހުއްދަ ނުހޯދައި އެއްވުންތަކާއި ހިނގާލުންތައް ދެން ނުބޭއްވޭނެ!

ލިއުމުން ހުއްދަ ހޯދައިގެން ނޫނީ މުޒާހަރާ ނުކުރެވޭނެ ކަމަށް ހޯމް މިނިސްޓްރީން އަންގައިފި އެވެ.

ކުރިން ހުއްދަ ހޯދުމަކާނުލައި މުޒާހަރާކުރުމަކީ ގާނޫނުއަސާސީން ލިބިދޭ ހައްގެއް ކަމަށާއި ހުއްދަ ހޯދަން ޖެހުމަކީ އެއްވެ އުޅުމުގެ ހައްގަށް ހުރަސްއެޅުން ކަމަށް މި ސަރުކާރުން އައީ ބުނަމުންނެވެ. ނަމަވސް ހުއްދަ ހޯދައިގެން ނޫނީ މުޒާހަރާ ނުކުރެވޭނެ ކަމަށް ނިންމުމަކީ ކުރީ ސަރުކާރުން އެ ހައްގު ހަނިކުރި ގާނޫނަށް އަމަލުކުރަން މި ސަރުކާރުން ވެސް ނިންމުމެވެ. ގާނޫނުއަސާސީން ކަށަވަރުކޮށްދީފައިވާ އެއްވެ އުޅުމުގެ ހައްގު ހަނިކޮށް ގާނޫނަށް ގެނައި އެ އިސްލާހު އުވާލުމަކީ މި ސަރުކާރުގެ ވައުދެކެވެ.

އެއްވެ އުޅުމާ ބެހޭ ގާނޫނަށް އިސްލާހު ގެނައީ، ކުރީގެ ރައީސް އަބްދުﷲ ޔާމީންގެ ވެރިކަމުގައި ހިންގި ގާނޫނާ ޚިލާފު އަމަލުތަކާ ދެކޮޅަށް އޭރު އިދިކޮޅު ފަރާތްތައް (މިހާރު ވެރިކަން ކުރާ ކޯލިޝަނުން) ސިލްސިލާކޮށް މުޒާހަރާކުރަން ފެށުމުން އެކަމަށް ހުރަސްއެޅުމުގެ ގޮތުންނެވެ. އެ އިސްލާހުގައި ވަނީ، ކުރިން ހުއްދަ ހޯދުމަކާ ނުލައި މާލޭގައި މުޒާހަރާ ކުރެވޭނީ ހޯމް މިނިސްޓްރީން ކަނޑައަޅާ ތަންތަނުގައި އެކަނި ކަމަށެވެ. މި އިސްލާހު ތަސްދީގުކުރުމާ އެކު އެއްވެ އުޅެވޭނީ ކާނިވާ ސަރަހައްދުގައި އެކަނި ކަމަށް ހޯމް މިނިސްޓްރީން ވަނީ އިއުލާންކޮށްފަ އެވެ.

އެކަމަކު، ހޯމް މިނިސްޓްރީން މިއަދު ކުރި އިއުލާނުގައިވާ ގޮތުން ލިއުމުން ހުއްދަ ނުހޯދައި މާލޭގައި ދެން މުޒާހަރާކުރެވޭނީ ކުރީގެ ސަރުކާރުން ގެނައި އިސްލާހުގައިވާ ގޮތަށް، މާލޭގެ ކާނިވާ ސަރަހައްދުގައި އެކަންޏެވެ. އެހެން ތަނެއްގައި އެއްވުމެއް ނުވަތަ ހިނގާލުމެއް ބާއްވާ ނަމަ ފުލުހުންގެ ހުއްދަ ލިއުމުން ހޯދަން ހޯމް މިނިސްޓްރީން ވަނީ ހަނދާންކޮށްދީފަ އެވެ.

ގާނޫނުގައި އެހެން އޮތަސް، ހުއްދަ ނުހޯދައި މިހާތަނަށް ކުރާ މުޒާހަރާތަކާއި ބާއްވާ އެއްވުންތައް ފުލުހުން ނުހުއްޓުވަ އެވެ. އެކަމަކު މި ދުވަސްކޮޅު މާލޭގައި މުޒާހަރާތައް ވަނީ އިތުރުވެފަ އެވެ. ބިދޭސީންގެ މުސާރައިގެ މައްސަލަތަކުގައި ހުޅުމާލޭގައި ދެ ދުވަސް މަތިން މުޒާހަރާކޮށް، ހަމަނުޖެހުން ވަނީ ހިންގައިފަ އެވެ. އެއާއެކު ޖިންސީ ގޯނާގެ އަމަލުތަކުގައި އިންސާފު ނުލިބޭ މައްސަލައިގައި ސިލްސިލާކޮށް އަޑުއުފުލަމުންދާއިރު އިދިކޮޅު ޕީޕީއެމާއި ޕީއެންސީން ވެސް އަންނަނީ ދޭތެރެއަކުން އެއްވުންތައް ބާއްވަމުންނެވެ.

