ކޮވިޑް ބަލީގައި ރާއްޖެ އިން ފުރަތަމަ ފަހަރަށް ކުޑަކުއްޖަކު މަރުވެއްޖެ

ރާއްޖެ އިން ކޮވިޑް ބަލީގައި އުމުރުން 10 އަހަރުގެ އަންހެން ކުއްޖަކު މިރޭ މަރުވެއްޖެ އެވެ. މިއީ މި ބަލީގަައި ރާއްޖެ އިން ކުޑަކުއްޖަކު މަރުވި ފުރަތަމަ ފަހަރެވެ.

މަރުވި ކުއްޖާގެ އާއިލާއާ ގާތް މީހަކު "މިހާރު" އަށް ބުނީ، އެ ކުއްޖާ މަރުވީ މާ ބޮޑަށް ހާލު ދެރަވެގެން މިރޭ އައިޖީއެމްއެޗް ގެންދިޔަ ފަހުން ކަމަށެވެ. ހޮސްޕިޓަލަށް ގެންދިޔައިރު ވެސް އެ ކުއްޖާގެ ހޭނެތިފައިވާ ކަމަށް އާއިލާ އިން ބުންޏެވެ.

މީގެ ކުޑަ ދުވަސްކޮޅެއް ކުރިން އެ ކުއްޖާ ކޮވިޑަށް ޕޮޒިޓިވްވެފައިވާ ކަމަށާއި ނަމަވެސް ހާލު ދެރަވާން ފެށީ މީގެ ދެ ދުވަަސް ކުރިން ކަމަށް އާއިލާ އިން ބުނެ އެވެ.

މި މަސް އިއްޔެ ފެށުނުއިރު، އެ ދުވަހު އެކަނި ވެސް ކޮވިޑް ބަލީގައި އަށް މީހަކު މަރުވި އެވެ.

މި ކުޑަކުއްޖާއާ އެކު ކޮވިޑް ބަލީގައި ރާއްޖެ އިން މިހާތަނަށް 170 މީހަކު ވަނީ މަރުވެފަ އެވެ.

އެޗްޕީއޭ އިން ކުރިން ބުނެފައިވާ ގޮތުގައި، ކިޑްނީގެ ބައްޔަށް ބޭސްކުރަން މާލެ އައި ތަނުން ކޮވިޑް ޖެހި، ހާލު ދެރަވެގެން ވެސް އުމުރުން ހަތް އަހަރުގެ ކުއްޖަކަށް އަންނަނީ ވެންޓިލޭޓަރުގައި ފަރުވާދެމުންނެވެ. ތ. ވިލުފުށިން މާލެ އައި އެ ކުއްޖާގެ ހާލު ސީރިއަސް ކަމަށް މީގެ ހަތަރުވަރަކަށް ދުވަސް ކުރިން އެޗްޕީއޭ އިން ބުނެފައި ވެ އެވެ.

އެ އިދާރާ އިން ބުނެފައިވާ ގޮތުގައި، ކޮވިޑް ޖެހިގެން އުމުރުން 18 އަހަރުން ދަށުގެ 240 ކުޑަކުއްޖަކަށް އަންނަނީ ފަރުވާދެމުންނެވެ.