އިރާގު އަސްކަރިއްޔާގެ ނުރުހުން އެމެރިކާ އަށް

ސީރިޔާ އާއި އިރާގުގެ ދާހިލީ ހަނގުރާމައިގައި ބައިވެރިވަމުން އަންނަ، އީރާންގެ ހަނގުރާމަވެރިންގެ މަރުކަޒުތަކަކަށް، އެމެރިކާ ސިފައިން އިއްޔެ ރޭ ހަމަލާތަކެއް ދިން މައްސަލައިގައި، އިރާގުގެ އަސްކަރިއްޔާ އިން އެމެރިކާ އަށް ވަރަށް ބޮޑަށް ފާޑު ކިޔައިފި އެވެ.

އިރާގު އަސްކަރިއްޔާގެ ތަރުޖަމާނު ޔަހްޔާ ރަސޫލު ވިދާޅުވީ ސީރިޔާގެ އިމާ ގާތުގައި ހުރި ހަނގުރާމަވެރިންގެ މަރުކަޒުތަކަކަށް އެމެރިކާ ސިފައިން ދިން ހަމަލާތަކަކީ، އިރާގުގެ ސިޔާދަތީ މިނިވަންކަމުގެ ހުރުމަތް ކެނޑުން ކަމަށެވެ. މިއީ، 2003 ވަނަ އަހަރު އެމެރިކާ ސިފައިން އަރައިގަނެ، އިރާގުގެ ކުރީގެ ރައީސް ސައްދާމް ހުސައިންގެ ވެރިކަން ވައްޓާލައި އެ ގައުމުގައި ހިންގަމުން އަންނަ އަސްކަރީ ހަރަކާތްތަކާ ދެކޮޅަށް މިހާ ފާޅުކަން ބޮޑު ގޮތެއްގައި ދެކޮޅު ހެދި ފުރަތަމަ ފަހަރެވެ.

"އިރާގައި ސީރިޔާ ގުޅޭ ސަރަހައްދީ ރޮނގުގެ ކައިރިން، އިރާގުގެ ސަރަހައްދަކަށް، އެމެރިކާގެ ވައިގެ ސިފައިން އިއްޔެ ރޭ ދިން ހަމަލާ އިރާގުގެ އަސްކަރިއްޔާ އިން ކުށްވެރިކުރަން. އެ ހަމަލާއަކީ، ބައިނަލްއަގުވާމީ ހުރިހާ ގާނޫނުތަކާއި ހުރިހާ މުއާހަދާތަކެއް ބުނާ ގޮތުން، އިރާގުގެ ސިޔާދަތަށް ފާޅުގައި ދެކޮޅު ހެދުމާއި އިރާގުގެ މިނިވަންކަމާއި އިރާގުގެ ގައުމީ ސަލާމަތާއި ރައްކާތެރިކަމުގެ ހުރުމަތް ކަނޑައިލުމުގެ އަމަލެއް،" ޓުވިޓާގައި އާންމު ކުރެއްވި ބަޔާނެއްގައި ޔަހްޔާ ރަސޫލު ވިދާޅުވި އެވެ.

އިރާގުގެ އަސްކަރިއްޔާ އިން މި މޭރުމުން ބަޔާނެއް ނެރުނީ، އިރާގާއި ސީރިޔާގައި ހުރި، އީރާނުގެ ހަނގުރާމަވެރިންގެ އަސްކަރީ މަރުކަޒުތަކަކަށް އެމެރިކާގެ ވައިގެ ސިފައިން ހަމަލާތަކެއް ދީފައިވާ ކަމަށް، އެމެރިކާގެ އަސްކަރިއްޔާ އިން ބުނެފައި ވަނިކޮށެވެ. އެ ހަމަލާތަކުގައި، އީރާނުގެ މަދަދު ލިބޭ ހަނގުރާމަވެރިންގެ ހަތަރު މީހަކު މަރުވި ކަމަށް އިރާގުގެ އަސްކަރިއްޔާ އިން ބުނެ އެވެ.

އެމެރިކާގެ މި ހަމަލާތަކާ ގުޅިގެން، ހަނގުރާމަވެރިންގެ ޖަމާއަތެއް ކަމަށްވާ ސައްޔިދުއް ޝުހަދާއު އިން ނެރުނު ބަޔާނެއްގައި ބުނީ، އެމެރިކާއާ ދެކޮޅަށް ވަރުގަދަ ހަނގުރާމައެއް ކުރިއަށް ގެންދާނެ ކަމަށެވެ.

އެމެރިކާ ސިފައިން އިއްޔެ ހަމަލާ ދިނީ، އިރާގުގައި ތިބި އެމެރިކާ ސިފައިންނަށް، ޑްރޯން ޒަރީއާއިން ހަމަލާ ދިނުމަށް ބޭނުންކުރާ ތަންތަނަށެވެ. އަދި އެ ތަންތަން ބޭނުންކުރަނީ، އީރާނު ސަރުކާރުން މަދަދު ލިބޭ ހަނގުރާމަވެރިން ކަމަށް ވެސް އެމެރިކާ އިން ބުނެ އެވެ. އޭގެ އިތުރުން އީރާންގެ މަދަދު ލިބޭ ހަނގުރާމަވެރިން ހަތިޔާރު ރައްކާކުރާ ގުދަނަކަށް ވެސް ހަމަލާ ދިނެވެ.

އެމެރިކާގެ ފައިޓަރު ބޯޓުތަކުން ރޭ ދަންވަރު ދިން މި ހަމަލާތަކަކީ، ރައީސް ޖޯ ބައިޑެންގެ ސީދާ އަމުރަކުން ތަންފީޒު ކުރި ހަމަލާތަކެކެވެ. މިއީ މިދިޔަ ޖެނުއަރީ މަހު ވެރިކަމާ ހަވާލުވެވަޑައިގަތުމަށް ފަހު، ރައީސް ބައިޑެންގެ އަމުރަށް، އީރާންގެ ހަނގުރާމަވެރިންނަށް ހަމަލާދިން ދެ ވަނަ ފަހަރެވެ. އެންމެ ފުރަތަމަ މިފަދަ ހަމަލާތަކެއް ދިނީ، އިރާގުގައި އެމެރިކާގެ އަމާޒުތަކަކަށް ދިން ރޮކެޓް ހަމަލާތަކަށް ބަދަލު ހިފުމުގެ ގޮތުން، މިއަހަރުގެ ފެބްރުއަރީ މަހުގެ ތެރޭގަ އެވެ.