އައްޑޫން އިތުރު ބިދޭސީއަކު ކޮވިޑަށް ޕޮޒިޓިވްވެއްޖެ

އައްޑޫގައި ކޮވިޑް-19 އަށް ޕޮޒިޓިވް ބަޔަކު ހިމެނޭ ދެ ކްލަސްޓާގެ ތެރެއިން ބިދޭސީންތަކެއް ހިމެނޭ ހުޅުމީދޫ އެމްޓީސީ ކްލަސްޓާ އިން މިއަދު އިތުރު ބިދޭސީއަކު އެ ބައްޔަށް ޕޮޒިޓިވްވެއްޖެ އެވެ.

އެއީ ބަލީގެ އަލާމާތްތަކެއް ހުރެގެން ޓެސްޓްކުރި އިރު، ކޮވިޑަށް ޕޮޒިޓިވް ކަމަށް ދެއްކި މީހެކެވެ. އޭނާއަކީ ކަރަންޓީނުގައި ހިރު މީހެކެވެ. އެ ބިދޭސީމީހާއާއެކު، މިހާރު ބިދޭސީ ކްލަސްޓާ އިން ކޮވިޑަށް ޕޮޒިޓިވްވި އަދަދު 26 އަށް އަރާފައިވާއިރު، އައްޑޫގެ ޖުމްލަ ކޭސްތަކުގެ އަދަދަކީ 63 އެވެ.

އެއީ އައްޑޫގެ ގުޅިފައިވާ އަވަށްތަކުގެ ކްލަސްޓާ އިން ކޮވިޑަށް ޕޮޒިޓިވްވެފައިވާ 37 މީހުން ހިމަނައިގެންނެވެ. އެ ކްލަސްޓާ އިން އެންމެ ފަހުން އިއްޔެ އެ ބައްޔަށް ޕޮޒިޓިވްވީ އުމުރުން ފަސް އަހަރުގެ ކުއްޖެކެވެ.

ކޮވިޑް ޖެހުނު މީހުންގެ ތެރެއިން އެޑްމިޓްކޮށްގެން ތިން މީހަކަށް ފަރުވާދެމުން އަންނަ އިރު، އިތުރު ތިން މީހަކު ތިބީ އޮބްޒަވޭޝަންގަ އެވެ.

އައްޑޫގައި ކޮވިޑްގެ ދެ ކްލަސްޓާއެއް އޮތް ނަމަވެސް އެ ކްލަސްޓާތަކުގެ ބޭރުން މިހާތަނަށް އެއްވެސް މީހަކު ބައްޔަށް ޕޮޒިޓިވް ނުވާތީ މިހާތަނަށް އައްޑޫގައި ކޮމިއުނިޓީ ސްޕްރެޑެއް އޮތް ކަމަށް ނުބެލެވޭ ކަމަށް އައްޑޫ އިމަޖެންސީ އޮޕަރޭޝަން ސެންޓަރު (އިއޯސީ) އިން ރޭ ބުނެފައިވެ އެވެ.

ނަމަވެސް ކޮމިއުނިޓީ ސްޕްރެޑެއް ނެތް ކަމަށް އެއްކޮށް ނިންމާނީ މިހާރު ނަގަމުން އަންނަ ހުރިހާ ރޭންޑަމް ސާމްޕަލްތަކެއް ޓެސްޓްކޮށް ނަތީޖާ ނެގެޓިވްވުމުން ކަމަށް ވެސް އީއޯއީސީން ބުންޏެވެ.

ކޮވިޑް ކޭސްތައް ފެނުމާ ގުޅިގެން އައްޑޫ އަދިވެސް އޮތީ މޮނިޓަރިންގަ އެވެ. މޮނިޓަރިންގެ ފުރަތަމަ ހަތް ދުވަސް އިއްޔެ އަށް ހަމަވުމާ ގުޅިގެން އިތުރު ހަތް ދުވަހަށް މޮނިޓަރިން ދަންމައިލީ ރެއިން ފެށިގެންނެވެ.