އޮކްސްފޯޑްގެ ކޮވިޑް ވެކްސިން ހޯދަން ސިންގަޕޫރުގެ ކުންފުންޏަކާ އެކު ސޮއިކުރަން ނިންމައިފި

ކޮވިޑު-19 އިން ރައްކާތެރިވުމަށް ރާއްޖެއަށް ބޭނުންވާ ވެކްސިން ހޯދަން ސިންގަޕޫރުގެ ކުންފުންޏަކާއެކު ސޮއިކުރަން ދިވެހި ސަރުކާރުން ނިންމައިފި އެވެ.

ފިނޭންސް މިނިސްޓަރު އިބްރާހިމް އަމީރު މިއަދު ނެރުއްވި ގަރާރުގައި ވިދާޅުވީ ވެކްސިން ހޯދަން ސޮއިކުރަން ނިންމީ، އެސްޓްރާޒެނެކާ ސިންގަޕޯ ޕީޓީއީ، އެލްޓީޑީއީއާ ކަމަށެވެ.

އެސްޓްރާޒެނެކާ އަކީ އޮކްސްފޯޑް ޔުނިވާސިޓީއާ ގުޅިގެން ވެކްސިން އުފެއްދި ކުންފުންޏެވެ. އެ ވެކްސިން ބޭނުންކުރަން އިނގިރޭސި ވިލާތުގެ ރަސްމީ އިދާރާތަކުން އިއްޔެ ވަނީ ހުއްދަ ދީފަ އެވެ. އަދި އަންނަ ހޯމަދުވަހު އިނގިރޭސި ވިލާތުގައި އެ ވެކްސިން ދޭން ފަށާނެ އެވެ.

މީގެ 21 އަހަރު ކުރިން އުފެއްދި އެސްޓްރާޒެނެކާ އިން ގެންދަނީ ކެންސަރާއި ނޭވާލާ ނިޒާމުގެ ބަލިތަކަށް ޖެހޭ ބޮޑެތި ބަލިތަކަށް ވެސް ބޭސް އުފައްދަމުންނެވެ.

ގަރާރުގައި އަމީރު ވިދާޅުވީ ކޮވިޑުގެ ބަލިމަޑުކަމާ ގުޅިގެން މުޅި ދުނިޔެއަށް ވެސް ބޭނުން ޖެހިފައިވާ ވެކްސިނަކަށް ވުމުން ވަކި ބައެއްގެ ފަރާތުން ނޫނީ މި ވަގުތު އެ ލިބެން ނެތް ކަމަށެވެ. ކޮވިޑުން ދިވެހިން ރައްކާތެރިކުރަން ބޭނުންވާ ވެކްސިން ހޯދަން އެ އެއްބަސްވުމުގައި ސޮއިކުރުމަކީ ކޮންމެހެން ކުރަން ޖެހޭ ކަމެއް ކަމަށް ސަރުކާރުގެ ކަމާ ބެހޭ އިދާރާތަކުން ނިންމާފައިވާ ކަމަށް ވެސް އޭނާ ވިދާޅުވި އެވެ.

"ދައުލަތުގެ މާލިއްޔަތުގެ ގަވާއިދުގެ 1.02.1 ވަނަ މާއްދާއިން އަހުރެންނަށް ލިބިދޭ ބާރުގެ ދަށުން، އިސްވެ ދެންނެވުނު އެއްބަސްވުމުގައި ސޮއިކޮށް އެ އެއްބަސްވުން ތަންފީޒުކުރުމަށްޓަކައި، ދައުލަތުގެ މާލިއްޔަތުގެ ގަވައިދުގެ ތިރީގައި ބަޔާންކޮށްފައިވާ މާއްދާތަކަށް އަމަލުކުރަން ނުޖެހޭ ގޮތަށް ނިންމައިފީމެވެ،" ގަރާރުގައި ފިނޭންސް މިނިސްޓަރު ވިދާޅުވި އެވެ.

