ވެކްސިން ލިބުމާ ދިމާކޮށް ރައީސް ގައުމާ މުޚާތަބުކުރައްވަނީ

ކޮވިޑް-19 އިން ރައްކާތެރިވުމަށް އިންޑިއާ އިން މިއަދު ރާއްޖެއަށް ވެކްސިން ހަދިޔާކުރުމާ ދިމާކޮށް، ރައީސް އިބްރާހިމް މުހައްމަދު ސޯލިހު ގައުމާ މުހާތަބުކުރައްވާނެ ކަމަށް ރައީސް އޮފީހުން ބުނެފި އެވެ.

ރައީސް އޮފީހުގެ ތަރުޖަމާނު މަބްރޫކް އަޒީޒް ކުރެއްވި ޓްވީޓުގައި ވިދާޅުވީ، ކޮވިޑާ ދެކޮޅަށް ކުރާ މަސައްކަތްތަކާ ގުޅޭ އެންމެ ފަހުގެ މައުލޫމާތު ދެއްވުމަށް 2:00 ގައި ރައީސް ގައުމާ މުހާތަބުކުރައްވާނެ ކަމަށެވެ.

އިންޑިއާއިން ވަނީ އޮކްސްފޯޑް ޔުނިވާސިޓީން އުފެއްދި "ކޮވިޝީލްޑް"ގެ 100،000 ޑޯޒް ހަދިޔާކުރަން ނިންމައިފަ އެވެ. ވެކްސިންގެ ފުރަތަމަ ޝިޕްމަންޓާއެކު އެއާ އިންޑިއާގެ ބޯޓު މެންދުރު ފަހު ވެލާނާ އިންޓަނޭޝަނަލް އެއާޕޯޓަށް ޖައްސާނެ އެވެ.

އެކި ގައުމުތަކުގައި ހުއްދަދީ މިހާރު ޖަހަމުން އަންނަ ކޮވިޝީލްޑް ވެކްސިން އުފައްދާ ކާރުޚާނާތައް އިންޑިއާގައި ހުރެ އެވެ. މި ވެކްސިނަކީ ސީދާ އިންޑިއާގެ އުފެއްދުމެއް ނޫނެވެ. މުޅި ދުނިޔޭގެ ވެކްސިން ސަޕްލައިގެ 60 ޕަސެންޓް އުފައްދާ އިންޑިއާ އިން އެ ގައުމުގެ އަމިއްލަ ވެކްސިނެއްގެ ގޮތުގައި ބާރަތު ބަޔޯޓެކް ކުންފުނިން އުފައްދާފައިވާ "ކޮވެކްސިން" އަށް ވެސް ވަނީ ހުއްދަ ދީފަ އެވެ. ނަމަވެސް މި ވެކްސިނާ ބެހޭ މައުލޫމާތު ހާމަކޮށްފައި ނުވާތީ އޭގެ ރައްކާތެރިކަމާ ބެހޭ ގޮތުން ތަޖުރިބާކާރުން އަންނަނީ ސުވާލު އުދައްދަމުންނެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިހާރު ވަނީ ކޮވިޑް ވެކްސިން ޕްރޮގްރާމް ފެށުމަށް މީހުން ރަޖިސްޓްރީކުރަން ހުޅުވާލައިފަ އެވެ. ނަމަވެސް ވެކްސިން ޖަހަން ފަށާނެ ދުވަހެއް އަދި އިއުލާނެއް ނުކުރެ އެވެ.

ރާއްޖެއިން އަމިއްލައަށް ހަރަދުކޮށްގެން ވެކްސިން ގެންނަން ސިންގަޕޫރުގެ ކުންފުންޏަކާއެކު ސޮއިކުރަން ނިންމާފައިވާކަމަށް ސަރުކާރުން ވަނީ މީގެ ކުރިން ބުނެފަ އެވެ. އެކަމަކު އޭގެ ފަހުން އެ އެއްބަސްވުމާ ގުޅޭ އެއްވެސް މައުލޫމާތެއް ނުދެ އެވެ. އެކަން ސާފުކުރަން ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އަށް ގުޅުމުން ވެސް ބުނީ އެކަމާ ގުޅޭ ތަފްސީލުތައް ފަހުން ހާމަކުރާނެ ކަމަށެވެ.