މައުސޫމަށް ރުހުންދޭން މަޖިލީހުގެ ޗުއްޓީ ފަސްކޮށްފި

ޓޫރިޒަމް މިނިސްޓަރު ޑރ. އަބްދުﷲ މައުސޫމަށް ރުހުން ދިނުމުގެ މައްސަލަ ނުނިންމައި ރައްޔިތުންގެ މަޖިލިސް ޗުއްޓީ އަށް ނުދިއުމަށް، މަޖިލީހުގެ މި އަހަރުގެ ދެވަނަ ދައުރު އަންނަ ހޯމަ ދުވަހާ ހިސާބަށް ދަންމައިލަން ނިންމައިފި އެވެ.

މައުސޫމަށް ރުހުން ދިނުމުގެ ކަންތަކުގައި ގޮތެއް ނުނިންމައި އެއް މަސްދުވަހުގެ ޗުއްޓީއަކަށް ނުދާން މިހާރު ކުރިއަށްދާ ޖަލްސާގައި ހުށަހެޅުއްވީ ރިޔާސަތުން މަޖިލީހުގެ ނައިބުރައީސް އީވާ އަބްދުﷲ އެވެ. އީވާ ވިދާޅުވީ ކޮވިޑް-19 ފެތުރޭތީ ރާއްޖޭގެ ޓޫރިޒަމަށް ބޮޑެތި މައްސަލަތަކެއް ދިމާވެފައިވާ މި ދުވަސްވަރު މިނިސްޓަރަށް ރުހުންދިނުމުގެ ކަންތައް ނުނިންމައި ބޭއްވުމަކީ ރަނގަޅު ގޮތެއް ކަމަށް ގަބޫލުނުކުރެއްވޭ ކަމަށެވެ.

މަޖިލީހުގެ މި އަހަރުގެ ދެވަނަ ދައުރު ނިންމައި މެމްބަރުން ޗުއްޓީ އަށް ދާން ކުރިން އޮތީ މިދިޔަ ބުދަ ދުވަހު އެވެ. އެކަމަކު އެ ދުވަހު ރިޔާސަތުން ނިންމީ މިއަދާ ހިސާބަށް ޗުއްޓީ ލަސްކުރުމަށެވެ. މިއަދުގެ ޖަލްސާ ހެނދުނުން ފެށިގެން އަދިވެސް ދަނީ ކުރިއަށެވެ.

ޓޫރިޒަމް މިނިސްޓަރަށް ރުހުން ދިނުމުގެ މައްސަލަ މިދިޔަ ބުދަ ދުވަހަށް އެޖެންޑާ ކުރި އެވެ. އެކަމަކު ސަރުކާރުގެ މަސްއޫލިއްޔަތު އަދާކުރާ މިންވަރު ބަލާ ކޮމިޓީން އެކަމާ ގުޅޭ ގޮތުން އެކުލަވައިލާ ތަޅުމަށް ފޮނުވި ރިޕޯޓް އަނބުރާ ފޮނުވައިލީ މައުސޫމް ހުވާ ކުރެއްވި އިރު ކުންފުންޏެއްގެ އިސް މަގާމުގައި އޭނާ ހުންނެވި ކަން އެނގިގެންނެވެ. އެ މަގާމުން އޭނާ ވަކިވިކަމަށް އިކޮނޮމިކް މިނިސްޓްރީން އެންގީ އޭގެ ފަހުންނެވެ.

ރިޕޯޓް ކޮމިޓީއަށް އަނބުރާ ފޮނުވާލުމުން ކޮމިޓީން ނިންމީ މައުސޫމް އަލުން ހުވަކުރެއްވުމަށް ލަފާދިނުމަށެވެ. އެ ލަފަޔާ އެއްގޮތަށް އޭނާ ވަނީ ފަހުން ހުވާކުރައްވައިފަ އެވެ.