އިންކުއަރީ އަށް އެމްއެންޑީއެފްގެ ފުރިހަމަ އެއްބާރުލުން ލިބުނު: އަސްލަމް

ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ބޮމުގެ ހަމަލާއާ ގުޅިގެން ރައްޔިތުންގެ މަޖިލީހުގެ ސަލާމަތީ ހިދުމަތްތަކާ ބެހޭ ކޮމިޓީ (241 ކޮމިޓީ)އިން ހިންގާ އިންކުއަރީ އަށް ޑިފެންސް މިނިސްޓްރީގެ އިސް ވެރިންގެ ފަރާތުން ފުރިހަމަ އެއްބާރުލުން ލިބުނު ކަމަށް އެ ކޮމިޓީގެ މުގައްރިރު ހިތަދޫ އުތުރު ދާއިރާގެ މެމްބަރު މުހައްމަދު އަސްލަމް ވިދާޅުވެއްޖެ އެވެ.

ޑިފެންސް މިނިސްޓްރީގެ އިސް ބޭފުޅުންގެ ފަރާތުން އިންކުއަރީ އަށް އެއްބާރުލުން ދިން ކަމަށް ބުނެވިދާނެތޯ ނޫސްވެރިއަކު ސުވާލު ކުރުމުން އަސްލަމް ވިދާޅުވީ، އެ ބޭފުޅުންގެ ފަރާތުން ފުރިހަމަ އެއްބާރުލުން ލިބުނު ކަމަށެވެ.

"އާދެ ވަރަށް ފުރިހަމަ އެއްބާރުލުމެއް އަޅުގަނޑުމެންނަށް ލިބިގެން ދިޔަ،" އަސްލަމް ވިދާޅުވި އެވެ.

އިންކުއަރީގެ ބޭނުމަށް ސިފައިންގެ އިސްވެރިންނާ ދެ ފަހަރެއްގެ މަތިން 241 ކޮމިޓީން ބައްދަލު ކުރި އެވެ.

އަސްލަމް ވިދާޅުވީ، ދެ ފަހަރަށް ސުވާލު ކުރަން ޖެހުނީ ދަށު ރޭންކުތަކުގެ ސިފައިންނާ ސުވާލު ކުރުމަށް ފަހު ލިބުނު މައުލޫމާތުތައް ސާފު ކުރަން ބޭނުންވުމުން ކަމަށެވެ. ބައެއް ދަށު ރޭންކުތަކުގެ ސިފައިންނާ ވެސް ދެ ފަހަރެއްގެ މަތިން ސުވާލު ކުރި ކަމަށް އޭނާ ވިދާޅުވި އެވެ.

އިންކުއަރީ އަށް ޗީފް އޮފް ޑިފެންސް ފޯސް މޭޖާ ޖެނެރަލް އަބްދުﷲ ޝަމާލާއި ވައިސް ޗީފް އޮފް ޑިފެންސް ފޯސް އަބްދުއްރަހީމް އަބްދުއްލަތީފު ހިމެނޭހެން ސިފައިންގެ 32 ބޭފުޅުންނާ ބައްދަލު ކުރި އެވެ. އޭގެ އިތުރުން ޑިފެންސް މިނިސްޓަރު މާރިޔާ އަހުމަދު ދީދީއާ ވެސް ބައްދަލު ކުރެއްވި އެވެ.

އިންކުއަރީގެ ބޭނުމަށް ކޮމިޓީގެ މެމްބަރުންގެ ތެރެއިން ތިން މެމްބަރަކު ވަނީ މައުލޫމާތު ހޯދަން ސިފައިންގެ މައި މަރުކަޒަށް ވެސް ޒިޔާރަތް ކުރައްވައިފަ އެވެ.

ހަމަލާއާ ގުޅުވައިގެން، ރައީސް ނަޝީދުގެ އަރިސް ބޭފުޅުން މިނިސްޓަރު މާރިޔާ އަށް ވަނީ ވަރަށް ބޮޑަށް ފާޑު ވިދާޅުވެފަ އެވެ. ނަޝީދަށް ހަމަލާއެއް ދޭން ބަޔަކު ރާވާކަމުގެ މައުލޫމާތު، ހުޅުދޫ ދާއިރާގެ މެމްބަރު އިލްޔާސް ލަބީބު މާކުރިން މާރިޔާ އަށް ދެއްވުމުން ވެސް ފިޔަވަޅު އެޅުމުގައި އޭނާ އާއި ޑިފެންސް މިނިސްޓްރީ ފެއިލްވެފައިވާ ކަމަށް އެ ބޭފުޅުން ތުހުމަތު ކުރެ އެވެ.

އޭގެ އިތުރުން، ހަމަލާ ދިނުމުގެ ކުރިން އެކަން ހުއްޓުވަން ސަލާމަތީ ބާރުތަކުން ފެއިލްވެފައިވާ ކަމަށް ބުނެ ވެސް ފާޑު ކިޔަ އެވެ.