މައްސަލަ ބަލަން ރިޒްގެ ފުރިހަމަ އެއްބާރުލުމެއް ނުލިބޭ: ލޭބަ ރިލޭޝަން އޮތޯރިޓީ

ބ. ބޮޑުފިނޮޅުގައި މަސައްކަތްކުރި މުވައްޒަފުންނަށް މުސާރަ ނުދޭ މައްސަލަ ބެލުމަށް މިލަންދޫ ދާއިރާގެ އެމްޑީޕީ މެމްބަރު އަލީ ރިޒާގެ ރިޒް ކުންފުނީގެ ފަރާތުން އެންމެ ފުރިހަމަ އަށް އެއްބާރުލުން ނުލިބޭ ކަމަށް ލޭބަ ރިލޭޝަން އޮތޯރިޓީން މިއަދު ބުނެފި އެވެ.

އެ އޮތޯރިޓީގެ ޕްރޮގްރާމް އޮފިސަރު ހޫދު އައްބާސް އަހުމަދު ވިދާޅުވީ، އެކަން ހިނގައިދިޔަ ދުވަހުން ފެށިގެން މުސާރައާ ގުޅޭ ސިޓީ ފޮނުވުމާ ހަމަ އަށް ވެސް ރިޒް ކުންފުނިން އެންމެ ފުރިހަމައަށް އެއްބާރުލުން ނުދޭ ކަމަށެވެ.

މިދިޔަ މަހުގެ ނިޔަލަށް މުސާރަ ދޭން އަންގައި ސިޓީ ފޮނުވުމުން ވެސް މިއަދާ ހަމައަށް ވެސް މުސާރަ ދިންކަން ކަށަވަރުކުރެވޭނެ ލިޔުމެއް އަދި މައުލޫމާތެއް ވެސް ދީފައިނުވާ ކަމަށް ވިދާޅުވި އެވެ.

"އެހެންވެ، ވަޒީފާއާ ބެހޭ ގާނޫނުގެ ދަށުން ކުންފުންޏާ މެދު އަޅަން ޖެހޭ ފިޔަވަޅުތައް އަޅާނެ،" ހޫދު ވިދާޅުވި އެވެ.

ސީލް ކުންފުނީގެ ރަށެއްގައި ރިސޯޓު ހަދަން ރިޒް ކުންފުނިން ބޭތިއްބި 179 ބިދޭސީންނަށް މިދިޔަ މަސް ނިމުމުގެ ކުރިން މުސާރަ ދިނުމަށް ލޭބަ ލިރޭޝަން އޮތޯރިޓީން ވަނީ އަންގައިފަ އެވެ.

އެ މުވައްޒަފުންނަށް މުސާރަ ނުދިނުމުން މިދިޔަ މަހުގެ ކުރީކޮޅު ބިދޭސީން ހަމަނުޖެހުން ހިންގައި، އެތަނުގެ މުދަލަށް ވަނީ ގެއްލުން ދީފަ އެވެ. އެކަމާ ގުޅިގެން ބައެއް ބިދޭސީން ހައްޔަރުކުރުމަށް ފަހު މިހާރު ވަނީ ދޫކޮށްލައިފަ އެވެ. އެ ރަށުގައި ބާކީތިބި ބިދޭސީން ބޮޑުފިނޮޅުން ބޭލުވުމަށް ފަހު އެ މީހުން ގެންގޮސްފައި ވަނީ ހުޅުމާލޭގައި ހުންނަ ފެސިލިޓީއަކަށެވެ.

ލޭބާ ރިލޭޝަންސް އޮތޯރިޓީން ފޮނުވި ސިޓީގައިވަނީ ބޮޑުފިނޮޅުގައި ތިބި ރިޒް ކުންފުނީގެ މުވައްޒަފުންނާއި ބޮޑުފިނޮޅު ހޮޓެލްސް އެންޑް ރިސޯޓްސް ކުންފުނީގެ މުވައްޒަފުން ފިޔަވައި ދެން ތިބީ ގަވާއިދާ ޚިލާފަށް އެކި ކުންފުނިތަކުގައި ނަމުގައި ގެނެސްފައި ތިބި ބިދޭސީން ކަމަށެވެ. އަދި އެ ހުރިހާ ބިދޭސީންނަށް ވެސް މުސާރަ ދެނީ ރިޒް ކުންފުނިން ކަމަށް އެ މީހުުން ބުނެފައިވާ ކަމަށާއި އެކަން ލިޔުންތަކުން އެނގޭ ކަމަށް ވެސް އެ ސިޓީގައިވެ އެވެ.

އެހެންވެ، ބޮޑުފިނޮޅުގައި ތިބި 179 ބިދޭސީންނަށް މުސާރަ ދިނުމަށް ފަހު އެކަން މިދިޔަ މަހުގެ 30 ވަނަ ދުވަހުގެ ނިޔަލަށް އެ އޮތޯރިޓީއާ ހިއްސާ ކުރުމަށާއި އަދި އެ އެންގުމާ ޚިލާފްވާ ނަމަ ފިޔަވަޅު އަޅާނެ ކަމަށް އެ ސިޓީގައިވެ އެވެ. ހޫދު ވިދާޅުވީ ރިޒް ކުންފުނީގެ މައްސަލައަކީ ވަޒީފާއާބެހޭ ޓްރައިބިއުނަލްގައި ވެސް އޮތް މައްސަލައަކަށް ވުމުން، އެކަމަށް ވެސް ރިއާޔަތްކުރުމަށްފަހު އޮންނަ އުސޫލުގެ ތެރެއިން ފިޔަވަޅު އެޅުމުގެ ކަންކަން ކުރިއަށް ދާނެ ކަމަށް ވިދާޅުވި އެވެ.