"ސަން" އަށް ޖޯނީ ޑެޕް ކުރި ދައުވާ ސާބިތެއް ނުވި

ގެވެށި އަނިޔާގެ މައްސަލާގައި، ހޮލީވުޑްގެ މަޝްހޫރު އެކްޓަރު ޖޯނީގެ ޑެޕްގެ ގާތުން މީގެ ހަތަރު އަހަރު ކުރިން ވަރިވި ބަތަލާ އެމްބާ ހާޑަށް، ޑެޕް އަނިޔާކުރި ކަމަށް ބުނެ އިނގިރޭސި ނޫސް ސަން އިން ގެނެސްދިން ވާހަކަތަކަކާ ގުޅިގެން އެ ނޫހަށް ޑެޕް ކުރި ދައުވާ އޭނާ އަށް ނާކާމިޔާބުވެއްޖެ އެވެ.

"ސަން" ހިންގާ ނިއުސް ގްރޫޕް ނިއުސްޕޭޕާޒް އާއި ސަންގެ އެކްޒެކެޓިވް އެޑިޓަރު ޑޭން ވޫޓަނަށް ޑެޕް ދައުވާކުރީ އޭނާ އަކީ އަނބިމީހާ އަށް އަނިޔާކުރާ "ވައިފް ބީޓާ" އެއް ކަމަށް ސިފަކޮށް ހަގީގަތާ ހިލާފު ވާހަަތަކެއް ގެނެސްދީ އޭނާގެ އަބުރު ކަތިލާން މަސައްކަތްކުރި ކަމަށް ބުނެ އެވެ.

މިމައްސަލައިގެ އަޑުއެހުންތަކުގައި، މިދިޔަ ޖުލައި މަހުގެ ތެރޭގައި ވެސް ކޯޓްގައި ސަން އިން ބުނެފައި ވަނީ ޑެޕަކީ އަނބި މީހާ އަށް އަނިޔާކުރާ މީހެއް ކަމަށް ބުނީ އޭނާ އަކީ ހަމަ ހަގީގަތުގައި ވެސް އެފަދަ އަމަލުތައް ކޮށްފައިވާ މީހަކަށް ވާތީ ކަމަށެވެ. އަދި އޭނާއާ ބެހޭ ގޮތުން ހަގީގަތާ ހިލާފު އެއްވެސް ވާހަކަ އާންމުކޮށްފައި ނުވާނެ ކަމަށާއި ޑެޕާ ބެހޭ ގޮތުން އެމްބާ ކޯޓަށް ދީފައި ހުރި ބަޔާންތަކާއި ފޮޓޯތަކާއި އޯޑިއޯތަކާއި ޓެކްސްޓް މެސެޖްތަކުން ވެސް އެކަން ކަށަވަރު ވާނެ ކަމަށް ބުނެ ބުންޏެވެ. އެމްބާ ވަނީ ޑެޕް އޭނާ އަށް ތަކުރާރުކޮށް އަނިޔާކޮށް "މަރާލަން މަސައްކަތްކޮށްފައިވާ" ކަމަށް ވެސް ކޯޓުގައި ބުނެފަ އެވެ.

މި މައްސަލާގައި ހޯމަ ދުވަހު ސަންގެ ކޮޅަށް އިނގިރޭސިވިލާތުގެ ހައި ކޯޓުން މައްސަލަ ނިންމުމާ ގުޅިގެން، ޑެޕްގެ ވަރަށް ގިނަ ފޭނުން ވަނީ ކަންބޮޑުވުން ފާޅުކޮށްފަ އެވެ. އަދި އޭނާ އަށް އިންސާފު ހޯދައި ދޭން ގޮވާލައި މިހާރު އަންނަނީ #ޖަސްޓިސްފޯޖޯނީޑެޕްގެ ނަމުގައި ސޯޝަލް މީޑިއާގައި ކެމްޕޭން ވެސް ކުރަމުންނެވެ.

މައްސަލާގައި ހުކުމް އިއްވި ފަނޑިޔާރު އެންޑްރޫ ނިކޯލް ވިދާޅުވި ގޮތުގައި ޑެޕް ސަން އަށް ކުރި ދައުވާ ސާބިނުވާ ކަމަށް ނިންމީ މައްސަލާގައި ލިބުނު ހުރިހާ ހެކިތަކާއި ޑެޕާ ބެހޭ ގޮތުން ހުށަހެޅުނު 14 ހާދިސާއެއެއްގެ މައްޗަށް ރިއާޔަތްކޮށެވެ.

ޑެޕް، 57، ގެ ގާތުން ވަރިވާން ނިންމައި އެމްބާ، 34، ކޯޓަށް ދިޔައީ 2016 ވަނަ އަހަރުގެ މެއި މަހުގެ ތެރޭގަ އެވެ. އޭރު ކައިވެނި ރޫޅާލުމުގެ ބަދަލެއްގެ ގޮތުން ޑެޕްގެ އަތުން އެމްބާ އަށް ހަތް މިލިއަން ޑޮލަރު ވެސް ލިބުނެވެ.

ވަރީގެ މައްސަލަ އޭރު ހިނގަމުން ދަނިކޮށް އެމްބާ ޑެޕްގެ ގާތުން ވަރިވާން ނިންމީ ގެވެށި އަނިޔާކުރާ ކަމަށް ބުނެ އެވެ. އެ ތުހުމަތު ބޮލުގައި އެޅުވުމުން ޑެޕް ވަނީ މިދިޔަ އަހަރު އެމްބާ އަށް ދައުވާ ވެސް ކޮށްފަ އެވެ. "ޕައިރޭޓްސް އޮފް ކެރީބިއަން" ފަދަ ފިލްމުތައް ކުޅުނު ޑެޕަކީ ފަހަކަށް ރަލާއި މަސްތުވާތަކެތީގެ ޝިކާރައަކަށް ވެސް ވެފައިވާ މީހެކެވެ. އަދި އެކަންކަމަށް އޭނާ އެއްބަސްވެފައިވާ އިރު، ޒާތީ ދިރިއުޅުމުގައި ދިމާވެފައި ހުރި މައްސަލަތަކާ ހެދި ވަރަށް ގިނަ ފުރުސަތުތަކެއް ވެސް މި ފަހުން ގެއްލިފައިވެ އެވެ.