ޕެންޝަން އޮފީހުގެ ސީއީއޯގެ މަގާމަށް އިނގިރޭސި ވިލާތުގެ ބޭފުޅެއް

ޕެންޝަން އޮފީހުގެ ސީއީއޯގެ މަގާމަށް ފުރަތަމަ ފަހަރަށް ބިދޭސީއަކު ހަމަޖައްސައި، އެކަން އިއުލާންކޮށްފި އެވެ.

ޕެންޝަން އޮފީހުގެ ވެބްސައިޓްގައި އާންމުކުރި ބަޔާނެއްގައި ބުނީ އާ ސީއީއޯ، އިނގިރޭސިވިލާތުގެ ޖޯން ގްރިންޑަލް އަކީ އިންޝުއަރެންސް އާއި ޕެންޝަން ދާއިރާގެ 25 އަހަރުގެ ތަޖުރިބާކާރެއް ކަމަށެވެ.

ގްރިންޑަލް އަދާކުރައްވާފައިވާ މަތީ ފެންވަރުގެ މަގާމުތަކުގެ ތެރޭގައި މޯލްޓާގެ ފައިނޭންޝަލް ސާވިސަސް އޮތޯރިޓީގެ ވަގުތީ ޗީފް އެކްޗުއަރީގެ މަގާމާއި ލޮއިޑްސް ބޭންކިން ގްރޫޕްގެ ސީނިއަ އެކްޗުއަރީގެ މަގާމުގެ އިތުރުން މޯލްޓާގެ ކޮމްޕެރާ ގްރޫޕުގެ ޗީފް އޮޕަރޭޓިން އޮފިސަރުގެ މަގާމު ވެސް ހިމެނެ އެވެ.

އޭނާއަކީ ފަންޑުތައް ބެލެހެއްޓުމާއި ތަފާސްހިސާބާއި ރިސްކް މޮޑެލިންގެ ތަޖުރިބާކާރެއް ކަމަށް ވެސް ޕެންޝަން އޮފީހުން ބުންޏެވެ.

މެއި 13، 2009 ގައި ތަސްދީގުކުރި ޕެންޝަނާ ބެހޭ ގާނޫނުގެ ދަށުން އެ އޮފީސް އުފެއްދި އިރުން ފެށިގެން މިިދިޔަ ޑިސެމްބަރު މަހާ ހަމައަށް ސީއީއޯގެ މަގާމް އަދާކުރެއްވީ، ކުރިން އެސްޓީއޯގެ މެނޭޖިން ޑިރެކްޓަރުކަން ގިނަ އަހަރުތަކެއް ވަންދެން އަދާކުރެއްވި މުހައްމަދު ހުސެއިން މަނިކެވެ. އޭނާ އެ މަގާމުން ރިޓަޔާ ކުރެއްވީ އެވެ.

ސީއީއޯގެ މަގާމަށް ޑްރިންޑަލް އައްޔަންކުރަންދެން ޕެންޝަން އޮފީސް ހިންގަވަމުން ގެންދެވީ ވަގުތީ ސީއީއޯގެ ގޮތުން ފާތުމަތު ސުޖާތާ ހަލީމެވެ.

ތިން އަހަރުގެ ދައުރަކަށް އައްޔަންކުރައްވާ ޕެންޝަންގެ ސީއީއޯއަކަށް އިއުލާނުކުރި މިިދިޔަ ޖޫން މަހެވެ.