ލިވަޕޫލްގެ ރެކޯޑް ނިމުމަކަށް، ޓޮޓެންހަމަށް ޕޮއިންޓެއް

ލިވަޕޫލް (ޑިސެމްބަރު 28) - އިނގިރޭސި ޕްރިމިއާ ލީގުގައި ރޭ، ރެލިގޭޝަނުގައި އޮތް ވެސްޓް ބްރޮމްއާ 1-1 އިން އެއްވަރުވެ ލިވަޕޫލުން މި ފަހަރު ލީގުގައި އަމިއްލަ ދަނޑުގައި ދަމަހައްޓަމުން އައި ސައްތަ އިން ސައްތަ ރެކޯޑް ނިމުމަކަށް އައިއިރު، ވުލްވްސްއާ 1-1 އިން އެއްވަރުވެ ޓޮޓެންހަމް ހޮޓްސްޕާސް ޕޮއިންޓަކުން ފުއްދާލަންޖެހިއްޖެ އެވެ.

ރޭގެ މެޗުން މޮޅުވެގެން ލިވަޕޫލަށް ލީގުގެ އެއް ވަނައިގައި ފަސް ޕޮއިންޓުގެ ލީޑެއް ނެގުމުގެ ފުރުސަތު އޮތެވެ. އެކަމަކު އެއްވަރުވުމުން ލިވަޕޫލްގެ އޮތީ ތިން ޕޮއިންޓުގެ ލީޑެކެވެ. ލިވަޕޫލަށް 15 މެޗުން 32 ޕޮއިންޓް ލިބިފައިވާއިރު، ދެ ވަނައިގައި އޮތް އެވަޓަން އަށް 15 މެޗުން ލިބިފައިވަނީ 29 ޕޮއިންޓެވެ. ތިނެއްގައި ލެސްޓާ ސިޓީ އޮތީ 15 މެޗުން 28 ޕޮއިންޓާ އެކު އެވެ. ހަތަރު ވަނައިގައި އޮތް މެންޗެސްޓާ ޔުނައިޓެޑަށް 14 މެޗުން 27 ޕޮއިންޓް ލިބިފައިވާއިރު، ޓޮޓެންހަމް ވަނީ ރޭގެ ޕޮއިންޓާ އެކު ފަސް ވަނަ އަށް ޖެހިލައިފަ އެވެ. އެއީ ހަ ވަނައިގައި އޮތް މެންޗެސްޓާ ސިޓީއާ އެއްވަރަށް 26 ޕޮއިންޓް ލިބިފައިވީ ނަމަވެސް ފައިދާ ލަނޑުގެ ގޮތުން ކުރި ލިބޭތީ އެވެ.

ވެސްޓް ބްރޮމްގެ ފަރާތުން ވަރަށް ބޮޑަށް ޑިފެންސިވް ގޭމެއް ފުރަތަަމަ ހާފުގައި ފެނިގެންދިޔައިރު ލިވަޕޫލުން ލީޑުނެގީ މެޗުގެ 12 ވަނަ މިނިޓްގައި ސަޑިއޯ މާނޭ ޖެހި ގޯލުންނެވެ. ޖޮއެލް ޕަޓިޕް ދިން ބޯޅަ އޭރިއާ ތެރެއިން މެއިން ކޮންޓްރޯލްކޮށްލުމަށް ފަހު މާނޭ ވަނީ ތިރީ ކަނަށް ބޯޅަ އަމާޒުކޮށްލައިފަ އެވެ. ފުރަތަމަ ހާފުގައި ދެ ވަނަ ލަނޑެއް ޖަހަން ލިވަޕޫލުން ކުރި މަސައްކަތް ކާމިޔާބުނުވިއިރު، ދެ ވަނަ ހާފު ފަށައިގެން ލިވަޕޫލަށް މާ އެދެވޭ ކުޅުމެއް ވެސް ނުދެއްކުނެވެ. އަދި ވެސްޓް ބްރޮމް އިން ދިޔައީ ކުޅުން ރަނގަޅުކުރަމުންނެވެ. ނަތީޖާ އަކަށްވީ މެޗުގެ 82 ވަނަ މިނިޓްގައި ވެސްޓް ބްރޮމްގެ ސެމީ އަޖާޔީ ނަތީޖާ ހަމަހަމަކުރުމެވެ. މެޗުގެ ފަހު ވަގުތުގައި ލިވަޕޫލް މޮޅުކޮށްދޭން ރޮބާޓޯ ފިރްމީނޯ ބޮލުން ޖެހި ބޯޅަ ވެސްޓް ބްރޮމް ކީޕަރު ސޭމް ޖޯންސްޓޯން ވަނީ މަތަކޮށްފަ އެެވެ.

