"ފޯކްލޯ" އާ އެކު ޓޭލާ ސްވިފްޓަށް އިތުރު ރެކޯޑެއް

މިދިޔަ މަހުގެ 24 ގައި ރިލީޒްކުރި އަލްބަމް "ފޯކްލޯ" އާ އެކު، އެމެރިކާގެ ޒުވާން ލަވަކިޔުންތެރިޔާ ޓޭލާ ސްވިފްޓަށް ދުނިޔޭގެ ރެކޯޑް ފޮތުން އިތުރު ޖާގައެއް ލިބިއްޖެ އެވެ.

ހުނަރުވެރި ލަވަކިޔުންތެރިޔާގެ އާ އަލްބަމްވެގެން ދިޔައީ ރިލީޒްކުރިތާ އެއް ދުވަހުގެ ތެރޭގައި ސްޕޮޓިފައި އިން މިހާތަނަށް އެންމެ ގިނައިން ސްޓްރީމްކުރި އަންހެން ފަންނާނުގެ އަލްބަމަށެވެ. ރިލީޒްކުރި ދުވަހު އެކަނި ސްޕޮޓިފައި އިން "ފޯކްލޯ" 80.6 މިލިއަން ފަހަރު ސްޓްރީމްކޮށްފައިވެ އެވެ.

މީގެ އިތުރުން 16 ޓްރެކް ހިމަނައިގެން ރިޕަބްލިކަން ރެކޯޑްސްގެ ތައްގަނޑާ އެކު ނެރުނު އަލްބަމްވެގެން ގޮސްފައި ވަނީ ރިލީޒްކުރިތާ 24 ގަޑިއިރު ތެރޭގައި އެޕަލް މިއުޒިކުން އެންމެ ގިނައިން ސްޓްރީމްކުރި އަލްބަމަށް ވެސް މެ އެވެ. އެއީ 34.57 މިލިއަނެވެ. މީގެ އިތުރުން "ފޯކްލޯ" ނެރުނުތާ 24 ގަޑިއިރު ތެރޭގައި 1.3 މިލިއަން ކޮޕީ ވިކިފައިވެ އެވެ.

ރިލީޒްކުރިތާ ތިން ދުވަހުގެ ތެރޭގައި (ޖުލައި 24-26) އަށް އަލްބަމްގެ 500،000 ކޮޕީ އެމެރިކާގައި އެކަނި ވެސް ވިކިފައިވެ އެވެ.

"ފޯކްލޯ" އާ އެކު ދުނިޔޭގެ ރެކޯޑް ފޮތުން ޓޭލާ، 30، އަށް އާ މަގާމެއް ލިބުނު އިރު، އޭނާ އަށް ލިބުނު މަގާމު ކުރިން އޮތް އަންހެން ލަވަކިޔުންތެރިޔަކީ އެމެރިކާގެ ލަވަކިޔުންތެރިޔާ އެރިއާނާ ގްރަންޑޭ، 27، އެވެ. އެއީ މިދިޔަ އަހަރު ނެރުނު އަލްބަމް "ތޭންކް ޔޫ، ނެކްސްޓް" ރިލީޒްކުރިތާ އެއް ދުވަހުގެ ތެރޭގައި ލިބުނު 55.9 މިލިއަން ސްޓްރީމިންއާ އެކީގަ އެވެ.

ޓޭލާ އަކީ ކުރިން ވެސް ހަތް ފަރެއްގެ މަތިން ދުނިޔޭގެ ރެކޯޑް ފޮތުން ޖާގަ ހޯދާފައިވާ ފަންނާނެކެވެ.