ކްލަބް މޯލްޑިވްސް: ޗެމްޕިއަން ބީއެމްއެލް ޔަގީންކަމުގައި، އެޗްޑީސީން ބުނަނީ ބަލިކުރެވޭނޭ

އާދިއްތަ ދުވަހު ކްލަބު މޯލްޑިވްސް ފުޓްބޯޅަ މުބާރާތުގެ ފުރަތަމަ މެޗުގައި ޗެމްޕިއަން ޔުނައިޓެޑް ބީއެމްއެލް އާއި އެޗްޑީސީ ބައްދަލުކުރާއިރު ދެ ޓީމުން ވެސް ޔަގީންކަމާ އެކު ވާހަކަ ދައްކައިފި އެވެ.

ކޮވިޑާ ހެދި މިދިޔަ އަހަރު މުބާރާތް މެދުކެނޑުމަށް ފަހު އަލުން ފަށާއިރު ބީއެމްއެލްގެ ކޯޗް އިސްމާއީލް އަނިލް ބުނީ ޗެމްޕިއަންކަން ހޯދި ޓީމުގައި އަދިވެސް ބީއެމްއެލްގައި އެބަ އޮތް ކަމަށެވެ. ޓީސީ ސްޕޯޓްސް ކްލަބަށް ކުރިން ކުޅުނު އިޝާން އިބްރާހިމް (ސައްޓު) ލީޑް ކުރާ ޓީމަށް މަޝްހޫރު ފުޓްސަލް ކުޅުންތެރިޔާ ހުޒައިފަތު ރަޝީދު (ހުޒޭ) ވަނީ އިތުރުކޮށްފަ އެވެ.

ހުޒޭ ފިޔަވައި ބެންކް ޓީމުގައި ދެން ހިމެނޭ ކުޅުންތެރިންނަކީ މުޅިން ވެސް ބެންކްގެ އެކި ޑިޕާޓްމެންޓްތަކުގެ މުވައްޒަފުންނެވެ. އެންމެ ފަހުގެ މުބާރާތް ބީއެމްއެލް އަށް ހޯދައިދިން ކޯޗް އަނިލް ބުނީ މިފަހަރު ވެސް ޗެމްޕިއަންކަން ދިފާއުކުރުމުގެ ފެންވަރު ބީއެމްއެލް ޓީމުގައި އެބަހުރި ކަމަށެވެ.

"އަނެއްކާ ހުޒޭ ޓީމަށް އިތުރުވި ހިސާބުން މި ޓީމު އިތުރަށް ވަރުގަދަ ވެއްޖެ،" ކުރީގެ ފުޓްބޯޅަ ލެޖެންޑް އަނިލް ބުންޏެވެ. "އަޅުގަނޑުމެން ކުޅުނު ޕްރެކްޓިސް މެޗުތަކުގައި އެކަން ވަރަށް ބޮޑަށް ފާހަގަވި. ގައިމު ވެސް ޓީމު އޮތީ ވަރަށް ރަަނގަޅު ރޫހެއްގައި."

މުބާރާތުގެ ފުރަތަމަ މެޗުގައި އާދިއްތަ ދުވަހުގެ ރޭ ބީއެމްއެލް ނުކުންނާނީ އެޗްޑީސީއާ ދެކޮޅަށެވެ. އެޗްޑީސީ ޓީމު އެކުލަވާލާފައި ވަނީ މުޅިން ވެސް އެ ކުންފުނީގެ މުވައްޒަފުން ހިމަނައިގެންނެވެ. އެކަމަކު ފުޓްސަލް އަށް މަޝްހޫރު ނަންތަކެއް އެ ޓީމުގައި ވެސް ހިމެނެ އެވެ. އޭގެ ތެރެއިން އެންމެ ފާހަގަކުރެވޭ ކުޅުންތެރިޔަކީ ކުރިން ފުރަތަމަ ޑިވިޝަންގައި ވިކްޓަރީ ސްޕޯޓްސް ކްލަބަށް ފުޓްބޯޅަ ވެސް ކުޅުނު މުހައްމަދު ލިޔާހް އެވެ. އަދި ކުރިން ކްލަބު އީގަލްސްގެ ޔޫތު ޓީމަށް ކުޅުނު އިސްމާއީލް ވިފާގް ވެސް އެޗްޑީސީ ޓީމުގައި ހިމެނެ އެެވެ.

އެޗްޑީސީގެ ހުރިހާ ވިސްނުމެއް ބީއެމްއެލް ބަލިކުރަން

އެޗްޑީސީގެ ކޯޗް އިސްމާއީލް ޝަރީފް ބުނީ، މުބާރާތުގެ ގުރު ނެގި ހިސާބުން އޭނާގެ ޓީމު ތައްޔާރުވަމުން ދަނީ ބީއެމްއެލް ބަލިކުރަން ކަމަށެވެ. އޭނާ ބުނީ އެޗްޑީސީ ވިސްނާނީ މެޗަކަށް ފަހު މެޗަކުން ކަމަށެވެ.

"ގުރު ނެގި ހިސާބުން އަޅުގަނޑުމެންގެ ފޯކަސް ބަދަލުކުރީ ބީއެމްއެލްގެ މެޗަށް. ގުރޫޕްގައި ދެން ކުޅެން އޮތް އެއްވެސް މެޗަކާ މެދު ނުވިސްނަން. އެއިން މެޗަކާ މެދު ވިސްނާނީ ބީއެމްއެލް މެޗަށް ފަހު،" އިއްސެ ބުންޏެވެ.

"ބީއެމްއެލް ވަރުގަދަ ޓީމެއް. ޗެމްޕިއަން ޓީމުގެ ވާހަކަ މި ދައްކަނީ. އެ ޓީމު ބަލިކުރަން އުނދަގޫ ވެސް ވާނެ. އެކަމަކު އަޅުގަނޑުމެން ޓީމުގައި އެބަހުރި އެ ޓީމު ބަލިކުރުމުގެ ފެންވަރު."

ރާއްޖޭގައި ބާއްވާ އެންމެ ދުވަސްވީ ފުޓްސަލް މުބާރާތުގެ މި ފަހަރުގެ އެޑިޝަން ކުރިއަށް ދާނީ ހުޅުމާލޭގެ ފުޓްސަލް ދަނޑުތައް ހިމެނޭ ސަރހައްދުގައި އޮންނަ ދެ ދަނޑުގަ އެވެ. ދެ ދަނޑުގައި ވެސް މެޗުތައް ކުޅޭނެ އެވެ. މުބާރާތުގެ 42 މެޗު ޔެސް ޓީވީން ވަގުތުން ދައްކާނެ އެވެ.

މުބާރާތުގެ އަންހެން ޑިވިޝަން. "18/30 ވިމެން ފުޓްސަލް ފިއެސްޓާ"ގެ މެޗުތައް ވެސް އާދިތައް ދުވަހުގެ ރޭ ފަށާނެ އެވެ. އަންހެން ޑިވިޝަންގެ ފުރަތަމަ މެޗުގައި ބައްދަލުކުރާނީ އެމްޕީއެލް އާއި ޓީމް ފެނަކަ އެވެ. ދެ މެޗު ވެސް ފަށާނީ އާދިއްތަ ދުވަހުގެ ރޭ 8:15 ގަ އެވެ