ޚާރިޖީ ސިޔާސަތުގެ އެންމެ ބޮޑު އެއް އަމާޒަކީ އިންޑިއާއާ އެކު ގުޅުން ވަރުގަދަކުރުން: ޝާހިދު

އިންޑިއާއާ އެކު ގުޅުން ވަރުގަދަ ކުރުމަކީ މި ސަރުކާރުގެ ޚާރިޖީ ސިޔާސަތުގެ އެންމެ ބޮޑު އެއް އަމާޒު ކަމަށް ފޮރިން މިނިސްޓަރު އަބްދުﷲ ޝާހިދު މިއަދު ވިދާޅުވެއްޖެ އެވެ.

އިންޑިއާގެ ފޮރިން މިނިސްޓަރު ސުބްރަމަނިއަން ޖައިޝަންކަރު ރަސްމީ ދަތުރެއްގައި މިއަދު ރާއްޖެ ވަޑައިގަތުމާ ގުޅިގެން ފޮރިން މިނިސްޓްރީގައި ބޭއްވި ރަސްމިއްޔާތުގައި ވާހަކަ ދައްކަވަމުން ޝާހިދު ވިދާޅުވީ އިންޑިއާ އާއި ރާއްޖެއާ ދެމެދު 55 އަހަރު ވަންދެން އޮތީ ވަރަށް ގާތް ގުޅުމެއް ކަމަށެވެ. އަދި މި ސަރުކާރުގެ ޚާރިޖީ ސިޔާސަތުގެ އެންމެ ބޮޑު އަމާޒަކީ އިންޑިއާއާ އޮތް ގުޅުން އިތުރަށް ވަރުގަދަކުރުން ކަމަށް ޝާހިދު ވިދާޅުވި އެވެ.

އެ ރަސްމިއްޔާތުގައި ޝާހިދު ވިދާޅުވީ ދެ ގައުމުގެ ސަގާފަތުގައި ހުރި އެއްގޮތް ކަންތައްތަކާއި ރައްޔިތުންގެ މެދުގައި އޮތް ގުޅުމުގެ އިތުރުން ދެ ގައުމުގެ ގުޅުން ވަރުގަދަ ވުމުގެ އެންމެ ބޮޑު އެއް ސަބަބަކީ ރައީސް އިބްރާހިމް މުހައްމަދު ސޯލިހާއި އިންޑިއާގެ ބޮޑުވަޒީރު ނަރެންދުރަ މޯދީގެ ގާތް ގުޅުން ކަމަށެވެ. އަދި އެކަމަށްޓަކައި މޯދީ އަށް ޝުކުރު އަދާ ކުރައްވައި، ޝާހިދު ވިދާޅުވީ ޖައިޝަންކަރު އެކަމުގައި އަދާކުރައްވަނީ ވެސް މުހިންމު ރޯލެއް ކަމަށެވެ.

އިންޑިއާގެ އެހީ އާއި ލޯނު އެހީގެ ދަށުން ގިނަ މަޝްރޫއުތަކެއް މިހާރު ރާއްޖޭގައި ހިންގަމުންދާ ކަން ފާހަގަކުރައްވައި، ޝާހިދު ވިދާޅުވީ ރާއްޖޭގެ ތަރައްގީގައި އިންޑިއާގެ ދައުރު ބޮޑު ކަމަށެވެ. އެގޮތުން އިންޑިއާގެ ލޯނު އެހީގެ ދަށުން ހިންގާ، މާލެ އާއި ވިލިމާލެ އާއި ގުޅީފަޅު އަދި ތިލަފުށި ގުޅުވާލާ ބްރިޖްގެ މަސައްކަތް އޭނާ ފާހަގަ ކުރެއްވި އެވެ. އަދި އައްޑޫ ސިޓީގެ ފެނާއި ނަރުދަމާގެ މަޝްރޫއުގައި މާދަމާ ސޮއި ކުރާނެ ކަމަށާއި އިތުރު 34 ރަށެއްގައި މަޝްރޫއު ފެށުމުގެ އެއްބަސްވުމުގައި އަންނަ ހަފުތާގައި ސޮއިކުރަން މަސައްކަތް ކުރަމުންދާ ކަމަށް ވިދާޅުވި އެވެ.

"ދެ ގައުމުގެ ސަރުކާރުން ވެސް މަސައްކަތް މި ކުރަނީ އަވަހަށް މަޝްރޫއުތައް ކުރިއަށް ގެންދިއުމަށް." ޝާހިދު ވިދާޅުވި އެވެ.

މީގެ އިތުރުން އިިންޑިއާގެ އެހީގައި މިހާރު 74 ރަށެއްގައި ކުރިއަށް ގެންދާ މަޝްރޫއުތަކުގެ ސަބަބުން ވެސް އެ ރަށްރަށުގެ ރައްޔިތުންނަށް ގިނަ ފަސޭހަތަކެއް ލިބިގެންދާނެ ކަމަށް ޝާހިދު ވިދާޅުވި އެވެ. އަދި ދާދިފަހުން އިންޑިއާ އާއި ރާއްޖެއާ ދެމެދު ގާއިމްކުރި އެއާ ބަބްލްގެ ސަބަބުން ރާއްޖެއަށް އަންނަ އިންޑިއާ ފަތުރުވެރިންގެ އަދަދު ވަރަށް ބޮޑަށް އިތުރުވެފައިވާ ކަމަށް ވިދާޅުވެ، ޝާހިދު ވިދާޅުވީ އިންޑިއާ އިން އެ ފުރުސަތު ފަހިކޮށް ދިނީ ކޮވިޑް-19 ގެ ހާލަތު ވެސް ކުރިމަތިވެފައި ވަނިކޮށް ކަމަށެވެ.

އިންޑިއާއިން ދެވަނަ ފަހަރަށް އިތުރު އެއް ލައްކަ ޑޯޒްގެ ކޮވިޑް-19 ގެ ވެކްސިން ރާއްޖެއަށް ހަދިޔާ ކުރަން ނިންމާފައިވާތީ އެކަމަށް ޝުކުރު އަދާ ކުރަައްވައި، ޝާހިދު ވިދާޅުވީ ކޮވިޑް-19 ގެ އެންމެ ދަތި އުނދަގޫ ވަގުތުގައި ވެސް އިންޑިއާ އިން 250 މިލިއަން ޑޮލަރު އެހީ އޭރު ފޯރުކޮށް ދިން ކަމަށެވެ. އެފަދަ ބޮޑު އެހީއެއް އެ ދަނޑިވަޅުގައި އިންޑިއާ އިން ދިނީ އަމިއްލަ ގައުމަށް ވުރެ ރާއްޖެއަށް އިސްކަން ދީގެން ކަމަށް ޝާހިދު ވިދާޅުވި އެވެ.