ކޮމިއުނިޓީ ސްޕްރެޑާ އެކު ފުވައްމުލައް ހުއްޓިފައި

ރާއްޖޭގައި ކޮވިޑް-19ގެ ވެކްސިން ދޭން ފެށުމާ އެކު ފުވައްމުލަކުގެ ރައްޔިތުން ވެސް ތިބީ "ނިއު ނޯމަލް"ގެ އުއްމީދުގަ އެވެ. ބިރެއް ނެތި ދަތުރުކޮށްލެވޭނެ ކަމުގެ ހުވަފެނުގަ އެވެ. ކޮވިޑު-19 އާ ހެދި "ރަށު ބަންދު"ވި ގުޅުންތައް އަލުން ބަދަހިކުރުމުގެ އިންތިޒާރުގަ އެވެ. އެކަމަކު ކުއްލި ގޮތަކަށް އެ ރަށުގައި ހުރިހާ ކަމެއް ބަދަލުވެއްޖެ އެވެ.

އާބާދީގައި 10،000 މީހުން ހިމެނޭ ރަށުގައި ކޮރޯނާ ވައިރަސް ފެތުރި އާއްމު ދިރިއުޅުމަށް ބުރޫއަރައި، ޚިދުމަތްތައް ހުއްޓިއްޖެ އެވެ.

ފުވައްމުލަކު ސިޓީ ކައުންސިލްގެ ޑިރެކްޓަރު ޖެނެރަލް އަހުމަދު ނިޖާހު ސިފަކުރެއްވި ގޮތުގައި ކުއްލި ކޮމިއުނިޓީ ސްޕްރެޑުން އެންމެންނަށް ލިބުނީ ވަރަށް ބޮޑު ޝޮކެކެވެ.

"ވެކްސިނާ އެކު އާއްމު ހާލަތަކަށް ދެވުނީ ކަމަށް ގާތްގަނޑަކަށް ދެކިގެން ތިބީ. ރައްކާތެރިކަމުގެ ފިޔަވަޅުތަކުގެ މަތީގައި އަހަރެއްހާ ދުވަހު މި ރަށުގެ ރައްޔިތުން ވެސް ހިފަހައްޓާލި. ވެކްސިން ލިބުނީމަ ކުޅިވަރުތަކާއި އެހެން ކަންކަން އާއްމު ހާލަތަކަށް ބަދަލުވެ ދަތުރުފަތުރު ވެސް މާ ލަހެއް ނުވެ އާއްމު ހާލަތަށް ދާނެ ކަމަށް ބަލައިގެން ތިއްބައި މި ރަށަށް މިގޮތަށް މި ދިމާވީ،" ނިޖާހު ވިދާޅުވި އެވެ.

"ރަށްރަށުގައި މާސްކް އެޅުން އެޗްޕީއޭ އިން މަޖުބޫރުކުރީމަ ވެސް އެކަމަށް ކެމްޕޭނެއް ފަށައި ރައްޔިތުންގެ އެއްބާރުލުން ލިބުނު ވަރަށް ބޮޑަށް."

ފުވައްމުލަކުގައި ކޮމިއުނިޓީ ސްޕްރެޑެއް އޮތް ކަން އެނގުނީ މިދިޔަ އާދީއްތަދުވަހު ނެގި 150 ރެންޑަމް ސާމްޕަލްގެ ތެރެއިން ޕޮޒިޓިވް ކޭހެއް ފެނުމުންނެވެ. އޭރު އޭނާގެ ޑައިރެކްޓް ކޮންޓެކްޓުންގެ އަދަދު 40 އަށް ވުރެ ގިނަ އެވެ.

އޭގެ ތެރެއިން ނުވަ ސާމްޕަލެއް ޕޮޒިޓިވްކަން ފުވައްމުލަކު ކައުންސިލުން ބުންޏެވެ.

އެ ރަށުގައި މިހާރު އޮތް ދެ ކްލަސްޓާ އިން ޖުމްލަ 16 މީހަކު މިހާތަނަށް ވަނީ ޕޮޒިޓިވްވެފަ އެވެ.

އެނގިފައިވާ ގޮތުގައި ރެންޑަމް ސާމްޕަލް ފުވައްމުލަކުގައި ނެގީ ދުބާއީ އިން އެ ރަށަށް ދިޔަ ފިރެހަނަކު ހޯމަ ކަރަންޓީންގައި ހުއްޓައި ޕޮޒިޓިވްވުމުންނެވެ. ފަހުން ޓެސްޓްކުރިއިރު އޭނާގެ އާއިލާގެ ބަޔަކު ވެސް ޕޮޒިޓިވްވި އެވެ.

ދެން އޮތް ކްލަސްޓާއަކީ އައްޑޫން ފުވައްމުލަކަށް މީގެ ހަފުތާއެއްހާ ދުވަސް ކުރިން ދިޔަ މީހަކު ޕޮޒިޓިވްވެ އޭނާއާ ޑައިރެކްޓް ކޮންޓެކްޓްވި މީހުންގެ ތެރެއިން ޕޮޒިޓިވްވި މީހުން ހިމެނޭ ކްލަސްޓާ އެވެ. އައްޑޫގައި ވެސް ކޮމިއުނިޓީ ސްޕްރެޑެއް އެބައޮތެވެ.

ނިޖާހު ވިދާޅުވި ގޮތުގައި ފުވައްމުލުގައި ޕޮޒިޓިވް މީހުންނާ ގާތުން ބައްދަލުވި މީހުންގެ އަދަދު 620 އަށް ވުރެން ގިނަ އެވެ. އަދިވެސް ކޮންޓެކްޓް ޓްރޭސިން ހަދައި ޓެސްޓްކުރުމުގެ މަސައްކަތް އެބަދެ އެވެ.

ބަލި އިތުރަށް ފެތުރުނަ ނުދޭން އެޅި ފިޔަވަޅުތަކާ އެކު ރަށް އޮތީ މުޅިން ހިމޭންވެފަ އެވެ. ދުވާލު ބޭރުތެރެއަށް އާއްމުން ނުކުމެ ނޫޅެ އެވެ. ރަށުގެ ހޮޓާތަކާއި ކެފޭ އަދި ރެސްޓޯރަންޓްތައް ބަންދެވެ. ފިހާރަތައް ހުޅުވާފައި ވަނީ ހަމައެކަނި ޑެލިވަރީއަށެވެ. ރޭގަނޑު އަށަކުން ފަތިހު ހަތަރަކަށް ކާފިއު އޮތީ އިއުލާންކޮށްފަ އެވެ.

"މި ފިޔަވަޅުތަކަށް ބޯލަނބައި ވަރަށް ބޮޑު އެއްބާރުލުމެއް ލިބޭ ރައްޔިތުންގެ ފަރާތުން،" ނިޖާހް ވިދާޅުވި އެވެ.

އެ ރަށުގެ ކަމާބެހޭ އިދާރާތަކާއި ރައްޔިތުން ގުޅިގެން މަސައްކަތް ކުރަމުން އަންނަނީ ބަލި އިތުރަށް ފެތުރުނަ ނުދީ ކޮންޓްރޯލް ކުރާށެވެ. އެ ރަށު އެންމެންގެ މިހާރު އޮތީ އެ އުއްމީދެވެ.