އެޗްޑީސީން ހުޅުމާލޭގައި ސީސީޓީވީ ކެމެރާ ހަރުކުރަނީ

ހުޅުމާލޭގެ އެކި ސަރަހައްދުތަކުގައި ސީސީޓީވީ ހަރުކޮށް އެއް ނެޓްވޯކަކުން ގުޅާލަން ނިންމާފައިވާ ކަމަށް އެޗްޑީސީން މިއަދު ބުނެފި އެވެ.

މިއީ އެޗްޑީސީގެ ސްމާޓް ސިޓީ މަޝްރޫއުގެ ދަށުން މާލެ ސަރަހައްދަކީ ރައްކާތެރި ތަނަކަށް ހެދުމަށް ކުރިއަށްގެންދާ ޕްރޮޖެކްޓެކެވެ. މި ޕްރޮޖެކްޓުގެ ދަށުން ހުޅުމާލޭގެ މަގުތަކާއި ޕާކުތައް ހިމެނޭހެން އާއްމުން އެއްވެ އުޅޭ ހުރިހާ ތަނެއްގައި ސީސީޓީވީ ކެމެރާތައް ހަރުކުރާނެ އެވެ.

އެޗްޑީސީން ބުނީ މި ޕްރޮޖެކްޓުގެ މަސައްކަތް ފަށާނީ ހުޅުމާލެ ދެވަނަ ފިޔަވަހީގެ ހިޔާ ފުލެޓްތަކާއި ވަށައިގެންވާ އާންމު ސަރަހައްދުތަކުން ކަމަށެވެ. އަދި ހުރިހާ ކެމެރާއެއް ހުންނާނީ އެޗްޑީސީގެ ގިގަބިޓް ޕެސިވް އޮޕްޓިކަލް ނެޓްވޯކް (ޖީޕީއޯއެން) މެދުވެރިކޮށް ގުޅާލާފައި ކަމަށް ވެސް އެ ކުންފުނިން ބުންޏެވެ.

އެ ކުންފުނިން ބުނީ ކެމެރާތަކުގެ އެހީގައި ހުޅުމާލޭގައި ހިނގާ ކަންކަމަށް ކުއްލި ހާލަތްތަކުގައި އަޅަންޖެހޭ ފިޔަވަޅުތައް އެޅުން އަވަސް ވެގެން ދާނެ ކަމަށެވެ. އެގޮތުން، ނުވަ ގައުމެއްގައި ހަދާފައިވާ ދިރާސާ އިން ދައްކާގޮތުގައި ސީސީޓީވީ ހުރުމުން، ކުށްކުރާ މިންވަރު ފާހަގަކޮއްލެވޭ ވަރަށް ދަށްވާ ކަމަށާއި ކެމެރާ ހުންނަ ސަރަހައްދުތަކުގައި މަސްތުވާތަކެއްޗާ ގުޅުންހުރި ކުށްތައް 20 ޕަސެންޓު މަދުކަމަށް އެ ކުންފުނިން ބުންޏެވެ.

އެޗްޑީސީން ބުނި ގޮތުގައި ހުޅުމާލެ ފުރަތަމަ ފިޔަވަހީގެ ޖީފީއޯއެން މަޝްރޫއު ނިމުމުން ސީސީޓީވީ ވިއުގަ އެ ސަރަހައްދުގައި ވެސް ގާއިމްކުރާނެ އެވެ. އަދި ކުރިއަށް އޮތްތާނގައި މާލެ ސަރަހައްދުގެ ހުރިހާ ތަނެއް މި ވިއުގައިން ގުޅާލަން ނިންމާފައިވާ ކަމަށް ވެސް އެ ކުންފުނިން ބުންޏެވެ.