މައްސަލަ ހުށަހެޅިތާ އަހަރަކާ ގާތްވަނީ، ދައުވާއެއް ނުކުރޭ، ބްލެކްމެއިލް ކުރުން ކުރިއަށް!

ކުޑަކުއްޖަކަށް ބިރު ދައްކައި، ބްލެކްމެއިލް ކުރި މައްސަލައެއް، އެ ކުއްޖާގެ އާއިލާގެ ފަރާތުން ފުލުހުންގެ އިދާރާ އަށް ހުށަހެޅިތާ އަހަރަކާ ކައިރިވާ އިރު ވެސް އެ މައްސަލައިގައި ދައުވާ ނުކޮށް އޮތް މައްސަލައެއް ފެންމަތިވެއްޖެ އެވެ.

އުމުރުން 17 އަހަރުގެ އަންހެންކުއްޖަކު ބްލެކްމެއިލްކޮށް، ބަރަހަނާ ފޮޓޯތައް މީހަކު ފޮނުވާ މައްސަލައިގައި ދައުވާ ކޮށްދިނުމަށް އެދި ޕީޖީ އޮފީހަށް ނުފޮނުވައި ނުވަ ވަރަކަށް މަސް ހޭދަވިކަން އެނގުނީ އެ ކުއްޖާގެ އާއިލާގެ ފަރާތުން ސޯޝަލް މީޑިއާގައި މިދިޔަ ބުރާސްފަތި ދުވަހު ޖެހި ޕޯސްޓަކުންނެވެ. އެ ޕޯސްޓުން އެނގޭ ގޮތުން ނަމަ، ފުލުހުން މައްސަލަ ބަލަމުންދާއިރު ވެސް ބްލެކްމެއިލް ކުރުން ދަނީ ކުރިއަށެވެ. އެކަމެއް ނުހުއްޓުވެ އެވެ.

އެ ޕޯސްޓާ ގުޅިގެން ފުލުހުންގެ ވަޓްސްއެޕް ގްރޫޕްގައި ނޫސްވެރިއަކު ސުވާލުކުރުމުން ފުލުހުން މިއަދު ބުނީ، އުމުރުން 17 އަހަރުގެ ކުއްޖަކަށް ބިރު ދައްކައި، ބްލެކްމެއިލް ކުރާ މައްސަލައެއް މިދިޔަ އަހަރުގެ ސެޕްޓެމްބަރު 3 ގައި ފުލުހުންނަށް ލިބިފައިވާ ކަމަށެވެ.

އެ މައްސަލައިގެ ތަހުގީގުގައި ފޮރެންސިކް ހެއްކާއި ގަރީނާ ހޯދާފައިވާ ކަމަށާއި މައްސަލަ މިހާރު ޕްރޮސެކިއުޓާ ޖެނަރަލް (ޕީޖީ) ގެ އޮފީހަށް ފޮނުވުމަށް ކުރަންޖެހޭ އެންމެ ފަހުގެ މަސައްކަތް ފުލުހުން ކުރަމުން އަންނަ ކަމަށް ވެސް ބުންޏެވެ.

މައްސަލަގައި ދައުވާ ނުކޮށް މިހާ ގިނަ ދުވަސްވީ، އަދި އެކަން ކުރިއެކޭ އެއްގޮތަށް ނުހުއްޓި އޮތް ސަބަބާ މެދު ފުލުހުން ވާހަކައެއް ނުދައްކަ އެވެ.

ފުލުހުން ބުނިގޮތުގައި ކުއްޖާގެ ރައްކާތެރިކަން ކަށަވަރުކޮށް ބޭނުންވާ ރައްކާތެރިކަން ފޯރުކޮށްދިނުމަށް އަޅަން ޖެހޭ ފިޔަވަޅުތައް ވެސް ވަނީ އަޅައިފަ އެވެ.

ނަމަވެސް އާއިލާގެ ފަރާތުން މި މައްސަލަ އެންމެ ފަހުން ސޯޝަލް މީޑިއާ އަށް ތިލަކުރީ ބްލެކްމެއިލް ކުރަމުންދާ މީހާއާ ވާހަކަ ދައްކައިގެން ވެސް އެކަން ހައްލު ނުވުމުން ކަމަށް ޕޯސްޓްގައިވެ އެވެ.

ކުއްޖާގެ އާއިލާގެ މެމްބަރުންނާއި ކުއްޖާ އަށް ވެސް އެ ކުއްޖާގެ ބަރަހަނާ މަންޒަރު ފެންނަ ފޮޓޯ ފޮނުވަމުންދާ ކަމަށާއި އެކަމުގެ ސަބަބުން އެ ކުއްޖާ އަށް ވަރަށް ބޮޑަށް އަސަރުކޮށްފައިވާ ކަމަށް އާއިލާގެ މެމްބަރު ބުންޏެވެ.

ސޯޝަލް މީޑިއާ އަށް ޕޯސްޓު ދޫކޮށްލި މީހާ ބުނީ، އޭނާ އަށް ބޮޑު ދައިތަ ކިޔާ ކުއްޖަކަށް އެ ކުއްޖާގެ ކުރީގެ ލޯބިވެރިޔާ ބިރު ދައްކައި، ބްލެކްމެއިލް ކުރަމުންދާ ކަމަށެވެ. އެ ކުއްޖާ އަށް ހަޑިހުތުރު ބަހުން ވާހަކަ ދައްކައި، އެ ކުއްޖާ މާލެ އައިސްފި ނަމަ ރޭޕްކުރާނެ ކަމުގެ އިންޒާރު ވެސް ދީފައިވާ ކަމަށް އޭގައި ބުނެ އެވެ.