އޮލިމްޕަހުގެ ގަސްތައް ކެނޑީ އިމާރާތް ހަލާކުވާތީ އީޕީއޭގެ ހުއްދަ ހޯދައިގެން: އެންސީއޭ

ހުސްނުހީނާ މަގަށްވާ ގޮތަށް އޮލިމްޕަސް ސިނަމާގެ ގޯތިތެރޭގައި ހައްދާފައި ހުރި ބިޔަ ގަސްތައް ކަނޑާލީ އޮލިމްޕަސް އިމާރާތަށް ގެއްލުންވާތީ، އީޕީއޭގެ ހުއްދަ ލިބިގެން ކަމަށް ނޭޝަނަލް ސެންޓަ ފޯ ދި އާޓްސް (އެންސީއޭ) އިން ބުނެފި އެވެ.

އެންސީއޭ އިން މިހެން ބުނީ މި ގަސްތައް ކަނޑާލުމާ ގުޅިގެން ސޯޝަލް މީޑިއާގައި ގިނަ ބަޔަކު ފާޑުކިޔަމުން ދަނިކޮށެވެ.

އޮލިމްޕަސް ބަލަހައްޓަމުން އަންނަ އެންސީއޭ އިން ބުނީ އެ ގަސްތައް ކަނޑާލަން ޖެހުނީ އެ ގަސްތަކުގެ މޫތަކުގެ ސަބަބުން އިމާރާތަށް ބޮޑެތި ގެއްލުންތަކެއް ވަމުންދާތީ ކަމަށެވެ. އަދި އެ ގަސްތައް ކެނޑުމަށް ބޭނުންވާ ހުއްދަ ވެސް އީޕީއޭ އިން ހޯދާފައި ވާނެ ކަމަށް އެންސީއޭ އިން ކުރި ޓުވީޓެއްގައި ބުންޏެވެ.

"އީޕީއޭގެ ލަފައާ އެއްގޮތަށް މި ގަސްތަކުގެ ބަދަލުގައި އިތުރު ގަސް އިންދުމަށް ވަނީ ހަމަޖެހިފައި،" އެންސީއޭ އިން ބުންޏެވެ.

މިކަމަށް ވެސް ފާޑުކިޔައި ބައެއް މީހުން ބުނެފައި ވަނީ މައްސަލަ އަކީ ގަސްތައް ނޫން ކަމަށާއި ގަސް ކަނޑަންޖެހުމުގެ މި ކަހަލަ މައްސަލަތައް ކުރިމަތިވަނީ، އެއްވެސް ޕްލޭނެއް ނެތި އިހު ޒަމާނުއްސުރެ ތަންތަން އިމާރާތް ކުރުމުގެ ސަގާފަތެއް އޮތުމުން ކަމަށެވެ.

މި ގަސްތައް ކަނޑާލިއިރު، އެންސީއޭ އިން އަންނަނީ މިދިޔަ އަހަރު ފެށިގެން އޮލިމްޕަސް އިމާރާތް އަލުން މަރާމާތުކުރުމުގެ މަސައްކަތް ކުރަމުންނެވެ. ކޮވިޑް ފެތުރޭތީ ބަންދުކުރި ގޮތަށް، ރާއްޖޭގައި ހުރި އެންމެ ބޮޑު އެ ސިނަމާ ހުރީ މިއަދާ ހަމަ އަށް ވެސް ބަންދުކޮށްފަ އެވެ.

ރައީސް އިބްރާހިމް ނާސިރުގެ ވެރިކަމުގައި އިމާރާތްކުރި، ޒަމާންވީ އޮލިމްޕަސް އިމާރާތް މީގެ ކުރިން ވެސް އެއް ފަހަރަކު ވަރަށް ބޮޑަށް މަރާމާތުކޮށްފައި ވެ އެވެ. ގިނަ ފަންނާނުންތަކެއްގެ އެދުމުގެ މަތިން އެކަން ކުރީ 2011 ވަނަ އަހަރު ރައީސް ނަޝީދުގެ ވެރިކަމުގަ އެވެ.