ފެރީގެ ނިޒާމުން ރާއްޖެ ގުޅާލަން އެމްޓީސީސީއާ ހަވާލުކޮށްފި

ފެރީގެ ނިޒާމުން ރާއްޖެ ގުޅާލުމަށް ސަރުކާރުން ކުރިއަށްގެންދާ "އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" މަޝްރޫއުގެ ފްރޭމްވޯކު އެއްބަސްވުމުގައި އެމްޓީސީސީއާ އެކު މިއަދު ސޮއިކޮށްފި އެވެ.

ދިވެހިރާއްޖޭގެ އަޑުގެ ސެނަކޯ މާލަމުގައި ބޭއްވި ރަސްމިއްޔާތުގައި މި އެއްބަސްވުމުގައި މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާ ސްޓްރަކްޗާގެ ފަރާތުން ސޮއިކުރެއްވީ ޑިރެކްޓާ ޖެނެރަލް ފާތިމަތު ޝާނާ އެވެ. އަދި އެމްޓީސީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އާދަމް އާޒިމެވެ. މި ރަސްމިއްޔާތުގައި ޓްރާންސްޕޯޓު މިނިސްޓަރު އައިޝަތު ނަހުލާ އާއި ޕްލޭނިން މިނިސްޓަރު މުހައްމަދު އަސްލަމް ވެސް ބައިވެރިވެވަޑައިގަތެވެ.

މި އެއްބަސްވުމުގެ ދަށުން މިއަހަރުގެ ތެރޭގައި ފެރީގެ ހިދުމަތް ފަށާނީ ހއ. ހދ. އަދި ށ. އަތޮޅުގެ 41 ރަށެއްގަ އެވެ. ސެޕްޓެމްބަރު މަސް ނިމުމުގެ ކުރިން މި ރަށްތަކުގައި ފެރީގެ ހިދުމަތް ފެށޭނެ ކަމަށް އާޒިމް ވިދާޅުވި އެވެ.

އާޒިމް ވިދާޅުވީ މި މަޝްރޫއުގެ ދަށުން ހަފުތާގެ ކޮންމެ ދުވަހަކު ފެރީގެ ހިދުމަތް ދޭނެ ކަމަށެވެ. އަދި އެއްވެސް ހިދުމަތަކަށް ބުރޫ އަރައިފި ނަމަ، ބެކަޕް ހަދައި ހިދުމަތް މެދުކެނޑުނަ ނުދިނުމަށް ތައްޔާރަށް ތިބޭނެ ކަމަށް ވެސް އޭނާ ވިދާޅުވި އެވެ. ހިދުމަތް ދިނުމަށް 14 ލޯންޗު ބޭނުންކުރާނެ ކަމަށާއި ބެކަޕަށް ތިން ލޯންޗު ބާއްވާނެ ކަމަށް އޭނާ ވިދާޅުވި އެވެ.

މި ހިދުމަތް ދިނުމަށް ބޭނުންކުރާ ލޯންޗުތަކަކީ މި މަޝްރޫއަށް ހާއްސަކޮށްގެން އެމްޓީސީސީން ބަންނަ ލޯންޗުތަކެކެވެ. ދިވެހި އޮޑިވެރިން ލައްވައި ބަންނަ މި ލޯންޗުތައް ފަރުމާކޮށްފައިވަނީ ނުކުޅެދުންތެރިކަން ހުންނަ މީހުންނަށް ވެސް އަމިއްލައަށް އަރައި ފޭބޭ ގޮތަށް ކަމަށް އެމްޓީސީސީން ބުންޏެވެ. ކޮންމެ ލޯންޗެއްގައި 40-50 މީހުންނަށް އެއްފަހަރާ ދަތުރުކުރެވޭނެ އެވެ.

އާޒިމް ވިދާޅުވީ މި މަޝްރޫއޫ ވީހާ ވެސް އަވަހަކަށް ފެށުމަށް އެ ކުންފުނިން މަސައްކަތް ކުރަމުން އަންނަ ކަމަށެވެ. ނަމަވެސް އިންޖިން ސަޕްލައިކުރުމުގައި ދަތިތަކެއް ހުރުމުން މަސައްކަތް ލަސްވެދާނެ ކަމަށް ވިދާޅުވި އެވެ.

