އަލިފާނުގެ ހާދިސާގައި ޒަހަމްވި ސިފައިންގެ މީހާގެ ހާލު ރަނގަޅު: އެމްއެންޑީއެފް

މއ. ކަފިދޫގޭގައި މިދިޔަ ހޯމަ ދުވަހު ރޯވި އަލިފާންގަނޑު ނިއްވާލުމުގެ ތެރޭގައި ޒަހަމްވި ސިފައިންގެ މީހާގެ ހާލު ރަނގަޅުވަމުން އަންނަކަމަށް އެމްއެންޑީއެފުން މިއަދު ބުނެފި އެވެ.

އެމްއެންޑީއެފްގެ މީޑިއަ އޮފިޝަލް މޭޖާ އަދުނާން މުހައްމަދު ވިދާޅުވީ އެ ހާދިސާގައި ޒަހަމްވި ސާޖަންޓް އަހުމަދު ސަމްޝާދަށް ސްރީ ލަންކާގައި ފަރުވާދެމުން އަންނަނީ މޫނު މައްޗަށް ބިއްލޫރިގަނޑެއް ވެއްޓިގެން ލިބުނު ޒަހަމްތަކަށެވެ.

ސަމްޝާދުގެ ހާލު އޭރު ސީރިއަސް ނޫން ނަމަވެސް މޫނަށް ލިބުނު ގެއްލުމުގެ ސަބަބުން ހާލު ގޯސްވެދާނެ ކަމަށް އައިޖީއެމްއެޗުން ބުނެފައިވެ އެވެ. އެހެންކަމުން އިތުރުފަރުވާއަށް އޭނާ ހަމަ އެ ރޭ ލަންކާ އަށް ގެންދިޔަ އެވެ.

ސަމްޝާދުގެ އިތުރުން ސިފައިންގެ އެހެން މީހަކަށް ވެސް ކުދިކުދި ގެއްލުންތަކެއް ލިބުނެވެ. އެކަމަކު އައިޖީއެމްއެޗުގައި ފަރުވާ ދިނުމަށް ފަހު ވަނީ ދޫކޮށްލައިފަ އެވެ.