އިމިގްރޭޝަނުން ބުނަނީ އަލީ ވަހީދުގެ ޕާސްޕޯޓް ދޫކުރުމުގައި ގޯހެއް ނުހަދާ ކަަމަށް

ޖިންސީ ގޯނާ އާއި ރޭޕްކުރަން އުޅުމުގެ ތުހުމަތާ އެކު ދައުވާ އުފުލާފައިވާ ކުރީގެ ޓޫރިޒަމް މިނިސްޓަރު އަލީ ވަހީދުގެ ޕާސްޕޯޓް އިމިގްރޭޝަނުން ދޫކުރީ ކޯޓު އަމުރުގެ ކުރިންތޯ ސުވާލު އުފެއްދިޔަސް ގާނޫނާއި އުސޫލާ ޚިލާފަށް އެއްވެސް ކަމެއް ނުކުރާ ކަމަށް އިމިގްރޭޝަނުން މިއަދު ބުނެފި އެވެ.

ސީރިއަސް ހަތް ދައުވާއެއްގެ ޝަރީއަތް ފެށިތަނުން އަލީ ވަހީދުގެ ޕާސްޕޯޓް ދޫކޮށްލަން ކްރިމިނަލް ކޯޓުން އަމުރު ނެރެ ފުރުވާލުމުގައި ގޯސްތަކެއް ހިނގި ކަމަށް ތުހުމަތުކުރަމުން ދަނިކޮށް ޕްރޮސިކިއުޓަ ޖެނެރަލް ހުސެއިން ޝަމީމް ވެސް ވަނީ އެކަމަށް އެއްބަސްވެވަޑައިގެން ކޯޓުން އަމަލުކުރި ގޮތުގެ މައްސަލަތަކެއް ދައްކަވައިފަ އެވެ.

ރާއްޖެ އިން ކުރެވޭ މައިބަދައިގެ އޮޕަރޭޝަނެއް އިނގިރޭސިވިލާތުން ކުރަން ހަތަރު މަހަށް ޕާސްޕޯޓް ދޫކޮށްލީ ކޯޓުން ކުރިން އަމަލުކުރާ ގޮތާ ޚިލާފަށް ކަމަށް ވިދާޅުވުމަށް ފަހު، ޕީޖީ އެންމެފަހުން ކުރެއްވި ޓުވީޓުން އިމިގްރޭޝަނުގެ ބައިވެރިވުން ވެސް މިކަމުގައި އޮތް ކަމަށް ބަލަން ޖާގަ ވަނީ ލިބިފަ އެވެ.

ޝަމީމް ވިދާޅުވީ އަލީ ވަހީދުގެ ޕާސްޕޯޓް ދޫކޮށްލުމާ ގުޅޭ އަޑުއެހުން ކްރިމިނަލް ކޯޓުގައި ބާއްވައި އަމުރު އިއުލާންކުރީ މިދިޔަ އަންގާރަދުވަހު، (ފެބްރުއަރީ 9، 2021)، ކަމަށެވެ. އެ އޮފީހަށް އަމުރު ލިބުނީ ބުރާސްފަތިދުވަހު، (ފެބްރުއަރީ 11، 2021) ކަމަށާއި އޭގައި އަމުރު ނެރުނު ތާރީޚެއް ކަމަށް އޮތީ ބުދަދުވަސް، (ފެބްރުއަރީ 10، 2021) ކަމަށެވެ.

އަލީ ވަހީދު ފުރާވަޑައިގަތީ، ޝަމީމް ވިދާޅުވި ގޮތުގައި، އަމުރުގައި އޮތް ތާރީޚްގެ ކުރިންނެވެ. އެކަމަކު އެއީ ޕީޖީ އޮފީހަށް ފޮނުވި ލިއުންތަކުގައި ކްރިމިނަލް ކޯޓަށް ތާރީޚް އޮޅިގެން ލިއެވިފައި އޮތީ ކަމެއް އެ ކޯޓުން މިހާތަނަށް ސާފުކޮށެއް ނުދެ އެވެ. އަމުރު އެންމެ ފުރަތަމަ ނެރުނުއިރު ވެސް އަމުރަށް އެދުނީ ޕީޖީން ކަމަށް ލިޔެވިފައި އޮތީ އޮޅުމަކުން ކަމަށް ކޯޓުން ކުރިން ބުނެފައިވެ އެވެ.

ޝަމީމްގެ މި ޓުވީޓާ ގުޅިގެން ވިލިމާލެ ދާއިރާގެ މެމްބަރު އަދި ކުރީގެ ޑެޕިއުޓީ އެޓާނީ އަހްމަދު އުޝާމް ވިދާޅުވީ މިދިޔަ ބުދަދުވަހުގެ ތާރީޚް ޖަހާފައިވާ އަމުރެއްގެ ދަށުން އަންގާރަ ދުވަހު އިމިގްރޭޝަނުން ޕާސްޕޯޓް ދޫކުރި ގޮތެއް ސާފުކޮށްދޭން ޖެހޭ ކަމަށެވެ.

މި މައްސަލައިގައި "މިހާރު"ން ސުވާލުކުރުމުން އިމިގްރޭޝަންގެ އޮފިޝަލަކު މިއަދު ވިދާޅުވީ އެކަމުގައި އިމިގްރޭޝަނުން އަމަލުކުރީ ގާނޫނާއި އުސޫލްތަކާ އެއްގޮތަށް ކަމަށެވެ.

ޕީޖީ އޮފީހުން ބުނެފައިވާ ގޮތުގައި ކްރިމިނަލް ކޯޓުން އަލީ ވަހީދުގެ ޕާސްޕޯޓް ދޫކުރިއިރު، ކޮންމެ ސިއްހީ މައްސަލައަކަށް ބޭރުން ފަރުވާ ހޯދަން ނުޖެހޭ ކަމަށާއި ފިލާފާނެ ކަމުގެ ނިޔަތް އޮތް މީހެއްގެ ޕާސްޕޯޓް ދޫކުރަންވާނީ ރާއްޖެ އިން ފަރުވާ ނުކުރެވޭނެ ފަދަ ސީރިއަސް މައްސަލައެއް ހުރެގެން ވަގުތުން ފަރުވާދޭން ޖެހޭ ހާލަތެއްގައި އެކަނި ކަމަށް ކޯޓުގައި ބުނެފައިވާނެ ކަމަށެވެ. ދައުލަތުން އެދުނީ ވަކި މުއްދަތަކަށް ގައިދުކޮށްފައިވާ ޓްރެވަލް ޑޮކިއުމެންޓެއް ދޫކޮށްދިނުމަށް ކަމަށް ވެސް، ޕީޖީ އޮފީހުން ބުންޏެވެ.

އެކަމަކު ޕާސްޕޯޓް ދޫކުރުމަކީ ފަނޑިޔާރު ހަސަން ސައީދުގެ ނިންމެވުމެއް ކަމަށާއި އެކަން ކުރެއްވީ ރަނގަޅަށް ކަމަށް ޕީޖީ އަށް ފެނިވަޑައިނުގަންނަވާތީ މައްސަލަ އިއްޔެ ވަނީ ހައި ކޯޓުގައި އިސްތިއުނާފްކޮށްފަ އެވެ.