ޕޮއިންޓް ދޭ އުސޫލަކުން ހޮވޭ މީހުން ޕީޕީއެމްގެ ޕްރައިމަރީގައި ބައިވެރިވެވޭ ގޮތަށް ހަދަނީ

ޕޮއިންޓް ދޭ އުސޫލަކުން ހޮވޭ ކެންޑިޑޭޓުން އަންނަ ލޯކަލް ކައުންސިލްތަކުގެ އިންތިހާބުގައި ޕީޕީއެމްގެ ޕްރައިމަރީގައިވާ ވާދަކުރެވޭ ގޮތަށް ހެދުމަށް ނިންމައިފި އެވެ.

ޕީޕީއެމްގެ މުސްތަޝާރު އަދި ރައީސް އަބްދުﷲ ޔާމީންގެ ފެކްޝަނުން ރޭ ބޭއްވި އެ ޕާޓީގެ ކައުންސިލް ބައްދަލުވުމަށް ފަހު، ދަރުބާރުގޭގައި ނޫސްވެރިންނާ ވާހަކަ ދައްކަވަމުން ސެކްރެޓަރީ ޖެނެރަލް އަބްދުﷲ ޚަލީލް ވިދާޅުވީ، ޕީޕީއެމްގެ ފަރާތުން ވާދަކުރާ ކެންޑިޑޭޓުންގެ ތެރެއިން އެންމެ ރަނގަޅު ބަޔަކީ ކޮބައިތޯ ބަލަން ބޭނުންވާ ކަމަށެވެ.

"ދުނިޔޭގެ އެހެން ބައެއް ތަންތަނުގައި އަމަލުކުރާ ގޮތަށް ޕޮއިންޓް ދޭ އުސޫލުން ކެންޑިޑޭޓުން ފުރޭނޭނެ ގޮތެއް ހެދުމަށް އަޅުގަނޑުމެން މަސައްކަތްތަކެއް ކުރަން. މިގޮތަށް ޕޮއިންޓް ދޭނީ ވަރަށް ވެސް އަޅުގަނޑުމެންގެ ޕާޓީގެ އާއްމު މެމްބަރުން ވެސް ގަބޫލުކުރާ އަދި ރާއްޖޭގެ އާއްމުކޮށް ގެންގުޅޭ ހަމަތައް ވެސް ގަބޫލުކުރާ އުސޫލްތަކެއްގެ ތެރެއިން،" ނިލަންދޫ ދާއިރާގެ މެމްބަރު ވިދާޅުވި އެވެ.

"އެހެންވީމަ ރަނގަޅު [ކެންޑިޑޭޓުން] ވިއްކޭނެ އަދި ހޮވުމުގެ ފުރުސަތު ވަރަށް ބޮޑު. އަދި އިރާދަކުރެއްވިއްޔާ ހޮވޭނެ ކަމުގެ ޔަގީންކަން އޮތް ކެންޑިޑޭޓުންތަކެއް ފުރޭނިގެން އަންނާނީ."

ހަލީލް ވިދާޅުވި ގޮތުގައި އިންތިހާބުކުރާ ގޮނޑީގެ އަދަދަށް ވުރެ އިތުރަށް ކުރިމަތިލާ ނަމަ އެ ދާއިރާއެއްގައި ޕްރައިމަރީއެއް ބާއްވާނެ އެވެ. އެގޮތުން ޕްރައިމަރީ ގައި ވާދަކުރެވޭނީ 75 ޕަސެންޓަށް ވުރެ މަތިން މާކްސް ހޯދާ މީހުންނަށް ކަމަށް ވެސް އޭނާ ވިދާޅުވި އެވެ.

"ޕްރައިމަރީ ބައެއް ދާއިރާތަކުގައި އޮންނާނެ،" ހަލީލް ވިދާޅުވި އެވެ.

އޭނާ ވިދާޅުވީ ޕްރައިމަރީ ބާއްވާއިރު އެ ސަރަހައްދަކަށް ކުރިމަތިލާ ކެންޑިޑޭޓަކަށް، އެ ސަރަހައްދެއްގައި ވޯޓުލެވޭ މީހުން އެނގޭނެ ދަފުތަރެއް އޮންނާނެ ކަމަށެވެ. އަދި މި ހަފުތާގައި އެ ދަފުތަރު އެކުލަވާލެވޭތޯ މަސައްކަތް ކުރަމުން އަންނަ ކަމަށް ވެސް ހަލީލް ވިދާޅުވި އެވެ.

"އަޅުގަނޑުމެން މިހާރު މި އެކުލަވައިލާ ދަފުތަރަކީ 90 ޕަސެންޓް އެކިއުރޭޓް ދަފުތަރަކަށް ވެގެންދާނެ. އެހެން ނަމަވެސް އެއަށް ވުރެ ރަނގަޅަށް ކުރެވޭތޯ ބަލަމުން މިދަނީ،" އޭނާ ވިދާޅުވި އެވެ.