އަހަރުގެ ބޮޑު ފިލްމު "އާރްއާރްއާރް" އޮކްޓޯބަރު 13 ގައި

މި އަހަރު އިންޑިއާގެ އެންމެ ބޮޑު ފިލްމު އަދި ގިނަ ބަޔަކު އިންތިޒާކުރަމުން އަންނަ، ޑައިރެކްޓަރު އެސްއެސް ރާޖަމޯލީގެ އާ ފިލްމު "އާރްއާރްއާރް" މި އަހަރުގެ އޮކްޓޯބަރު 13 ގައި ސިނަމާތަކަށް ގެންނަން ނިންމިކަން އިއުލާންކޮށްފި އެވެ.

އެކަން ފިލްމުގެ ޓީމުން ރަސްމީކޮށް އިއުލާންކޮށްފައި މި ވަނީ ފިލްމުގެ ލީޑް ދެ އެކްޓަރުން ކަމަށްވާ ރާމް ޗަރަން އާއި އެންޓީއާރް ޖޫނިއާ ފެންނަ ފިލްމުގެ މަންޒަރަކާ އެކީގަ އެވެ. އޭގައި ފެންނަނީ ޗަރަން އަހެއް ދުއްވާ އިރު ކައިރިން އެންޓީއާރް ސައިކަލެއްގައި ވާދައަށްދާ ތަނެވެ.

"އާރްއާރްއާރް" އަކީ 1920 ގެ އަހަރުތަކުގެ ވާހަކައެއް ކިޔައިދޭނެ ޕީރިއަޑް އެކްޝަން ޑްރާމާ ފިލްމެކެވެ. މިއީ ރާޖަމޯލީ އެންމެ ފަހުން ގެނެސްދިން އަދި އިންޑިއާގެ ބޮކްސް އޮފީހުގައި އާ ރެކޯޑްތަކެއް ހެދި "ބާހްބަލީ" ގެ ދެ ފިލްމުގައި ދައްކުވައިދިން ގޮތަށް ވަރުގަދަ ހަނގުރާމައިގެ މަންޒަރުތަކެއް ވެސް ފެންނާނެ ފިލްމެކެވެ.

ބޮލީވުޑްގެ ތަރިން ކަމަށްވާ އަޖޭ ދޭވްގަން އާއި އާލިއާ ބަޓްގެ އިތުރުން ޝްރިޔާ ސަރަން ވެސް މުހިއްމު ރޯލުތަކުން ފެނިގެންދާނެ "އާރްއާރްއާރް" މިހާރު މިއޮތީ ޝޫޓިން އެއްކޮށް ނިމުމުގެ މަރުހަލާގަ އެވެ. އެ ވާހަކަ މިދިޔަ ހަފުތާގައި ފިލްމުގެ ޓްވިޓާގައި ވެސް ހިއްސާކޮށްފައިވެ އެވެ. ފިލްމުގެ ޝޫޓިން ފެށީ 2018 ގަ އެވެ.

"އާރްއާރްއާރް" އިއުލާންކުރީ އެންމެ ފުރަތަމަ މިދިޔަ އަހަރުގެ ޖުލައި 30 ގައި ސިނަމާތަކަށް ގެންނަ ގޮތަށެވެ. ނަމަވެސް ފަހުން މި މަހުގެ 8 އަށް ފިލްމު ފަސްކުރި އެވެ. އެއަށް ފަހު މި އަހަރުގެ އޮކްޓޯބަރު 13 އަށް ފަސްކުރަން މަޖުބޫރުވީ މިދިޔަ އަހަރު ކުރިމަތިވި ކޮވިޑް-19 ގެ ބޮޑު ބަލިމަޑުކަމާ ހެދި ފިލްމުގެ ޝޫޓިން ވެސް އެތައް މަހަކަށް ހުއްޓާލަން ޖެހުމުންނެވެ.

އިންޑިއާގެ އެންމެ ކުޅަދާނަ ޑައިރެކްޓަރުންގެ ތެރޭގައި ހިމެނޭ ރާޖަމޯލީގެ "އާރްއާރްއާރް" އަކީ ރެކޯޑް އަދަދެއްގެ ބަޖެޓަކުން ވެސް ހަދާ ފިލްމެކެވެ. މިއަށް ގާތްގަނޑަކަށް 400 ކްރޯޑް ރުޕީސް (54.81 މިލިއަން ޑޮލަރު) ހޭދަކުރެ އެވެ.

"އާރްއާރްއާރް" އަކީ އިންޑިއާގައި ވާހަކަ ދައްކާ މައިގަނޑު ހުރިހާ ބަހަކުން ސިނަމާތަކަށް ގެންނާނެ ފިލްމެކެވެ. އޭގެ ތެރޭގައި ހިންދީ، ތަމަޅަ، ތެލެގޫ، ކަންނާޑާ އަދި މަލަޔާޅަމް ހިމެނެ އެވެ.

އިންޑިއާގެ ފިލްމީ ޚަބަރުތައް ދިރާސާކުރާ ފަރާތްތަކުން ލަފާކުރާ ގޮތުގައި މި ފިލްމަކީ "ބާހްބަލީ" އަށް ލިބުނު ވަރަށް ބޮޑު ތަރުހީބަކާއި ބޮޑު މަގުބޫލުކަމެއް ހޯދާނެ ފިލްމެކެވެ. އަދި މިއީ އިންޑިއާގެ ފިލްމުތަކުގެ ވަރުގަދަކަން ދުނިޔެ އަށް ވެސް ސާބިތުކޮށް ދޭނެ ފިލްމަކަށް ވާނެ އެވެ.