ތުލުސްދޫ ގެސްޓް ހައުސް ހުޅުވާލައި، ފުރަތަމަ ޓޫރިސްޓުންނަށް މަރުހަބާ ކިޔައިފި

ކޮވިޑް-19ގެ ސަބަބުން ކ. ތުލުސްދޫގެ ވެސް ގެސްޓު ހައުސްތައް ބަންދުކުރިތާ ގިނަ ދުވަސްތަކަކަށް ފަހު މިއަދު އެ ރަށް ޓޫރިސްޓުންނަށް ހުޅުވާލައިފި އެވެ. ތުލުސްދޫން މިއަދު ވަނީ އެ ރަށަށް ފުރަތަމަ އައި ދެ ޓޫރިސްޓުންނަށް މަރުހަބާ ކިޔައިފަ އެވެ.

ލޯކަލް ޓޫރިޒަމްގައި ވަރަށް ބޮޑަށް ކުރިއަރާފައިވާ އަދި ގިނަ ގެސްޓްހައުސްތަކެއް ހުންނަ އެ ރަށުގައި ތިން ތަނަކަށް ހުއްދަ ދީފައިވި ނަމަވެސް ޓޫރިސްޓުން އަދި އައީ އެންމެ ގެސްޓްހައުސް އަކަށެވެ.

ގިނަ ދުވަސްތަކަށް ފަހު ރަށަށް ޒިިޔާރަތް ކުރި ޓޫރިސްޓުންނަށް މަރުހަބާ ކިޔުމަށް އެ ރަށުގައި ކުޑަ ހަފުލާއެއް ވެސް ވަނީ ބާއްވާފަ އެވެ.

ތުލުސްދޫ ކައުންސިލް މެމްބަރު މުހައްމަދު ޝަހީމް ވިދާޅުވީ ރަށުގެ ގިނަ ޒުވާނުންގެ ދިރިއުޅުން ގުޅިފައިވަނީ ގެސްޓްހައުސްގެ ވިޔަފާރިއާ ކަމަށާއި އެހެންވެ، އެ ތަންތަން ބަންދުކޮށްފައި ހުރުމުން އެ މީހުންގެ ދިރިއުޅުމަށް ވެސް އަސަރުކޮށްފައިވާ ކަމަށެވެ. ގެސްޓްހައުސްގެ ވިޔަފާރި އަލުން ފެށުމަކީ އެންމެންނަށް ވެސް ލިބުނު ހިތްހަމަ ޖެހުމެއް ކަމަށް އޭނާ ވިދާޅުވި އެވެ.

"ޓޫރިސްޓުން ގޮވައިގެން ރާޅާ އަޅަން ގޮސް، މޫދަށް ގޮސް ހަދާނީ ޒުވާނުން. އެހެންވެ، މަސައްކަތެއް ނެތިފައި އެހެން ތިބެން ޖެހުމުން، ގޯސް އަތަކަށް އެ މީހުން އަޅާފާނެ ކަމުގެ ބިރު އަޅުގަނޑުމެންނަށް އޮތް،" ޝަހީމް ވިދާޅުވި އެވެ.

"އެހެންވެ، އަލުން ގެސްޓްހައުސްތައް ހުޅުވުމަކީ އަޅުގަނޑުމެންނަށް ލިބުނު ހިތްހަމަ ޖެހުމެއް."

ޓޫރިސްޓުން އައުމާ އެކު، ހެލްތު ޕްރޮޓެކްޝަން އެޖެންސީގެ މިންގަނޑާ އެއްގޮތަށް އެ ރަށުގައި މިހާރު ވަނީ ރައްކާތެރިކަމުގެ ފިޔަވަޅު އަޅާފަ އެވެ. އެގޮތުން މިހާރު އާއްމުންނަށް ބޭރަށް ނިކުމެވޭނީ މާސްކް އަޅައިގެންނެވެ.

ތުލުސްދޫގެ އިތުރުން ގިނަ ރަށްތަކެއްގައި މިހާރު އަންނަނީ ގެސްޓްހައުސްތައް ހުޅުވައި، ޓޫރިސްޓުންނަށް މަރުހަބާ ކިޔަމުންނެވެ. އެކަމަކު ޒިިޔާރަތް ކުރާ މީހުންގެ އަދަދު އިތުރުވެ، ވިޔަފާރިތަކަށް ކުރިއެރުމެއް އަންނާނީ ޑިސެމްބަރުމަހުގެ ތެރޭގައި ކަމަށް ކަމާބެހޭ ތަޖުރިބާކާރުން ލަފާ ކުރެ އެވެ.