އަހަރުތަކަށް ފަހު ސީރިޔާ އާއި ސައޫދީ އެއްގަލަކަށް

ނުވަ އަހަރުގެ މެދުކެނޑުމަކަށް ފަހު، ސައޫދީ އަރަބިއްޔާ އާއި ސީރިޔާ އަލުން ގުޅުން ގާއިމުކުރުމުގެ މަސައްކަތްތަކެއް ފަށައިގެން ކުރިއަށް ދާ ކަމަށް ބައެއް މީޑިއާތަކުން ރިޕޯޓްކޮށްފި އެވެ.

ދެ ގައުމުގެ ގުޅުން އަލުން އިއާދަކުރުމާ ބެހޭ މަސައްކަތްކުރިއަށް ދާ ގޮތުގެ މައުލޫމާތު ލިބި ހުރި ބައެއް އޮފިޝަލުންނާ ހަވާލާދީ އަލްޖަޒީރާ އިން ރިޕޯޓްކުރި ގޮތުގައި، ސައޫދީ ސަރުކާރުން ސީރިޔާގެ ރައީސް ބައްޝާރުލް އަސަދުގެ ސަރުކާރާއެކު، އަލުން ގުޅުން ގާއިމުކުރުމާ ވަރަށް ކައިރިއަށް މިހާރު އާދެވިއްޖެ އެވެ.

އަލުން ގުޅުން ގާއިމުކުރުމުގައި ސައޫދީގެ އެންމެ ބޮޑު ބޭނުމަކީ، ސީރިޔާގައި އޮތް އީރާންގެ ނުފޫޒު ކުޑަކުރުމެވެ.

ސައޫދީއާ ގާތް ގުޅުމެއް އޮންނަ، ސީރިޔާގެ އިދިކޮޅު ހަނގުރާމަވެރިންގެ އިސް އޮފިޝަލަކު ވިދާޅުވި ގޮތުގައި ސައޫދީ ޝާހީ އާއިލާގެ ތެރޭގައި އޮތް ސިޔާސީ ވިސްނުން މިހާރު ވަރަށް ބޮޑަށް ބަދަލުވެއްޖެ އެވެ. ވަކިން ހާއްސަކޮށް ވަލީ އަހުދު މުހައްމަދު ބިން ސަލްމާން، މިހާރު ހުންނެވީ ބައްޝާރުލް އަސަދާ އެކު ގާތް ގުޅުމެއް އުފައްދަވަން ވަރަށް ބޮޑަށް ބޭނުންފުޅު ވެފަ އެވެ.

މި މަސައްކަތުގެ ތެރެއިން ސައޫދީ އަރަބިއްޔާގެ ޖާސޫސީ އިދާރާގެ ވެރިޔާ ހާލިދު ހުމައިދާން، މިދިޔަ މެއި މަހުގެ ތެރޭގައި ދިމިޝްގަށް ވަޑައިގެން ސީރިޔާ ސަރުކާރާ އެކު މަޝްވަރާތަކެއް ކުރެއްވި އެވެ. އަދި ވޭތުވެ ދިޔަ 10 އަހަރަށް ފަހު، ސައޫދީ އަށް ވަޑައިގެންނެވި ސީރިޔާގެ ފުރަތަމަ މިނިސްޓަރުގެ ގޮތުގައި، ސީރިޔާގެ ޓޫރިޒަމް މިނިސްޓަރު ރާމީ މަރްތީނީ ވެސް މެއި މަހުގެ ތެރޭގައި ސައޫދީ އަށް ވަޑައިގެންނެވި އެވެ.

