ކަރިޝްމާ ނުކުޅެ ދޫކޮށްލި ފާހަގަކޮށްލެވޭ ފިލްމުތަކެއް

ބޮލީވުޑްގެ ކުރީގެ ބަތަލާ ކަރިޝްމާ ކަޕޫރަކީ ބެލުންތެރިން ވަރަށް ލޯބިވި ބަތަލާއެކެވެ. އޭނާގެ ކެރިއަރުގައި ކާމިޔާބު ރީތި އެތައް ފިލްމެއް ކުޅެފައިވެ އެވެ. ބަތަލާ ކަރީނާ ކަޕޫރްގެ ދައްތަ ކަރިޝްމާ އަކީ މިހާރު ވެސް ބެލުންތެރިން ސްކްރީނުން ދެކިލަން ވަރަށް ބޭނުންވާ ބަތަލާއެކެވެ. އެކަހަލަ ވާހަކަތަކެއް ދޭތެރެއަކުން ދެކެވުނަސް، ކަރިޝްމާ އަލުން ބޮޑު ސްކްރީނުން ފެނިދާނެތޯ ނޫންތޯ އެއީ ވަރަށް ބޮޑު ސުވާލެކެވެ.

ކެރިއަރުގައި ބޮޑެތި ކާމިޔާބީތަކެއް ހޯދި ކަރިޝްމާ އަކީ އޭނާގެ ރަންޒަމާނުގައި، ވަރަށް ފާހަގަކޮށްލެވޭ ފިލްމުތަކެއް ނުކުޅެ ދޫކޮށްލި ބަތަލާއެކެވެ. އޭގެ ތެރޭގައި އާމިރު ޚާނާއި ޝާހްރުކް ޚާނާ އެކީ ކުޅެން ލިބުނު ފިލްމުތަކެއް ވެސް ހިމެނެ އެވެ. އެކަމަކު އެ ދެ ތަރިންނާ އެކު ވަރަށް ކާމިޔާބު ދެ ފިލްމު ކަރިޝްމާ ކުޅެފައިވެ އެވެ. އެއީ އާމިރާ އެކު ކުޅުނު 1996 ގެ "ރާޖާ ހިސްދުސްތާނީ" އާއި ޝާހްރުކާ އެކީ ކުޅުނު 1997 ގެ "ދިލް ތޯ ޕާގަލް ހޭ" އެވެ.

ދެ ތަރިންނާ އެކު ކުޅެން ލިބުނު ފިލްމުތަކުގެ ތެރެއިން ކަރިޝްމާ ދޫކޮށްލި އެއް ފިލްމަކީ އާމިރާ އެކު ކުޅެން ލިބުނު 1997 ގެ ކޮމެޑީ ފިލްމު "އިޝްގް" އެވެ. އިންދަރް ކުމާރު ޑައިރެކްޓްކުރި އެ ފިލްމުގައި ކަރިޝްމާ އަށް ކުޅެން ލިބުނީ ޖޫހީ ކުޅުނު ރޯލެވެ. ރިޕޯޓްތައް ބުނާ ގޮތުން "އިޝްގް" އިން ފުރަތަމަ ފުރުސަތު ލިބުނީ މަދޫ ސަކްސޭނާއަށެވެ. އެކަމަކު ފަހުން އޭނާގެ ބަދަލުގައި ކަރިޝްމާ އަށް ފިލްމު ހުށަހެޅުމުން އޭނާ ގަބޫލުނުކުރުމުން ޖޫހީ އަށް ފުރުސަތު ލިބުނީ އެވެ. އެ ފިލްމުގައި ކާސްޓްގައި އަޖޭ ދޭވްގަން އާއި ކާޖޮލް ވެސް ހިމެނެ އެވެ.

ޝާހްރުކާ އެކު ކަރިޝްމާ އަށް ކުޅެން ލިބުނު އެއް ފިލްމަކީ ކޮއްކޮ ކަރީނާ ކުޅުނު 2001 ގެ "އަސޯކާ" އެވެ. ރިޕޯޓްތައް ބުނާ ގޮތުން އެ ފިލްމު ކަރިޝްމާ ދޫކޮށްލީ ރޯލު މާ ގަޔާވާ އެއްޗަކަަށްނުވުމުންނެވެ. އެހެންވެ ފިލްމު ކުޅުނީ ކަރީނާ އެވެ. އެކަމަކު "އަސޯކާ" އަކީ މާ ކާމިޔާބު ފިލްމެއް ނޫނެވެ.

