އިސްކޮޅުން ދިގު ދެބެއިންނަށް އަތްފައި ދިގުކަމުގެ ރެކޯޑްތަކެއް

އާދަޔާހިލާފަށް ދިގުވުމުގެ މައްސަލަ ދިމާވެފައިވާ މިސްރުގެ އެއްބަނޑު އެއްބަފާ ދެ މީހަކަށް ފަސް ރެކޯޑެއް ކަށަވަރުވެއްޖެ އެވެ.

އެކަމަކު އެ މީހުންނަށް ރެކޯޑް ލިބުނީ އިސްކޮޅުގެ ދިގުކަމަކުންނެއް ނޫނެވެ. މުހައްމަދާއި ހުދާ ޝެހާތާގެ އިސްކޮޅު އެއްކޮށްލުމުން މިހާރު ހުރީ 414.4 ސެންޓި މީޓަރު (13 ފޫޓް 7 އިންޗި) އެވެ.

ދެބެއިންނަށް ރެކޯޑްތަކަށް ބަލާ އިރު މުހައްމަދު، 34، އަށް ކަށަވަރުވީ ދެ ރެކޯޑެކެވެ. އެއް ރިކޯޑަކީ އަތް އެންމެ ދިގު ފިރިހެނާގެ ރެކޯޑެވެ. އޭނާގެ ވައަތުގެ ދިގުމިނަކީ 31.3 ސެންޓި މީޓަރު (12.32 އިންޗި) އެވެ. މުހައްމަދު ދެވަނަ ރެކޯޑަކީ ދެ އަތް އެއްކޮށް ދަމައިލުމުން، އަތް އެންމެ ދިގު ފިރިހެނާގެ ރެކޯޑެވެ. އޭނާގެ ދެ އަތް އެއްކޮށްލުމުން އާދައިގެ ކާމޭޒަކަށް ވުރެ ދިގެވެ. ދިގުމިނަކީ 250.3 ސެންޓު މީޓަރު (8 ފޫޓް 2.5 އިންޗި) އެވެ.

އުމުރުން 30 އަހަރުގެ ހުދާގެ ތިން ރެކޯޑް ތެރެއިން އެއް ރެކޯޑަކީ ފައިތިލަ އެންމެ ދިގު އަންހެނާގެ ރެކޯޑެވެ. އޭނާގެ ކަނާތު ފައިތިލައިގައި ހުންނަނީ 33.1 ސެންޓި މީޓަރު (1 ފޫޓް 1.02 އިންޗި) އެވެ. ދެވަނަ ރެކޯޑަކީ އެންމެ ދިގު އަންހެން އަތެވެ. ހުދާގެ ވާތުގެ ދިގުމިނަކީ 24.3 ސެންޓި މީޓަރު (9.56 އިންޗި) އެވެ. ތިން ވަނަ ރެކޯޑަކީ ދެ އަތް އެއްކޮށް ދަމައިލުމުން އެންމެ ދިގު އަންހެން އަތުގެ ރެކޯޑެވެ. ދިގުމިނަކީ 236.3 ސެންޓި މީޓަރު (7 ފޫޓް 8.4 އިންޗި) އެވެ.

ހުދާ ބުނީ ރެކޯޑްތަކެއް ލިބުމުން ވަރަށް އުފާވެއްޖެ ކަމަށާއި މީގެ ސަބަބުން އެ މީހުންގެ ދިރިއުޅުމަށް ހެޔޮ ބަދަލުތަކެއް އަންނާނެ ކަމަށް ގަބޫލުކުރާ ކަމަށެވެ.

ދެބެއިން ވެސް ބުނި ގޮތުގައި އެ މީހުންގެ އުމުރުން 12 އަހަރާ ހަމައަށް އިސްކޮޅު ހުރީ އެ އުމުރުގެ އެހެން ކުދިންނާ ހަމަ އެއްވަރަކަށެވެ. އެކަމަކު 12 އަހަރު ވި ފަހުން ދެބޭން ވެސް އިސްކޮޅުން މާ ބޮޑަށް ދިގުވާން ފަށައި އެކަން އަދިވެސް އެއްކޮށް ނުހުއްޓެވެ. ހަށިގަނޑުގެ ބައެއް ގުނަވަންތައް ބޮޑުވާން ފެށީ ވެސް މި ބަދަލާ އެކީގަ އެވެ. މިހެން ދިމާވަނީ އެކްރޮމެގަލީ ކިޔާ ހޯމޯނަލް ޑިސްއޯޑާއެއްގެ ސަބަބުންނެވެ.

އެހެންވެ އިސްކޮޅު ދިގުވުން ކޮންޓްރޯލްކޮށް ގުނަވަންތައް ބޮޑުވުން ހުއްޓުވަން އޮތް ގޮތަކީ ހާއްސަ އޮޕަރޭޝަންތަކެއް ދެބޭން ވެސް ކުރުމެވެ.