ފިނޮޅަށް ދިން ގެއްލުން ބަލަން ޓީމެއް ފޮނުވަން އީޕީއޭ އިން މަސައްކަތް ކުރަނީ

ކ. ހިންމަފުއްޓާއި ގިލިލަންކަންފުށި ރިސޯޓު ކައިރީގައި އޮންނަ ފިނޮޅަކަށް ގެއްލުން ދިން މައްސަލަ ތަހުގީގު ކުރަން އެންވަޔަރްމެންޓް ޕްރޮޓެކްޝަން އެޖެންސީ (އީޕީއޭ) ގެ ޓީމެއް ފޮނުވަން މަސައްކަތް ކުރަމުން އަންނަ ކަމަށް އެ އިދާރާ އިން މިއަދު ބުނެފި އެވެ.

އެ ފިނޮޅުގެ ކޯރު ކަނޑައި، އެ ތަނަށް ގެއްލުން ދޭން މަސައްކަތްކުރި ކަމަށް ބެލެވެނީ ގިލިލަންކަންފުށި ރިސޯޓުގެ ބައެއް މުވައްޒަފުންނާއި އިސްވެރިންތަކެކެވެ. މި މައްސަލަ ތަހުގީގު ކުރާނެ ކަމަށް އީޕީއޭ އާއި ފުލުހުން ވަނީ މިދިޔަ ހުކުރު ދުވަހު ބުނެފަ އެވެ.

އީޕީއޭގެ ޑިރެކްޓަރު ޖެނެރަލް އިބްރާހިމް ނައީމް "މިހާރު" އަށް މިއަދު ވިދާޅުވީ، މައްސަލަ ތަހުގީގު ކުރަން ފުލުހުންނާ އެކު މަސައްކަތްކަތް ކުރަމުން އަންނަ ކަމަށާއި އެ އެޖެންސީގެ ޓީމެއް ފޮނުވޭތޯ ބަލަމުން އަންނަ ކަމަށެވެ.

"ފެންނަ ފެނުމަށް ވަރަށް ބޮޑު ކަމެއް އެ އޮތީ ކޮށްފައި. އެހެންވީމާ ތަހުގީގުން ފިޔަވަޅު އަޅަން ޖެހޭކަން ފާހަގަކުރެވިއްޖެ ނަމަ، ފިޔަވަޅު އަޅާނަން،" ނައީމް ވިދާޅުވި އެވެ.

މި މައްސަލައިގައި އީޕީއޭ އަށް ކުރެވޭނެ ކަންތައްތަކުގެ ތެރޭގައި، އެ ފިނޮޅު ކުރިން އޮތް ގޮތަށް ހަދަން އެންގުމުގެ ބާރު ލިބިފައިވާ ކަމަށް އޭނާ ވިދާޅުވި އެވެ. މީގެ އިތުރުން 100 މިލިއަން ރުފިޔާ އާ ހަމައަށް ޖޫރިމަނާ ކުރުމުގެ ބާރު ވެސް އެ އިދާރާ އަށް ލިބިފައި ވެ އެވެ.

ފިނޮޅު ހަލާކުކޮށްލަން މަސައްކަތް ކުރުމުން، ތިމާވެށި ހިމާޔަތްކުރާ ބައެއް މީހުން އަންނަނީ އެކަމާ ދެކޮޅަށް އަޑުއުފުލައި ކަންބޮޑުވުން ފާޅުކުރަމުންނެވެ. ގިލިލަންކަންފުށި ރިސޯޓު ކައިރީގައި މިއަދު މުޒާހަރާކުރާނެ ކަމަށް ބުނެ ސޯޝަލް މީޑިއާގައި ވެސް ޕޯސްޓެއް ދައުރުވި އެވެ.

ނަމަވެސް ހިންމަފުށީ ކައުންސިލް މެމްބަރު ހަސަން ފާއިޒު ވިދާޅުވީ އެފަދަ މުޒާހަރާއެއް އަދި ކުރިއަށް ނުދާ ކަމަށެވެ. އެ ކަހަލަ ކަމެއްގައި އެ ރަށުގެ ބަޔަކު ބައިވެރިވާ ކަމުގެ މައުލޫމާތު ލިބިވަޑައިގެންފައި ނުވާ ކަމަށް ވެސް އޭނާ ވިދާޅުވި އެވެ.