ވެސްޓް ބްރޮމްއާ ދާދި ފަހުން ހަވާލުވި ސޭމް އެލަޑައިސް މިވަނީ ލިވަޕޫލްގެ ދަނޑުގައި އޭނާގެ ރެކޯޑް ދަމަހައްޓައިފަ އެވެ. ލިވަޕޫލް ދަނޑުގައި އަލަޑައިސް ކޯޗުކޮށްދިން ޓީމެއް އެންމެ ފަހުން ހަތަރު ފަހަރު ވެސް ބަލިވެފައިނުވެ އެވެ. އަލަޑައިސް ބުނީ ރޭ އޭނާގެ ޓީމަށް ޕޮއިންޓެއް ލިބޭނެ ކަމަށް ގަބޫލުކުރާނެ ހަމައެކަނި ބަޔަކީ އެ ޓީމުގެ ކުޅުންތެރިންނާ އޮފިޝަލުން ކަމަށާއި އެއް ރޫހެއްގައި ކުޅެގެން ލިބިފައިވަނީ މުހިއްމު ނަތީޖާއެއް ކަމަށެވެ.

ލިވަޕޫލްގެ ކޯޗު ޔާގެން ކްލޮޕް ބުނީ މެޗު ދިޔަ ގޮތުން ވެސްޓް ބްރޮމް އަށް ޕޮއިންޓެއް ހައްގުވާ ކަމަށާއި ފުރުސަތު ލިބޭއިރު ފުރަތަމަ ހާފުގައި ދެ ވަނަ ގޯލެއް ޖެހުމުގެ މުހިއްމުކަން މި މެޗުން ވެސް ފެނިގެން ގޮސްފި ކަމަށެވެ.

ވުލްވްސް ދަނޑުގައި ރޭގެ މެޗު ފަށައިގެން 57 ސިކުންތު ތެރޭގައި ޓޮޓެންހަމަށް ލީޑުނަގައިދިނީ ޓަންގީ އެންޑޮމްބެލޭ އެވެ. ވުލްވްސް އިން ނަތީޖާ ހަމަހަމަކުރަން ކުރި މަސައްކަތް ކާމިޔާބުކުރީ މެޗު ނިމެން ހަތަރު މިނިޓަށް ވެފައި ހުއްޓަ އެވެ. ޕެޑްރޯ ނެޓޯ ތަަނަވަސްކޮށްދިން ފުރުސަތަކުން ވުލްވްސްގެ ލަނޑު ޖެހީ ރަމޮން ސައީސް އެވެ.

މި ނަތީޖާއާ އެކު ޓޮޓެންހަމަށް އެންމެ ފަހުން ކުޅުނު ހަތަރު މެޗުން ވެސް މޮޅެއް ލިބިފައިނުވެ އެވެ. ޓޮޓެންހަމްގެ ކޯޗު ހޯސޭ މޮރީނިއޯ ބުނީ މެޗު ކޮންޓްރޯލްކުރުމަކީ ލަނޑު ޖަހައި ފަރަގު ބޮޑު ކުރުން ކަމަށާއި ހަމައެކަނި މޮޅަށް ކުޅެގެން ނަތީޖާ އަށް ނުބަލައި ކުރާ މަސައްކަތުގެ ތަފާތެއް ނުފެންނާނެކަން މިހާރު ޓޮޓެންހަމް ކުޅުންތެރިން ވިސްނަން ޖެހޭ ކަމަށެވެ.

ލީގުގައި ރޭ ބާންލީ އަތުން 1-0 އިން ލީޑްސް ޔުނައިޓެޑް މޮޅުވިއިރު، ވެސްޓް ހޭމް ޔުނައިޓެޑް ދަނޑުގައި ބްރައިޓަން ވަނީ 2-2 އިން އެއްވަރުކޮށްފަ އެވެ.