ކޮވިޑް-19 ފެތުރޭތީ އެޗްޕީއޭ އިން އަންގާފައިވާ ރައްކާތެރިކަމުގެ ފިޔަވަޅުތަކުގައި، 30 މީހުންނަށް ވުރެ ގިނައިން އެއްތަނަކަށް އެއްވުމަކީ ވެސް މަނާކަމެކެވެ.

އެއްވުންތައް ބޭއްވުމުގެ ކުރިން ގާނޫނުގައިވާ ގޮތުގެ މަތިން ހުއްދަ ހޯދަން ހޯމް މިނިސްޓްރީން މިއެދުނީ ބިދޭސީންގެ މުޒާހަރާތަކަކީ ގައުމީ ސަލާމަތަށް ނުރައްކަލެއް ކަމުގައި ގައުމީ ސަލާމަތާއި ޚާރިޖީ ގުޅުންތަކާ ބެހޭ ކޮމިޓީގައި އިއްޔެ ފުލުހުން ބުނެފައި ވަނިކޮށެވެ.

އެއްވެ އުޅުން ހަނިކޮށް ގެނައި އިސްލާހު އުވައިލުމަށް ގޮވާލައި، އިދިކޮޅުގައި އެމްޑީޕީ އޮތް އިރު ވަނީ އަޑު އުފުލައިފަ އެވެ. މިހާރުގެ ރައީސް އަދި އޭރު އެމްޑީޕީގެ ޕާލަމެންޓްރީ ގުރޫޕްގެ ލީޑަރު ހިންނަވަރު ދާއިރާގެ މެމްބަރު އިބްރާހިމް މުހައްމަދު ސޯލިހް ވިދާޅުވެފައި ވަނީ އެއްވެ އުޅުން ހަނިކުރުމަށްޓަކައި ގާނޫނަށް ގެނައި ބަދަލަށް އަމަލު ކުރަން ނުޖެހޭނެ ކަމަށެވެ.

އެކަމަކު ވެރިކަމަށް އައިސް މި ސަރުކާރުގެ ވިސްނުން މިކަމުގައި ވަނީ ތަފާތުވެފަ އެވެ.

އެ އިސްލާހް އުވާލުމާ މެދު ގައުމީ ސަލާމަތާއި ޚާރިޖީ ގުޅުންތަކާ ބެހޭ ކޮމިޓީން ހޯމް މިނިސްޓަރު އިމްރާންގެ އަބްދުﷲގެ ލަފައަކަށް އެހުމުން، އޭނާ ވިދާޅުވީ ގާނޫނުތަކާއި ގަވާއިދުތަކުން ދެވެން އޮތް އެންމެ ފުޅާމިނަކަށް ހިޔާލުފާޅުކުރުމާއި އެއްވެ އުޅުމުގެ މިނިވަންކަން ރައްޔިތުންނަށް ކަށަވަރުކޮށް ދޭން ބޭނުންވާ ކަމަށެވެ. އެކަމަކު، އެ އިސްލާހު އުވާނުލުމަކީ އެ ފުރުސަތު ހޯދައި ނުދެވޭނެ ސަބަބެއް ކަމުގައި ދެކެވަޑައިނުގަންނަވާ ކަމަށް އިމްރާން ވިދާޅުވި އެވެ.

އެއްވެ އުޅުން ހަނިކުރަން ގާނޫނަށް ގެނައި އިސްލާހު އުވާލަން ރައްޔިތުންގެ މަޖިލީހުގެ ކާށިދޫ ދާއިރާގެ މެމްބަރު އަބްދުﷲ ޖާބިރު މިދިޔަ އޮގަސްޓް މަހުގެ ތެރޭގައި ވަނީ ހުށަހަޅުއްވައިފަ އެވެ. އެކަމަކު، މަޖިލީހުން އެ އިސްލާހު އުވާލުމުގެ މައްސަލަ މިހާތަނަށް ކުރިއަކަށް ނުގެންދެ އެވެ.