މަސްދަރު ހާމަކުރުމާ ގުޅޭ މާއްދާ ހެއްކާ ބެހޭ ބިލުން އުނިކުރަން އެމްއެމްސީން ގޮވާލައިފި

ސަރުކާރުން ރައްޔިތުންގެ މަޖިލީހަށް ހުށަހަޅާފައިވާ ހެއްކާ ބެހޭ ބިލުގައި، ނޫސްވެރިން، އެ މީހުން މައުލޫމާތު ހޯދި މަސްދަރު ހާމަކުރަން މަޖުބޫރުކުރެވޭ ގޮތަށް މާއްދާއެއް އޮތުމުން، ބިލުން އެ މާއްދާ އުނިކުރަން މޯލްޑިވްސް މީޑިއާ ކައުންސިލް (އެމްއެމްސީ)އިން ގޮވާލައިފި އެވެ.

އެމްއެމްސީން މިއަދު ނެރުނު ބަޔާނެއްގައި ބުނީ، ހެއްކާ ބެހޭ ބިލުގައި މަސްދަރު ހާމަކުރަން ޖެހޭ ގޮތަށް މާއްދާ ހިމަނައިގެން ބިލު ފާސްކޮށްފި ނަމަ އެއީ ގާނޫނުއަސާސީން ލިބިދޭ ނޫސްވެރިކަމުގެ ހައްގު ނިގުޅައިގަނެވުން ކަމަށެވެ. އަދި އެ މާއްދާގެ ބޭނުން ނަހަމަ ގޮތުގައި ބޭނުން ކުރުމުގެ ފުރުސަތު ވެސް ހުޅުވިގެންދާނެ ކަމަށް ބަޔާނުގައި ވެ އެވެ.

"މޯލްޑިވްސް މީޑިއާ ކައުންސިލުން ދެކޭ ގޮތުގައި މި މާއްދާ މިހެން އޮވެ، ބިލު ފާސްވެއްޖެ ނަމަ ގާނޫނުއަސާސީން ލިބިދީފައިވާ ނޫސްވެރިކަމުގެ މިނިވަންކަމުގެ ހައްގު ނިގުޅައިގަނެވި މަސްދަރު ހާމަކުރުމަށް މި މާއްދާ ނަހަމަގޮތުގައި ބޭނުން ކުރުމުގެ ފުރުސަތު ހުޅުވިގެންދާނެ އެވެ. މިއީ މި ކައުންސިލުން ނުހަނު ކަންބޮޑުވާ ކަމެކެވެ." މީޑިއާ ކައުންސިލުގެ ބަޔާނުގައިވެ އެވެ.

ނޫސްވެރިކަަމުގެ ކުރިއެރުމަށް ހުރަސްއެޅިދާނެ އެއްވެސް ކަމެއް ކުރުމަކީ ޕްރެސް ފްރީޑަމް އިންޑެކްސްގައި ރާއްޖެ ހޯދަމުންދާ ކުރިއެރުންތައް ހުއްޓިދާނެ އަދި އެކަން މުޅި ދުނިޔޭގެ ސަމާލުކަމަށް އައިސް ބައިނަލްއަގުވާމީ އެތައް ގޮންޖެހުންތަކެއް ކުރިމަތިވެދާނެ ކަމެއް ކަމަށް އެ ކައުންސިލުން ބުންޏެވެ. ރައީސް އަބްދުﷲ ޔާމީން ތަސްދީގު ކުރެއްވި އަބުރު ރައްކާތެރިކުރުމާއި ހިޔާލުފާޅުކުރުމުގެ މިނިވަންކަމުގެ ގާނޫނުގެ ސަބަބުން ދިމާވި ކަންކަން އެކަމުގެ މިސާލެއްގެ ގޮތުގައި އެ ކައުންސިލުން ނެގި އެވެ. އަދި ގޮވާލީ އެ މާއްދާ ބިލުން އުނި ކުރުމަށެވެ.

"އަބުރު ރައްކާތެރިކުރުމާއި ހިޔާލުފާޅުކުރުމުގެ މިނިވަންކަމުގެ ގާނޫނު ވުޖޫދަށް އައުމުގެ ސަބަބުން ދިވެހިރާއްޖޭގެ މީޑިއާގެ ދާއިރާ އަށް ލިބިގެންދިޔަ ގެއްލުންތަކުން ފިލާވަޅު ލިބިގަނެ، ހެއްކާ ބެހޭ ބިލުން ވެސް މި ފާހަގަ ކުރެވުނު ބައިތައް އުނިކުރުމަށް މި ކައުންސިލުން ސަރުކާރާއި ރައްޔިތުންގެ މަޖިލީހަށް ގޮވާލަމެވެ."

ސަރުކާރުގެ ފަރާތުން ތިނަދޫ އުތުރު ދާއިރާގެ މެމްބަރު އަބްދުލް މުޣުނީ ހުށަހެޅުއްވި ހެއްކާ ބެހޭ ބިލުގެ އެ މާއްދާއާ ގުޅިގެން މަޖިލީހުގެ ކަމާ ބެހޭ ކޮމިޓީއާ ބައްދަލު ކުރަން ނިންމާފައިވާ ކަމަށާއި، އެ މާއްދާ އިސްލާހު ކުރަން ކުރެވެން ހުރި ކަންކަން ކުރާނެ ކަމަށް ވެސް ބުނެފައިވެ އެވެ.

މަސްދަރު ހާމަ ކުރަން ޖެހޭނެ ހާލަތް ބަޔާން ކުރަނީ ހެއްކާ ބެހޭ ބިލުގެ 136 ވަނަ މާއްދާގަ އެވެ. އެ މާއްދާގެ (ހ) ގައި އޮތީ މަސްދަރު ހާމަކުރުމުގެ ސަބަބުން، އެ މީހާ އަށް ނުވަތަ އެހެން ފަރާތަަކަށް ވެސް ވެދާނެ ގެއްލުމަށް ވުރެ، މަސްދަަރު ހާމަކުރުމުގެ އާއްމު މަސްލަހަތު ބޮޑުވާ ހާލަތުގައި މަސްދަރު ހާމަކުރަން މަޖުބޫރުކުރެވިދާނެ ކަމަށެވެ.

މަސްދަރު ހާމަކުރަން ނޫސްވެެރިޔާއަަށާއި އޭނާ މަސައްކަތްކުރާ މީޑިއާ އަށް މަޖުބޫރުކުރުމުގެ ބާރު ވެެސް އެ މާއްދާއިން ފަނޑިޔާރުންނަށް ލިބިދެ އެވެ.