ގަރާޖު ސިޓީ ނެތި ވެހިކަލް ރަޖިސްޓަރީކުރެވޭ އިސްލާހާ އެކު މުއިއްޒުގެ ކަންބޮޑުވުން

ކާރާއި ޕިކަޕް ފަދަ ތަކެތި ރަޖިސްޓްރީކުރުމަށް ގަރާޖެއް ބޭނުން ނުވާ ގޮތަށް އެއްގަމު ދަތުރުފަތުރާ ބެހޭ ގާނޫނަށް އިސްލާހު ގެންނަން ރައްޔިތުންގެ މަޖިލީހުގެ ކޮމިޓީން ނިންމާފައި ވަނިކޮށް، މާލޭ މަގުމައްޗަށް ވެހިކަލްތައް ގިނަވާ ގޮތައް ގާނޫނާއި ގަވައިދުތައް އިސްލާހު ނުކުރަން މާލޭގެ އިންތިހާބީ މޭޔަރު ޑރ. މުހައްމަދު މުއިއްޒު މިއަދު އެދިވަޑައިގެންފި އެވެ.

ކުރީގެ ހައުސިން މިނިސްޓަރު މުއިއްޒު ކުރެއްވި ޓުވީޓެއްގައި ވިދާޅުވީ މާލޭ ރައްޔިތުންގެ ހިޔާލާއި މަޝްވަރާއާ ނުލައި އެއްވެސް ހިފެހެއްޓުމެއް ނެތި ވެހިކަލްތައް އިތުރުވާ ގޮތަށް ގާނޫނެއް ނުވަތަ ގަވައިދެއް އިސްލާހު ނުކުރަން މާލެ ރައްޔިތުންގެ ހައްގުގައި ވަރަށް ބޮޑަށް އެދިވަޑައިގަންނަވާ ކަމަށެވެ.

ހަތަރުފުރޮޅުލީ އުޅަނދު ގިނަ އަދަދަކަށް ރަޖިސްޓާ ކުރާއިރު އެކަމަށް ބޭނުންވާ ގަރާޖު ސިޓީ ޓްރާންސްޕޯޓް އޮތޯރިޓީއަށް މިހާރު ހުށަހަޅަން ޖެހެ އެވެ. ވެހިކަލަށް އޮތް ބޮޑު ޑިމާންޑާ އެކު މިކަން ވެފައި އޮންނަނީ ގަރާޖްތައް ގެންގުޅޭ ފަރާތްތަކުން ކުރާ ވިޔަފާރިއަކަށެވެ. އެގޮތުން، ވެހިކަލް ރަޖިސްޓަރީ ކުރަން ބޭނުންވާ މީހުންނަށް ބޮޑު އަގުގައި ގަރާޖު ސިޓީ ވިއްކަ އެވެ. ގާނޫނާއި ގަވާއިދާ ހިލާފަށް، އަދި ކޮރަޕްޝަން ހިންގައިގެން، އެއް ގަރާޖަށް ވެސް 30-40 ވެހިކަލް ވެސް ބައެއް ފަހަރު ރަޖިސްޓާކޮށްފައި ހުރެ އެވެ. ނަމަވެސް އެ ވެހިކަލްތައް ޕާކު ކުރަނީ މަގުމަތީގަ އެވެ.

ގަރާޖު ސިޓީއަކާ ނުލައި ކާރާއި ޕިކަޕު ފަދަ އުޅަނދުތައް ރަޖިސްޓަރީ ކުރެވޭ ގޮތް ހަދަން މަޖިލީހަށް ހުށަހެޅުއްވީ ނޮޅިވަރަމް ދާއިރާގެ އަމިއްލަ މެމްބަރު މެންބަރު މުހައްމަދު ނަޝީދު އަބްދުﷲ އެވެ. އޭނާ އެ އިސްލާހު ހުށަހެޅުއްވީ ބައެއް ގަރާޖުތަކުގެ ވެރިފަރާތްތަކުން އެކަމުގެ ނާޖާއިޒު ފައިދާ ނަގައި ގަރާޖު ފީގެ ގޮތުގައި ނުވަތަ ގަރާޖު ކުލީގެ ގޮތުގައި ބޮޑެތި އަދަދުތަކުން ފައިސާ ނަގާ މައްސަލަ ހައްލު ކުރުމުގެ ބޭނުމުގައި ކަމަށް އެ ބިލުގައި ބުނެފައިވެ އެެވެ.

މި އިސްލާހު ގައުމީ ތަރައްގީ އާއި ތަރިކަ ކޮމިޓީން ދިރާސާ ކުރިއިރު ވަނީ މާލެ ސިޓީ ކައުންސިލާއި ފުލުހުން އަދި ޓްރާންސްޕޯޓް އޮތޯރިޓީ އާއި ޓްރާންސްޕޯޓް މިނިސްޓްރީގެ އޮފިޝަލުން ހާޒިރުކޮށް ސުވާލުކޮށްފަ އެވެ. އެ އިދާރާތަކުގެ ލަފަޔާ އެކު ކޮމިޓީން ނިންމާފައި ވަނީ އެއްގަމު ދަތުރުފަތުރުގެ ގާނޫނުގެ 13 ވަނަ މާއްދާގެ (ރ) އިސްލާހު ކުރުމެވެ. އެއީ އިންޖީނުލީ އެއްގަމު އުޅަނދު ރަޖިސްޓަރީ ކުރަން ހުށަހަޅާއިރު ގަރާޖެއްގައި އެ އުޅަނދެއް ބާއްވާނެ ކަމުގެ ލިޔުން ހުށަހަޅަން ލާޒިމްނުވާ ގޮތަށެވެ.