ހުރާފަރުގެ އެއްބަސްވުން ބާތިލްކޮށް، ރަށް އަތުލީ ރަނގަޅަށް: ސުޕްރީމް ކޯޓް

ރިސޯޓް ހަދަން ދޫކުރި ބ. ހުރާފަރުގެ އެއްބަސްވުން ބާތިލްކޮޮށް، ސަރުކާރުން އެތަން އަތުލީ ރަނގަޅަށް ކަމަށް ސުޕްރީމް ކޯޓުން ހުކުމްކޮށްފި އެވެ.

އަތަމާ މެރިން އިންޓަނޭޝަނަލްއަށް 2013 ގައި ސަރުކާރުން ދޫކުރި ހުރާފަރުގެ އެއްބަސްވުން ސަރުކާރުން ބާތިލްކޮށް، އެރަށް 2016 ވަނަ އަހަރު ސަރުކާރުން އަތުލީ އެރަށަށް ދައްކަންޖެހޭ ކުލި އަތަމާ އިން ނުދައްކާ ކަމަށް ބުނެ އެވެ. އެކަމަކު އަތަމާ އިން ބުނެފައިވަނީ ކުލި ނުދެއްކި އޮތީ ސަރުކާރުން އެ ރަށުގެ ބޮޑުމިން ބެލުމަށްފަހު ކުލީގެ ގޮތުގައި ދައްކަންޖެހޭ އަދަދެއް އަންގާފައި ނުވާތީ ކަމަށެވެ. ސިވިލް ކޯޓުން ނިންމީ އެރަށް އަތުލީ ގާނޫނާ އެއްގޮތަށް ކަމަށެވެ. އެކަމަކު ހައި ކޯޓުން ނިންމާފައިވަނީ އެރަށް އަތުލީ ގޯސްކޮށް ކަމަށެވެ.

ހައި ކޯޓުގެ ހުކުމް ދައުލަތުން އިސްތިއުނާފް ކުރުމުން ސުޕްރީމް ކޯޓުން ކުރި ހުކުމުގައިވަނީ ރިސޯޓް ހަދަން ދޫކުރާ ރަށްރަށުގެ ކުލި ކަނޑައެޅުމަށްޓަކައި، ރަށުގެ ބޮޑުމިން ބެލުމުގެ ޒިންމާ އޮންނާނީ ރަށް ކުއްޔަށް ހިފާ ފަރާތަށް ކަމަށެވެ. ކުރިން އަމަލު ކުރަމުން ދިޔައީ ވެސް އެގޮތަށް ކަމަށް އެ ހުކުމުގައިވެ އެވެ. އަދި ކުލި ދެއްކުމަށްޓަކައި ރަށުގެ ބޮޑުމިން ބެލުމަކީ އަތަމާގެ ޒިންމާއެއް ކަމަށްވާތީ އެހެންވެ، ސަރުކާރުން އެރަށުގެ އެއްބަސްވުން ބާތިލްކުރީ ރަނގަޅަށް ކަމަށް ތިން ފަނޑިޔާރުންގެ އިއްތިފާގުން އެ ހުކުމުގައިވެ އެވެ.

އެ މައްސަލަ ބެއްލެވީ ފަނޑިޔާރު ހުސްނުއްސުއޫދާއި ފަނޑިޔާރު އަލީ ރަޝީދު ހުސައިންގެ އިތުރުން ފަނޑިޔާރު ޑރ. މުހައްމަދު އިބްރާހިމެވެ.

ހުރާފަރުގެ އެއްބަސްވުން ސަރުކާރުން ބާތިލް ކުރުމަށްފަހު ރިސޯޓް ހެދުމަށްޓަކައި އެހެން ކުންފުންޏަކަށް ސަރުކާރުން ދޫކުރި އެވެ.