މޮނިޓަރިންގެ ހާލަތުގައި އޮތަސް ވެކްސިން ފުރިހަމަކުރި މީހުން ދޫކޮށްލަން ޖެހޭނެ، އެކަމަކު ދަތުރެއް ނުކުރެވޭނެ

މޮނިޓަރިންގެ ހާލަތުގައި އޮތް ރަށަކުން ވިޔަސް ވެކްސިންގެ ދެ ޑޯޒް ޖެހުމަށް ފަހު ޕީސީއާރު ޓެސްޓުގެ ނެގެޓިވް ނަތީޖާއާއެކު. ކަރަންޓީނުން ދޫކޮށްލަން ޖެހޭނެ ކަމަށް ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ) އިން މިއަދު ބުނެފި އެވެ.

ކޮވިޑު-19 އިން ދިފާއުވުމަށް ވެކްސިން ފުރިހަމަކުރި މީހުންނަށް ލުޔެއް ދޭނެ ކަމުގެ އިޝާރާތެއް ވެސް ނެތި ކުއްލިއަކަށް ބޮޑެތި ލުއިތަކެއް ދިން އިރު ވެކްސިން ފުރިހަމަކޮށްގެން އެތައް ބަޔަކު ރަށްރަށަށް ފުރައިގެން ގޮސް ކަރަންޓީނުގައި އެބަ ތިއްބެވެ. އެހެންވެ، އާއްމުންގެ ޝަކުވާތައް ބޮޑުވެފައި ވަނިކޮށް އެޗްޕީއޭއިން ވަނީ، ބަލިން ރައްކާތެރިވުމަށް ވެކްސިން ފުރިހަމަކުރިތާ 14 ދުވަސް ވެފައިވާ މީހުންނަށް މޮނިޓަރިންގެ ހާލަތުގައި ނެތް ރަށްރަށަށް ކަރަންޓީންވުމަކާ ނުލައި ދަތުރުކުރެވޭނެ ގޮތް ހަމަޖައްސައި އެކަން އިއުލާނުކޮށްފަ އެވެ.

އޭގެ ފަހުން އެ އެޖެންސީން އިއްޔެ ވަނީ ވެކްސިންގެ ދެ ޑޯޒް ޖެހިތާ 14 ދުވަސްވެފައިވާ މީހުން ކޮވިޑަށް ޓެސްޓުކޮށް ނަތީޖާ ނެގެޓިވްވުމުން ކަރަންޓީނުން ދޫކޮށްލަން އަންގައިފަ އެވެ.

ނަމަވެސް، އަތޮޅުތަކަށް ކަނޑައަޅާފައިވާ ފޯކަލް ޕޮއިންޓުންނަށް އެޗްޕީއޭއިން ފުރަތަމަ އެންގީ މޮނިޓަރިންގެ ހާލަތުގައި އޮންނަ ރަށްރަށުން އެ އުސޫލަށް އަމަލުކުރަން ނުޖެހޭނެ ކަމަށެވެ.

އެކަމާ ގުޅިގެން އެޗްއީއޯސީގެ އޮފިޝަލަކު "މިހާރު" އަށް ވިދާޅުވީ އެއީ ކަރަންޓީނުގެ ލުޔާ ގުޅޭގޮތުން އެންމެ ފުރަތަމަ ނިންމި ގޮތް ކަމަށެވެ. އޭރު ވެސް އޮޅުންތަކެއް ހުރީ ނެގެޓިވް ނަތީޖާއާއެކު ކަރަންޓީނުން ދޫކޮށްލުމުން އެހެން ރަށަކަށް ދެވޭނެ ގޮތާ ގުޅޭގޮތުން ކަމަށް އޭނާ ވިދާޅުވި އެވެ.

"ވެކްސިންގެ ދެ ޑޯޒް ޖެހިތާ 14 ދުވަސް ހަމަވެފައިވާ ނަމަ މޮނިޓަރިންގެ ހާލަތުގައި ރަށެއް އޮތަސް ނެގެޓިވް ޕީސީއާރާއެކު ކަރަންޓީނުން ދޫކޮށްލެވޭނެ. އެކަމަކު އެ މީހަކަށް އެއް ރަށުން އަނެއް ރަށަށް ދަތުރެއް ނުކުރެވޭނެ،" އޮފިޝަލް ވިދާޅުވި އެވެ.

އެ މީހުންގެ އިތުރުން، ރާއްޖެއިން ބޭރުން އައިސް މި ވަގުތު ކަރަންޓީނުގައި ތިބި މީހުންގެ ތެރެއިން ޑަބްލިއުއެޗްއޯއިން އިމަޖެންސީ ޔޫސް ލިސްޓުގައި ހިމަނާފައިވާ ކޮވިޑް ވެކްސިން ފުރިހަމަ ކުރި މީހުންނަށް ވެސް ލުއި ދީފައި ވެ އެވެ.

ވެކްސިން ފުރިހަމަ ކުރި މީހުންނަށް ކަރަންޓީނު ނުވެ، ދަތުރުކުރެވޭނީ އެ މީހަކު ދަތުރުކުރާ ތަނެއްގައި ޕޮޒިޓިވިޓީ ރޭޓް ފަހަކަށް ވުރެ ދަށް ނަމަ އެވެ. މި ވަގުތު މާލޭގެ ޕޮޒިޓިވިޓީ ރޭޓު ވެސް ފަހަކުން ދަށުގައި ހުރުމާ ގުޅިގެން، މޮނިޓަރިންގައި ނެތް ރަށްރަށްރަށް ވެކްސިން ފުރިހަމަ ކުރި މީހުންނަށް ކަރަންޓީވުމެއް ނެތި މާލެ އިން ދަތުރުކުރެވޭނެ އެވެ.