"އަޅުގަނޑުމެން މި މަސައްކަތް ކުރަނީ ސެޕްޓެމްބަރުގެ ނިޔަލަށް މި މަސައްކަތް ފެށޭތޯ. މިހާރު ހުރި ހަމައެކަނި ޗެލެންޖަކީ އިންޖިން ސަޕްލައި ކުރުމުގައި ހުރި ދަތިތައް. އެކަމަކު ޔަންމާ އަކީ އަޅުގަނޑުމެން އެތެރެކުރާ އިންޖީނަކަށްވާތީ ވީހާ ވެސް އަވަހަށް އިންޖީނު ލިބޭތޯ މަސައްކަތް ކުރަމުން މި ދަނީ،" އާޒިމް ވިދާޅުވި އެވެ.

"މި މަސައްކަތް ފަށަން ބޭނުންވާ ފައިސާގެ ކަންކަން ވެސް ވަނީ ހަމަޖެހިފައި،"

އާޒިމް ވަނީ އެއްވެސް ޝަކުވާއެއް ނާންނަ ފެންވަރުގެ ހިދުމަތް ދޭނެ ކަމުގެ ޔަގީންކަން ދެއްވައިފަ އެވެ.

"އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކް" އަކީ މުޅި ރާއްޖެ އަށް އަމާޒުކޮށް ފަސިންޖަރުން އަދި މުދާ އުފުލާ ފެރީ ހިމެނޭ ގޮތަށް، ނޭޝަނަލް ސްޕެޝަލް ޕްލޭން (2020-2040) ގައި ހިމެނޭ ތިން ޒޯނާއި ހަ ރީޖަން ގުޅާލުމަށް ފަރުމާކޮށްފައިވާ ވިއުގައެކެވެ. މި ފެރީ ނެޓްވޯކުން ހަ ރީޖަންގެ ހުރިހާ ރަށެއް ގުޅާލާއިރު، އެއް ރީޖަން އަނެއް ރީޖަނާ ވެސް ގުޅުވާލާނެ އެވެ.

ފަސިންޖަރުން އުފުލާ ފެރީ ގުޅުވާލުމަށް ތިން ގޮތެއް ވަނީ ކަނޑައަޅައިފަ އެވެ. މީގެ ތެރެއިން "ކޮމިއުޓް ލިންކް"، އެ ރީޖަނެއްގައި ހިމެނޭ ރަށްތައް ގުޅުވައިދީ އާންމުކޮށް ކުރަންޖެހޭ މަސައްކަތް ނުވަތަ ޒަރޫރީ ބޭނުންތަކަށް ކުރާ ކުރު ދަތުރުތަކަށް ހާއްސަ ކޮށްފައިވާއިރު "ނަން-ކޮމިއުޓް" ލިންކް ހާއްސަކޮށްފައި ވަނީ ދެ ރަށެއްގެ ދެމެދުގައި ކުރާ، ދިގު ދަތުރުތަކަށެވެ. އަދި "ހައިވޭ ލިންކް" އަކީ އެއް ރީޖަން އަނެއް ރީޖަންއާ ގުޅުވައިދޭ މައި ދަތުރުފަތުރުގެ ހަބެވެ.

އިންޓަގްރޭޓެޑް ނޭޝަނަލް ޕަބްލިކް ފެރީ ނެޓްވޯކްގައި ހިމެނޭ ދެވަނަ ހިދުމަތަކީ ކާގޯ ނުވަތަ މުދާ އުފުލާ ފެރީގެ ހިދުމަތެވެ. މި ހިދުމަތަކީ، އެ ރީޖަނެއްގައި ހިމެނޭ ހުރިހާ ރަށްތަކާ އެންމެ ކައިރީގައި އޮންނަ ކޮމާޝަލް ހަބަކާ ގުޅުވައިދޭނެ ހިދުމަތެއް ކަމަށް ރައީސް އޮފީހުން ވަނީ ބުނެފަ އެވެ.