އީދު ބަންދަށް މޯލްޑިވިއަންގެ ފްލައިޓްތަކަށް ބާރު ބޮޑުވެއްޖެ

އީދު ޗުއްޓީއަށް ގިނަ ބަޔަކު ރަށްރަށަށް ދަތުރު ކުރަން ފެށުމުން ޑޮމެސްޓިކް ފްލައިޓްތަކަށް ބާރު ބޮޑުވެއްޖެ އެވެ.

މޯލްޑިވިއަން އިން ބުނީ އެންމެ ބާރު ބޮޑުވީ އުތުރެގެ ރަށްތަކަށް ދަތުރުކުރާ ފްލައިޓްތަކަށް ކަމަށެވެ. އެގޮތުން ހއ. ހޯރަފުއްޓާއި ހދ. ހަނިމާދުއަށް ދަތުރުކުރާ މީހުން ވަރަށް ބޮޑަށް އިތުރުވެފައިވާ ކަމަށް ބުންޏެވެ.

ގައުމީ އެއާލައިން މޯލްޑިވިއަން ހިންގާ އައިލެންޑް އޭވިއޭޝަންގެ ޕަބްލިކް ރިލޭޝަންސް މެނޭޖަރު މޫސާ ވަސީމް ވިދާޅުވީ ހުރިހާ ޑޮމެސްޓިކް މަންޒިލްތަކަށް ވެސް ފްލައިޓްތައް އިތުރުކޮށްފައިވާ ކަމަށާއި ގިނަ ފްލައިޓްތައް މިހާރު ވެސް ފުލްވެފައިވާ ކަމަށެވެ.

ކޮވިޑް ފެތުރޭތީ މިދިޔަ އަހަރުގެ އީދުގައި މާލެ ސަރަހައްދު އޮތީ ލޮކްޑައުންކޮށްފަ އެވެ. އަދި ދަތުރުކުރުމުގައި ފިޔަވަޅުތައް ވަރުގަދަކޮށްފައިވެ އެވެ. ކޮވިޑް ކޮންޓްރޯލްކުރަން އެޅި ފިޔަވަޅުތަކަށް ފަހު ފަސޭހައިން ރަށްރަށަށް ދަތުރުކުރެވޭ ގޮތް ވުމުން އެތައް ބަޔަކު މިހާރު ވެސް ރަށްރަށަށް ގޮސްފައިވެ އެވެ.

އަތޮޅުތެރޭގެ 15 މަންޒިލަކަށް މޯލްޑިވިއަން އިން ދަތުރުކުރެ އެވެ.

ކޮވިޑްގެ ސަބަބުން ދަތުރުތައް ވަރަށް ބޮޑަށް މަދުވެފައި އޮތުމަށް ފަހު މިއީ މިހާ ބޮޑަށް ޑިމާންޑް އުފުލުނު ފުރަތަމަ ފަހަރެވެ.