އެޗްއައިވީ ޖެހުމުން "ވަކިކުރި" މީހާއަށް ދޭންޖެހުނު ބަދަލު ސުޕްރީމް ކޯޓުން ކުޑަކޮށްފި

އެޗްއައިވީއަށް ޕޮޒިޓިވްވުމުން ވަޒީފާ ގެއްލުނު މީހަކަށް ބަދަލުގެ ގޮތުގައި ދޭންޖެހުނު ބަދަލުގެ އަދަދު ސުޕްރީމް ކޯޓުން ކުޑަކޮށްފި އެވެ.

މެގަ މޯލްޑިވްސްގެ ފްލައިޓް އެޓެންޑެންޓެއްގައިި ގޮތުގައި މަސައްކަތް ކުރި މުވައްޒަފަކު 2012 ވަނަ އަހަރު އެޗްއައިވީއަށް ޕޮޒިޓިވްވުމުން ވަޒީފާއިން އެކަހެރިކޮށްފައި ބެހެއްޓުމަށްފަހު ވަޒީފާގެ އެއްބަސްވުމުގެ މުއްދަތު ހަމަވުމުން ވަޒީފާގެ އެއްބަސްވުން އާ ކޮށްދޭން އެ ކުންފުނިން އިންކާރު ކުރުމުން އޭނާގެ ވަޒީފާ ގެއްލުނެވެ. އެ މައްސަލާގައި ވަޒީފާއާބެހޭ ޓްރައިބިއުނަލާއި ހައި ކޯޓުން ނިންމާފައި އޮތީ އޭނާގެ ވަޒީފާގެ އެއްބަސްވުން އާ ނުކުރީ ވަޒީފާއާބެހޭ ގާނޫނާ ޚިލާފަށް ކަމަށެވެ. އޭނާގެ ނަން އާންމު ނުކުރީ އެއީ މަނާ ކަމަކަށް ވާތީ އެވެ.

އޭނާ އަލުން އެ ވަޒީފާ އަދާކުރަން ބޭނުން ނުވާތީ ބަދަލެއްގެ ގޮތުން ތިން އަހަރުގެ މުސާރަ އާއި އިނާޔަތްތައް ނަގައިދޭން އެދުމުން ޓްރައިބިއުނަލާއި ހައި ކޯޓުން ވެސް މައްސަލަ ނިންމީ ތިން އަހަރުގެ މުސާރަ އާއި އިނާޔަތްތައް އޭނާއަށް ދިނުމަށެވެ.

އެ މައްސަލަ މެގަ މޯލްޑިވްސްގެ ފަރާތުން އިސްތިއުނާފް ކުރުމުން ސުޕްްރީމް ކޯޓުން މިދިޔަ ބުދަ ދުވަހު ކުރި ހުކުމުގައިވަނީ އެ މީހާއަށް ތިން އަހަރުގެ މުސާރަ އާއި އިނާޔަތްތައް ދޭން ޓްރައިބިއުނަލްގެ ނިންމުމުގައި އޮތަސް، އެންމެ އަދުލުވެރި ގޮތަކީ އެއް އަހަރުގެ މުސާރަ އާއި އިނާޔަތްތައް ދިނުން ކަމަށް ޓްރައިބިއުނަލްގެ ނިންމުމުގައި ވެސް އެބައޮތް ކަމަށެވެ. އަދި ފަހުން ސުޕްރީމް ކޯޓުން ނިންމާފައިވާ މައްސަލަތަކަށް ބަލާއިރު، އެއް އަހަރުގެ މުސާރަ އާއި އިނާޔަތްތަކަކީ އަދުލުވެރި ބަދަލެއް ކަމަށް ބެލެވޭ ކަމަށް އެ ހުކުމުގައިވެ އެވެ.

އެ މައްސަލަ ބެެއްލެވި ތިން ފަނޑިޔާރުންގެ އިއްތިފާގުން ކުރެއްވި ހުކުމުގައިވަނީ އެ މީހާއަށް ބަދަލު ދޭންޖެހޭނެ ކަމަށް ޓްރައިބިއުނަލުން ނިންމި ނިންމުން ރަނގަޅު ކަމަށެވެ. އެކަމަކު ބަދަލުގެ ގޮތުގައި ދޭން ޖެހޭނީ އެއް އަހަރުުގެ މުސާރަ އާއި އިނާޔަތްތައް ކަމަށް އެ ހުކުމުގައިވެ އެވެ.

ސުޕްރީމް ކޯޓުން އެ މައްސަލަ ބެއްލެވީ އުއްތަމަ ފަނޑިޔާރު އަހުމަދު މުއުތަސިިމް އަދުނާނާއި ފަނޑިޔާރު މަހާޒް އަލީ ޒާހިރުގެ އިތުރުން ފަނޑިޔާރު އަޒްމިރަލްދާ ޒާހިިރެވެ. އެ ބެންޗުގެ ރިޔާސަތު ބެލެހެއްޓެވީ އުއްތަމަ ފަނޑިޔާރެވެ.

އޭނާ ވަޒީފާއިން ވަކިކުރީި ގާނޫނާ ޚިލާފަށް ކަމަށް ޓްރައިބިއުނަލާއި ހައި ކޯޓުން ނިންމާފައިވަނީ އެޗްއައިވީއަށް އޭނާ ޕޮޒިޓިވްވިޔަސް، ސިވިލް އޭވިއޭޝަންގެ މެޑިކަލް ޓެސްޓްތަކުން އޭނާ ފާސްވެފައި އޮތުމުންނާއި އޭނާގެ ކިބައިން އެހެން މީހެއްގެ ގަޔަށް ބަލި އެރުމުގެ ފުރުސަތު ނެތް ކަމަށް ޑޮކްޓަރުގެ ލިޔުންތަކުގައި އޮތުމުންނެވެ. އެހެންވެ، އެއީ އޭނާއާ މެދު ތަފާތުކޮށް އަމަލު ކުރަންޖެހޭ މަގްބޫލު އުޒުރެއް ނޫން ކަމަށް ޓްރައިބިއުނަލާއި ހައި ކޯޓުން ވެސް ނިންމާފައިވެ އެވެ.