ހުއްދަ ނުލިބުމުން އިދިކޮޅުގެ ޖަލްސާ ފަސްކޮށްފި

އިދިކޮޅު ކޯލިޝަން، ޕީޕީއެމް/ޕީއެންސީން އަންނަ ހުކުރު ދުވަހު ބާއްވަން އުޅުނު ޖަލްސާ ވަކި މުއްދަތެއް ނެތް ގޮތަށް ފަސްކޮށްފި އެވެ.

ޕީޕީއެމްގެ އޮފީހުގައި މިއަދު ބޭއްވި މީޑިއާ ބްރީފިންއެއްގައި ޕީއެންސީގެ ނައިބު ރައީސް އިބްރާހީމް ސުޖާއު ވިދާޅުވީ ޖަލްސާ ފަސްކުރީ ސަރުކާރާއި ސިޓީ ކައުންސިލުން ހޯދަން އެދުނު ހުއްދަތައް ނުލިބިގެން ކަމަށެވެ. ޖަލްސާ ބާއްވަން ކާނިވާ ސަރަހައްދު ހޯދަން ހައުސިން މިނިސްޓްްރީއަށް ފޮނުވި ސިޓީތަކަށް ޖަވާބެއް ނުލިބުނު ކަަމަށާއި މިނިސްޓްރީގެ އިސް ބޭފުޅުކާ ބައްދަލު ވެސް ނުވި ކަމަށް އޭނާ ވިދާޅުވި އެވެ.

އޭނާ ވިދާޅުވި ގޮތުގައި ކާނިވާ ސަރަހައްދުގައި ބާއްވަން އުޅޭ ޖަލްސާއަށް ހުއްދަ ހޯދަ ދޭނީ މާލޭ ސިޓީކައުންސިލުންކަން އެނގުނީ ހުއްދަ ހޯދަން ސިޓީލައިގެން އުޅޭތާ އެތައް ދުވަހެއް ފަހުން މިއަދެވެ.

"ރައްޔިތުންގެ މަޖިލީހުގެ ޖަލްސާ ހިނގަމުން ދިޔައިރު އެނގިގެން މިދިޔައީ ހައުސިން އެންޑް އިންފްރާސްޓްރަކްޗާ މިނިސްޓްރީން ވަނީ ކާނިވާ ސަރަހައްދު މާލޭ ސިޓީކައުންސިލަށް ދެއްވާފައިކަން،" ސުޖާއު ވިދާޅުވި އެވެ.

ސުޖާއު ވިދާޅުވީ އިދިކޮޅުގެ ޖަލްސާ ދެން ބާއްވާނެ ތާރީހެއް ކުރިއަށް އޮތް ދެތިން ހަފްތާ ތެރޭގައި އިއުލާނުކުރާނެ ކަމަށެވެ. އޭނާ ނުސީދާ ގޮތެއްގައި ވިދާޅުވީ ކޮވިޑް-19 ފެތުރޭތީ ސަރުކާރުން އިއުލާނުކޮށްފައިވާ ސިއްހީ ކުއްލި ނުރައްކަލުގެ ހާލަތު ދަންމައިލީ އިދިކޮޅުގެ ޖަލްސާއަށް ހުރަސް އަޅާށެވެ. ޖަލްސާ އަލުން ބާއްވާނެ ތާރީހެއް އެހެންވީމާ މިވަގުތު އިއުލާނު ނުކުރައްވާނެ ކަމަށް އޭނާ ވިދާޅުވި އެވެ.

"އަޅުގަނޑުމެން ތާރީހު މިއަދު ކަނޑައަޅައިފި ކަމުގައި ވާނަމަ ދުވަހަކު ވެސް މި ލޮކްޑައުންއެއް ދިވެހިންގެ ތެރޭން ފިލައިގެނެއް ނުދާނެކަން މިއޮތީ އަޅުގަނޑުމެންނަށް ޔަގީންވެފައި. އެހެންވީމާ މި ލޮކްޑައުންއަކީ މިއީ ރައްޔިތުންގެ ގޭގައި ބައިތިއްބައިގެން، މަގުމައްޗަށް ނުނެރެންވެގެން، އިބްރާހީމް މުހައްމަދު ސޯލިހު ގަސްދުގައި ރާވައިގެން ހިންގާކަމެއްގެ ގޮތުގައި އަޅުގަނޑު ދަންނަވަން،" ސުޖާއު ވިދާޅުވި އެވެ.

ޕީޕީއެމް/ޕީއެންސީން ޖަލްސާއެއް ބާއްވަން އުޅެނީ "ފެއިލްވެއްޖެ" މި ނަމުގަ އެވެ. އެ ޖަލްސާގައި ސިޔާސީ ވަރުގަދަ ފަރާތްތަކެެއް އިދިކޮޅާ ގުޅޭނެ ކަމަށް ވެސް އެ ދެޕާޓީން ބުންޏެެވެ.