މަޖިލިސް ހުޅުވުުން ފެބްރުއަރީ 4 ގައި، ސަރުކާރު ބަންދުވާނެ

މި އަހަރަށް ރައްޔިތުންގެ މަޖިލިސް ހުޅުވާ ޖަލްސާ އަންނަ މަހުގެ ހަތަރު ވަނަ ދުވަހު ބާއްވާތީ އެދުވަހަކީ ސަރުކާރު ބަންދު ދުވަހެއްގެ ގޮތުގައި ހަމަޖައްސައިފި އެވެ.

ރައީސް އޮފީހުން ބުނީ މަޖިލިސް ހުޅުވައި، މަޖިލީހުގައި ރިޔާސީ ބަޔާން ރައީސް އިއްވަވާ ދުވަހަކީ ސަރުކާރު ބަންދު ދުވަހެއްގެ ގޮތުގައި ބާއްވަން ކުރިން ހަމަޖައްސާފައިވާއިރު މިއަހަރުގެ ރިޔާސީ ބަޔާން އިއްވާ ޖަލްސާ އަންނަ މަހުގެ ހަތަރު ވަނަ ދުވަހު ބާއްވާތީ އެދުވަހަކީ ބަންދު ދުވަހެއް ކަމަށް ހަމަޖައްސާފައިވާ ކަމަށެވެ. އެދުވަސް ދިމާވަނީ ބުރާސްފަތި ދުވަހަކާ އެވެ.

ކޮންމެ އަހަރަކަށް ވެސް މަޖިލިސް ހުޅުވާ ދުވަހު ރައީސްގެ ރިޔާސީ ބަޔާނެއް އިއްވަވާނެ އެވެ. ވަރަށް މަދު އަހަރުތަކެއްގައި ނޫނީ، ކޮންމެ ފަހަރަކު ވެސް އެ ޖަލްސާ އޮންނަ ދުވަހު ސަރުކާރު ބަންދު ކުރެ އެވެ.