ކަރިޝްމާ ދޫކޮށްލި ޝާހްރުކްގެ އަނެއް ފިލްމަކީ ޝާހްރުކްގެ ކެރިއަރުގެ އެންމެ ކާމިޔާބު އެއް ފިލްމު ކަމަށްވާ 1998 ގެ "ކުޗް ކުޗް ހޯތާ ހޭ" އެވެ. އެ ފިލްމުގައި ރާނީ މުކަރްޖީ ކުޅުނު ރޯލަކީ ޑައިރެކްޓަރު ކަރަން ޖޯހަރް އެންމެ ފުރަތަމަ ޓްވިންކަލް ކަންނާ އަށް ހާއްސަކޮށްގެން ލިޔުނު ކެރެކްޓާއެކެެވެ. އެކަމަކު އޭނާ ފިލްމު ގަބޫލުނުކުރުމުން އެ ރޯލު އައިޝްވާރިއާ ރާއީ، ތައްބޫ، ރަވީނާ ޓަންޑަން އުރްމިލާ މަޓޯންޑްކަރް އަދި ކަރިޝްމާ އަށް ހުށަހެޅި އެވެ. ރާނީ އަށް "ކުޗް ކުޗް ހޯތާ ހޭ" އިން ފުރުސަތު ލިބުނީ އެ ހިސާބުންނެވެ. ފާހަގަކޮށްލަން ޖެހޭ އެއް ކަމަކީ ކާޖޮލް ވެސް ވަރުގަދަ ރޯލެއް ކުޅުނު އެ ފިލްމަކީ ރާނީ އަށް ބޮލީވުޑްގައި ރަނިކަންކުރަން ފިޔަވަޅު އަޅަން މަގުފަހިކޮށްދިން ފިލްމުކަމެވެ.

ކަރިޝްމާ ދޫކޮށްލި ފިލްމުތަކުގެ ތެރެއިން ދެން އެންމެ ފާހަގަކޮށްލެވޭ އެއް ފިލްމަކީ 1995 ގެ "ބަރުސާތު" އެވެ. އެންމެ ފުރަތަމަ ޝޭކަރް ކަޕޫރް ޑައިރެކްޝަނާ ހަވާލުވި އިރު، ފިލްމުގެ ބަތަލާ އަކީ ކަރިޝްމާ އެވެ. އެކަމަކު އެ ދެ މީހުން ވެސް ފިލްމު ދޫކޮށްލުމުން ރާޖްކުމާރު ސަންތޯޝީ ޑައިރެކްޓްކުރި ފިލްމުވެގެން ދިޔައީ ބޮބީ ޑިއޯލާއި ޓްވިންކަލް ބޮލީވުޑަށް ތައާރަފުވި ފިލްމަށެވެ.

ބެލުންތެރިންގެ ބޮޑު ތަރުހީބެއް ލިބުނު 1997 ގެ "ޖުދާއީ" އަކީ ވެސް ކަރިޝްމާ ދޫކޮށްލި ފިލްމެކެވެ. އަނިލް ކަޕޫރް ބަތަލުގެ ރޯލު ކުޅުނު ފިލްމުން ކަރިޝްމާ އަށް ލިބުނީ އުރްމިލާ ކުޅުނު ރޯލެވެ. "ޖުދާއީ" އަކީ ފައިސާ އާއި ތަނަވަސްކަމުގެ ދަހިވެތިކަމުގައި ސްރީދޭވީ ފިރިމީހާ "ވިއްކައިލުމުން" ދިމާވާ ހާދިސާތަކެއް ކިޔައިދިން ވަރަށް އަސަރު ގަދަ ލޯބީގެ ފިލްމެކެވެ.

ރިޕޯޓްތައް ބުނާ ގޮތުން އަޖޭގެ 2001 ގެ ފިލްމު "ޔޭ ރާސްތޭ ހޭ ޕިޔާރު ކޭ" ގައި ޕްރިތީ ޒިންތާ ކުޅުނު ރޯލަކީ ވެސް ކަރިޝްމާ އަށް ފުރަތަމަ ކުޅެން ލިބުނު ރޯލެކެވެ. އެކަމަކު މަދޫރީ ޑިކްސިޓް ވެސް ކާސްޓްގައި ހިމެނުނު ފިލްމު އޭނާ ދޫކޮށްލީ އެވެ.

ކަރިޝްމާ، 46، ފާހަގަކޮށްލެވޭ ފިލްމުތަކުގެ ތެރޭގައި "ރާޖާ ހިންދުސްތާނީ" ގެ އިތުރުން "ޒުބޭދާ" އާއި "ފިޒާ"، "ބީވީ ނަމްބަރު 1،" "ހީރޯ ނަމްބަރު 1"، "ކޫލީ ނަމްބަރު 1"، "ހަމް ސާތު ސާތު ހޭ"، "އަންދާޒް އަޕްނާ އަޕްނާ" އަދި "ޖީތު" ފަދަ ފިލްމުތައް ހިމެނެ އެވެ.

ދެހާސް އެކެއްގެ "ޒުބޭދާ" އަކީ ކަރިޝްމާ އަށް ނެޝަނަލް އެވޯޑް ވެސް ލިބުނު ފިލްމެކެވެ. އޭނާ އެކްޓިން އަށް ނުކުތީ 1991 ގެ "ޕްރޭމް ގައިދީ" އިންނެވެ. ކަރިޝްމާ އެންމެ ފަހުން ލީޑް ރޯލު ކުޅުނު ފިލްމަކީ 2012 ގެ "ޑޭންޖަރަސް އިޝްގް" އެވެ.

މިދިޔަ އަހަރުގެ ކުރީކޮޅު ކަރިޝްމާގެ ވެބް ސީރީޒެއް "މެންޓަލްހުޑް" ގެ ނަމުގައި އެކްތާ ކަޕޫރްގެ އޯލްޓް ބަލާޖީން ގެނެސްދީފައިވެ އެވެ.