ސީރިޔާގެ ދާހިލީ ހަނގުރާމަ ފެށުނުތާ ކުރީކޮޅު، ބައްޝާރުގެ ވެރިކަން ވައްޓައިލުމަށް ކުރި މަސައްކަތުގައި ސައޫދީ އަރަބިއްޔާއިން ވެސް ވަރަށް މުހިންމު ދައުރެއް އަދާކުރި އެވެ. އެ ގޮތުން، ސައޫދީ އަރަބިއްޔާގެ އަސްކަރީ އެހީތެރިކަން ސީރިޔާގެ އިދިކޮޅު ހަނގުރާމަވެރިންނަށް ފޯރުކޮށްދީފައިވެ އެވެ. ނަމަވެސް، އެ ހަނގުރާމައިގައި ބައްޝާރުގެ ސަރުކާރަށް ރަޝިޔާގެ އަސްކަރީ މަދަދާއި އީރާންގެ ހަނގުރާމަވެރިންނާއި އީރާންގެ އަސްކަރީ އެހީ ލިބެން ފެށުމުން، ސީރިޔާގެ ހަނގުރާމަ ބައްޝާރުގެ ކޮޅަށް ބުރަވީ އެވެ.

ބައެއް ރިޕޯޓްތައް ބުނާ ގޮތުން، ސީރިޔާއާ ގާތް ގުޅުމެއް އުފައްދަން ސައޫދީން ބޭނުންވާ މައިގަނޑު އަނެއް ސަބަބަކީ، އީރާނާއި ސައޫދީ އަރަބިއްޔާއާ ދެމެދު ގޯސްވެފައި އޮތް ގުޅުން، އަލުން އިއާދަކުރަން ސައޫދީން ބޭނުންވުމެވެ. ސައޫދީގެ ސިޔާސަތަށް މި އައި ބަދަލުން އެނގޭ އެއްޗަކީ، ސީރިޔާގެ ރައީސް ބައްޝާރުގެ ވެރިކަން ވައްޓައިލުމަށް ކުރި ހަނގުރާމައިގައި، އީރާނުން ސައޫދީގެ މައްޗަށް ކުރި ހޯދައިފިކަން ސައޫދީން ގަބޫލުކުރާ ކަމެވެ.

ކުރިއަށް ދުވަސްތަކުގައި ސީރިޔާގެ އޮފިޝަލުންނާއި ސައޫދީގެ އޮފިޝަލުންނާ ދެމެދު ސީރިޔާގެ ދިމިޝްގުގައި ބާއްވާ ބައްދަލުވުމުގައި، އީރާނުން ވެސް ބައިވެރިވުމުގެ ފުރުސަތު ވަރަށް ބޮޑު ކަމަށް، ސީރިޔާގެ އޮފިޝަލުން ވިދާޅުވެ އެވެ.

ސައޫދީ އަރަބިއްޔާ އާއި އީރާނާ ދެމެދު ސުލްހައިގެ ވާހަކަތަކެއް ދެކެވުނު ކަމަށް، މިދިޔަ އެޕްރީލް މަހުގެ ތެރޭގައި، މީޑިއާގައި އަޑުތަކެއް ފެތުރުނެވެ. އިރާގުގެ ވެރިރަށް ބަޣުދާދުގައި އެފަދަ ބައްދަލުވުމެއް ބޭއްވިކަން، އިރާގުގެ ރައީސް ބަރްހަމް ސޯލިވެސް މިދިޔަ މެއި މަހު ކަށަވަރުކޮށްދެއްވި އެވެ.

އެ ބައްދަލުވުމުގައި ވާހަކަ ދެކެވުނު ކަންކަމުގެ ތެރޭގައި، ޔަމަންގައި ހިނގަމުންދާ ހަނގުރާމަ ހުއްޓުވުން ހިމެނެ އެވެ. ޔަމަން ހަނގުރާމައިގައި، ޔަމަންގެ ސަރުކާރު ސިފައިންނަށް ވާގިވެރިވަނީ ސައޫދީ އަރަބިއްޔާ އިސްވެ އުފައްދާފައިވާ އަސްކަރީ ކޯލިޝަނުންނެވެ. އިދިކޮޅު ހޫތީ ހަނގުރާމަވެރިންނަށް މަދަދުވެރިވަނީ، އީރާން ސަރުކާރުންނެވެ.