ޑެޕްގެ ކުރީގެ އަންހެނުން އަމްބާ ސަރޮގޭޓް ކޮށްގެން ކުއްޖަކު ހޯދައިފި

ބޮޑެތި މައްސަލަތަކަކަށް ފަހު ކައިވެނި ރޫޅުނު ހޮލީވުޑްގެ މަޝްހޫރު އެކްޓަރު ޖޯނީ ޑެޕްގެ ކުރީގެ އަންހެނުން ބަތަލާ އަމްބާ ހާޑް ސަރޮގޭޓް ކޮށްގެން ކުއްޖަކު ހޯދައިފި އެވެ.

ސަރޮގޭޓްކޮށްގެން ކުއްޖަކު ލިބުނު ވާހަކަ އެ ކުއްޖާއާ އެކު ނަގާފައިވާ ފޮޓޯއަކާ އެކު އަމްބާ ފޭނުންނާ ހިއްސާކުރީ އިންސްޓަގްރާމް މެވެރިކޮށް ބުރާސްފަތި ދުވަހުގެ ރޭގަ އެވެ. އެ ޕޯސްޓްގައި 35 އަހަރުގެ ބަތަލާ ބުނީ ދަރިޔަކު ލިބުމަކީ ވަރަށް ބޮޑު އުފަލެއް ކަމަށާއި ދަރިޔަކު ހޯދީ އެކަމާ ވިސްނާތާ ހަތަރު އަހަރު ފަހުން ކަމަށެވެ.

އޭނާ ބުނި ގޮތުގައި އޫނާ ޕައިޖްގެ ނަން ދީފައިވާ އަންހެން ކުއްޖާ އުފަންވީ އެޕްރީލް މަހުގެ 8 ގަ އެވެ.

"މި ކުއްޖާއާ އެކު މިއީ އަހަރެންގެ ހަޔާތުގެ ބާކީ އޮތް ދުވަސްތަކުގެ އާ ފެށުމެއް،" އަމްބާ ބުންޏެވެ.

ގެވެށި އަނިޔާކުރި ކަމަށް ބުނެ ޑެޕްގެ ގާތުން ވަރިވާން އަމްބާ ކޯޓަށް ދިޔައީ 2016 ގަ އެވެ. އަދި އެ ވާހަކަ ފެތުރި އިނގިރޭސި ނޫސް ސަންއާ ދެކޮޅަށް ޑެޕް ކުރި މައްސަލަ ކޯޓްގައި ސާބިތުވެ ނުވެ، ނާކާމިޔާބީއާ ކުރިމަތިލާން ޖެހުމުން ޑެޕްގެ ކެރިއަރަށް ވަރަށް ބޮޑަށް އަސަރުކޮށްފައިވެ އެވެ.

އޭނާ ތަކުރާރުކޮށް މިހާރު ވެސް ބުނަމުން ދަނީ އަމްބާގެ ތުހުމަތާއި ސަން އިން ފެތުރި ވާހަކަތަކަކީ ހަދައިގެން ދެއްކި ދޮގު ވާހަކަތެއް ކަމަށެވެ. ނަމަވެސް ކޯޓުގައި ޑެޕަށް ނާކާމިޔާބީއާ ކުރިމަތިލާން ޖެހުމުން ލިބުނު ގެއްލުންތަކުގެ ތެރޭގައި ސޮއިކޮށްފައި އޮތް ފިލްމު "ފެންޓާސްޓިކް ބީސްޓް 3" އިން ވަކިކުރުން ހިމެނެ އެވެ.

މިކަމާ ފޭނުން ރުޅިގަދެވަގެން ފިލްމަށް އޭނާ އަލުން ގެންނަން ގޮވާލައި މިދިޔަ އަހަރުގެ ފަހުކޮޅު ވޯނާ ބްރަދާޒް އަށް ހުށަހަޅަން ޕެޓިޝަނެއްގައި ސޮއި ވެސް ކުރި އެވެ. އަދި ޑެޕްގެ ފޭނުން ވަނީ "އަކްއަމޭން" ގެ ކުރިއަށް އޮތް ފިލްމު އަމްބާ ވަކިކުރަން ވެސް ގޮވާލައިފަ އެވެ.

ނަމަވެސް އަންނަ އަހަރު ރިލީޒްކުރަން ހަމަޖެހިފައިވާ "އަކްއަމޭން އެންޑް ދަ ލޮސްޓް ކިންގްޑަމް" އިން އޭނާ ވަކިކޮށްފައެއް ނުވެ އެވެ.

ޑެޕް "ފެންޓާސްޓިކް ބީސްޓް 3" އިން ވަކިކޮށް އެ ރޯލު ވަނީ އެކްޓަރު މެޑްސް މިކެލްސަނަށް ދީފަ އެވެ. އެ ފިލްމު ވެސް އަންނަ އަހަރު ރިލީޒްކުރާނެ އެވެ.