މިއީ ރާވައިގެން ހިންގާފައިވާ ޖަރީމާއެއް، އިންސާފުވެރި ތަހުގީގަކުން ކުށެއް ނުކުރާކަން ސާފުވާނެ: އަލީ ވަހީދު

އޭނާ އަށް ޖިންސީ ގޯނާގެ ތުހުމަތު ކުރަނީ ރާވައިގެން ބަޔަކު ހިންގާފައިވާ ޖަރީމާއެއްގެ ތެރެއިން ކަމަށާއި އިންސާފުވެރި ތަހުގީގެއްގައި، ކުށެއް ނުކުރާކަން ސާފުވާނެ ކަމަށް އެ މައްސަލައިގައި ޓޫރިޒަމް މިނިސްޓަރުކަމުން ވަކިކޮށްފައިވާ އަލީ ވަހީދު ރޭ ވިދާޅުވެއްޖެ އެވެ.

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް ޖިންސީ ގޯނާ ކުރި ކަމަށް ބުނާ މައްސަލައިގައި ފުރަތަމަ ފަހަރަށް ފުލުސް އޮފީހަށް ހާޒިރުވެވަޑައިގަތުމަށް ފަހު، މީޑިއާގައި އަލީ ވަހީދު ވިދާޅުވީ، މިއީ ސިޔާސީ ނުފޫޒު އެކުލެވޭ މައްސަލައެއް ކަމަށެވެ. މައްސަލައިގެ ތަހުގީގު ނިމުމުން ރައްޔިތުންނަށް ހަގީގަތް ސާފުވާނެ ކަމަށް އޭނާ ވިދާޅުވި އެވެ.

އަލީ ވަހީދު ވަނީ އޭނާގެ މައްޗަށް ކުރާ ތުހުމަތުތަކަށް ރޭ އިންކާރު ކުރައްވައިފަ އެވެ. ނަމަވެސް ފުލުހުން ކުރަނީ ސީދާ ކޮން ތުހުމަތުތަކެއް ކަމެއް ނޫސްވެރިން ގާތު ވިދާޅެއް ނުވެ އެވެ. އޭނާ ވިދާޅުވީ އެކަން ތަފުސީލު ކޮށްދޭނީ ފުލުހުން ކަމަށެވެ.

"އަޅުގަނޑު ދެކޭގޮތުގައި މިއީ ރޭވިގެން ހިންގާފައިވާ ޖަރީމާއެއް އަޅުގަނޑާ ދެކޮޅަށް. އެހެންވެ އަޅުގަނޑު [ފުލުސް އޮފީހުގައި] ދަންނަވާފައި އޮންނާނެ ކުރާ ހުރިހާ ތުހުމަތުތަކަށް އިންކާރުކުރާ ކަމަށް،" މައްސަލައިގެ ތަފުސީލަށް ވަޑައިނުގެން އަލީ ވަހީދު ވިދާޅުވި އެވެ.

ޓޫރިޒަމް މިނިސްޓްރީގެ އަންހެން މުވައްޒަފުންތަކަކަށް އަލީ ވަހީދު ޖިންސީ ގޯނާކުރި ކަމަށް ބުނާ މައްސަލަ ފެންމަތިވުމާއެކު، ވަޒީރުކަމުން އިސްތިއުފާ ދެއްވުމަށް ރައީސް އިބްރާހިމް މުހައްމަދު ސޯލިހު އެންގެވި އެވެ. ނަމަވެސް އިސްތިއުފާ ނުދެއްވުމުން ރައީސް ވަނީ މި މަހުގެ ނުވައެއްގައި އޭނާ މަގާމުން ވަކިކުރައްވައިފަ އެވެ. މިއީ ޖިންސީ ގޯނާގެ ތުހުމަތުގައި ރާއްޖޭގައި ވަޒީރަކު މަގާމުން ވަކިކުރެއްވި ފުރަތަމަ ފަހަރެވެ.

ވަޒީރުކަމުގެ އިތުރުން ޖޭޕީގެ ރައީސްގެ މަގާމުން އިސްތިއުފާ ދެއްވުމަށް ވެސް އެ ޕާޓީގެ ލީޑަރު ގާސިމް އިބްރާހިމް އެންގެވި އެވެ. ނަމަވެސް އަލީ ވަހީދު އެ އަށް ވެސް ތަބައެއް ނުވެ އެވެ.