އެއީ މާލިއްޔަތު ގަވައިދުގެ 10.43 ވަނަ މާއްދާ އާއި 10.52 ވަނަ މާއްދާ އާއި 10.67 ވަނަ މާއްދާ އަދި 10.71 ވަނަ މާއްދާ އެވެ. މި މާއްދާތަކަށް އަމަލުކުރަން ނުޖެހޭ ގޮތަށް ނިންމީ ހަމައެކަނި ވެކްސިން ގަތުމަށްޓަކައި އެސްޓްރާޒެނެކާއާ އެކު ސޮއިކުރާ އެއްބަސްވުމުގެ މުއްދަތަށެވެ. ނަމަވެސް އެއްބަސްވުން ހަދާ މުއްދަތާއި ވެކްސިން ގެންނަން ކުރާ ހަރަދުގެ ތަފްސީލެއް އަދި ހާމައެއް ނުކުރެ އެވެ.

"އެ އެއްބަސްވުމުގެ މުއްދަތުގައި އެކަންކަމާ ގުޅޭ ގޮތުން އަމަލުކުރަންވާނީ އެ އެއްބަސްވުމުގައި ބަޔާންކޮށްފައިވާ ފަދައިން ކަމަށް ނިންމައި އެކަން އިއުލާނުކުރަމެވެ،" ގަރާރުގައި ވިދާޅުވި އެވެ.

އެސްޓްރާޒެނެކާއާ އެކު ހަދާ އެއްބަސްވުމުގެ ދަށުން ކުރާ ހަރަދުތަކުގެ އިންޓާނަލް އޮޑިޓެއް ފިނޭންސް މިނިސްޓްރީން ކުރިއަށްގެންދާނެ އެވެ. އަދި އެ ހަރަދުތައް ހެލްތު މިނިސްޓްރީގެ މާލީ ޒިންމާދާރުވެރިޔާ ހާއްސަ ސަމާލުކަމެއް ދީގެން ބަލަން އަންގާފައިވެ އެވެ.

އޮކްސްފޯޑްގެ ވެކްސިން މަސައްކަތް ކުރަނީ ކިހިނެއް؟

އޮކްސްފޯޑް ވެކްސިންގައި ބޭނުންކޮށްފައި ވަނީ ރާމާމަކުނަށް އަރިދަފުސް ރޯގާ ޖައްސާ ވައިރަސްއެކެވެ. އެ ވައިރަސްގެ ތެރެއަށް ކޮރޯނާވައިރަސްގެ ބޭރުގައި ކަށިތަކެއްގެ ގޮޮތަށް އުފެދިފައި ހުންނަ ޕްރޮޓީންގެ ބައި ލަ އެވެ.

ރާމާމަކުނުގެ ވައިރަސް ބަދަލުކޮށްފައި ހުންނަ ގޮތުން އިންސާނުންނަށް އެއްވެސް ބައްޔެއް ނުޖައްސަ އެވެ. އޭގެ ބަދަލުގައި، އެ ވައިރަސް ކުޅެނީ އޭގެ އަމާޒަކަށް ހަދާފައިވާ ކޮރޯނާވައިރަސްއާ ދެކޮޅަށް ދިފާއީ ރޯލެކެވެ.

ހަގީގަތުގައި ކޮވިޑް-19ގެ ކުރިން ވެސް އޮކްސްފޯޑްގެ ސައިންސްވެރިން އައީ އާ ބަލިމަޑުކަމަކަށް ތައްޔާރުވަމުންނެވެ. އެގޮތުން މި ވެކްސިންގައި ބޭނުންކުރާ ޓެކްނޮލޮޖީ އެހެން ބަލިތަކާ ދެކޮޅަށް ވެސް ބޭނުންކުރެވޭނެ އެވެ. ހަމައެކަނި ގެންނަން ޖެހޭނެ ބަދަލަކީ، ދުޝްމަނަކަށް އެފަހަރަކު ވާ ވައިރަސްގެ ހާއްސަ ބައިތަކެއް ވެކްސިންގެ މައިގަނޑު ވައިރަސްގެ ތެރެއަށް ލެއްވުމެވެ.

އޮކްސްފޯޑް ވެކްސިންގައި ވެސް ދެ ޑޯޒް ދެ އެވެ. ދެވަނަ ޑޯޒް ދޭނީ ފުރަތަމަ ޑޯޒް ދިންތާ 12 ހަފުތާ ފަހުންނެވެ.