ރާއްޖެ އަލުން އަބޫދާބީގެ ގްރީން ލިސްޓަށް

އަބޫދާބީގެ ގްރީން ލިސްޓުން ރާއްޖެ އުނިކުރިތާ ދެ ހަފުތާ ފަހުން އަނެއްކާ ވެސް އެ ލިސްޓުގައި ރާއްޖެ ހިމަނައިފި އެވެ.

މި ގެނައި ބަދަލާ އެކު މާދަމާއިން ފެށިގެން، ރާއްޖެއިން އަބޫދާބީއަށް ދާ އެއްވެސް މީހަކު ކަރަންޓީން ވާކަށް ނުޖެހޭނެ އެވެ.

އެ ގައުމުން ރާއްޖެއަށް ލުއި ދޭން ނިންމީ ރާއްޖޭގެ ކޮވިޑް-19ގެ ހާލަތު ރަނގަޅުވެފައިވާތީ އެވެ. އެ ގައުމުގެ ގްރީން ލިސްޓު ކޮންމެ ދެ ހަފުތާއަކުން އަންނަނީ ރިވިއު ކުރަމުންނެވެ.

ރާއްޖޭގެ އިތުރުން 58 ގައުމެއް ވަނީ ލިސްޓުގައި ހިމަނައިފަ އެވެ. ރާއްޖެއަކީ މި ލިސްޓުގައި ހިމެނޭ ދެކުނު އޭޝިއާގެ ހަމައެކަނި ގައުމެވެ.

އަބޫދާބީގެ ގްރީން ލިސްޓުގައި ރާއްޖެ ހިމެނުމުން ރާއްޖޭގެ ޓޫރިޒަމަށް ވަރަށް ބޮޑު ފައިދާއެއް ކުރާނެ އެވެ. އެ ގައުމުގެ ޓޫރިސްޓުންގެ އިތުރުން ދެކުނު އޭޝިއާއިން އެ ގައުމަށް ދާން ބޭނުންވާ މީހުން ވެސް ކަރަންޓީން މުއްދަތު ހަމަކުރަން ރާއްޖެ އަންނާނެ އެވެ. މިހާރު ވެސް ދުބާއީ އާއި ސައުދީއަށް ދާން ކަރަންޓީން ވާން ގިނަ ޓޫރިސްޓުންތަކެއް ރާއްޖެ އާދެ އެވެ.