އަލީ ވަހީދު ރޭ ވިދާޅުވި ގޮތުގައި، ވަޒީރުކަމުން އިސްތިއުފާ ނުދެއްވީ އޭނާގެ މައްޗަށް ކުރާ ތުހުމަތުތައް ގަބޫލު ނުކުރައްވާތީ އެވެ. ރައްޔިތުންގެ ތެރެއަށް ނުކުމެވަޑައިގެން މަސައްކަތް ކުރައްވަމުން ގެންދެވީ އިހުލާސްތެރިކަމާއެކު ކަމަށާއި އިންސާފު ލިބޭނެ ކަމަށް އުއްމީދު ކުރައްވާ ކަމަށް ވިދާޅުވި އެވެ.

މީގެ ކުރިން ސިޔާސީ އެކި ކަންކަމުގައި ފުލުހަށް ހާޒިރު ކުރުމުން ހަނު ހުންނެވި ނަމަވެސް މި ފަހަރު ފުލުހުންގެ ހުރިހާ ސުވާލުތަކަކަށް ޖަވާބު ދެއްވި ކަމަށް އަލީ ވަހީދު ވިދާޅުވި އެވެ. އޭނާ ވިދާޅުވީ، ޖިންސީ ގޯނާކުރި ކަމަށް ބުނާ މައްސަލައި ހަނު ހުންނަވަން ގަސްދު ނުކުރައްވާ ކަމަށާއި ފުލުހުންގެ ތަހުގީގަށް ފުރިހަމަ އެއްބާރުލުން ދެއްވާނެ ކަމަށެވެ.

"މި މައްސަލައާ އަޅުގަނޑު ކުރިމަތިލާނަން،" ވަރަށް ޔަގީންކަމާ އެކު އަލީ ވަހީދު ވިދާޅުވި އެވެ.

އަލީ ވަހީދު ވިދާޅުވި ގޮތުގައި، ވަޒީރުކަމުން އޭނާ ވަކިކުރެއްވުމަށް ރައީސް ނިންމެވި ނިންމުމަށް ފުރިހަމަ އަށް އިހުތިރާމް ކުރައްވަ އެވެ. އަދި މިނިވަން ތަހުގީގެއް ހިންގައި ރައީސަށާއި ރައްޔިތުންނަށް ހަގީގަތް ސާފުވާނެ ކަމަށް އުއްމީދު ކުރައްވާ ކަމަށް ވިދާޅުވި އެވެ.

މި ސަރުކާރު ވެރިކަމަށް ގެނައުމަށާއި ކޮވިޑް-19 ގެ ތެރޭގައި ބުރަ މަސައްކަތެއް ކުރެއްވިކަން ފާހަގަކުރައްވައި، އަލީ ވަހީދު ވިދާޅުވީ އޭނާ މިހާރު ހުންނެވީ ވަރަށް ދެރަވެފައި ކަމަށެވެ. ޒުވާން ހަޔާތް ވެސް މިރޭ ނިމޭނެ ކަމަށާއި އެކަމަކު ރައްޔިތުންގެ މަޖިލީހާއި ވަޒީރުންގެ މަޖިލިހާއި އިހުލާސްތެރިކަމާއެކު ސިޔާސީ ޕާޓީތަކުގައި އިސް މަގާމުތައް އަދާކުރައްވާފައިވާނެ ކަމަށް ވިދާޅުވި އެވެ.

އަލީ ވަހީދު ވިދާޅުވި ގޮތުގައި، މިވަގުތު އޭނާގެ ހުރިހާ އަމާޒެއް ވެސް، ވިސްނުމެއް ވެސް ހުރީ ކުރާ ތުހުމަތުތައް ސާފުކޮށްދިނުމަށެވެ.

"މި ދުވަސްވެސް ނިމިގެންދާނެ. މި ކަހަލަ ތޫފާނުގެ ވައި އަބަދަކު ވެސް ނުހުންނާނެ،" އަލީ ވަހީދު ވިދާޅުވި އެވެ.

އަލީ ވަހީދަށް ކުރާ ޖިންސީ ގޯނާގެ ތުހުމަތާ ގުޅިގެން ފުރަތަމަ ފަހަރަށް އޭނާ ފުލުސް އޮފީހަށް ހާޒިރުކުރިއިރި، އެ މައްސަލައިގައި 15 މީހެއްގެ ބަޔާން ކުރިން ނަގާފައިވާ ކަމަށް ފުލުހުން މިދިޔަ ބުރާސްފަތި ދުވަހު ބުނެފައި ވެ އެވެ.

މި ތުހުމަތުތަކާ ގުޅިގެން އަލީ ވަހީދުގެ މޮބައިލް ފޯނާއި ލެޕްޓޮޕް ވެސް ވަނީ ފުލުހުންގެ ބެލުމުގެ ދަށުގަ އެވެ. އަދި އޭނާގެ ޕާސްޕޯޓު ވެސް ވަނީ ހިފަހައްޓައިފަ އެވެ.