"އިންޑިއާ އައުޓް" ކެމްޕެއިން ވަރުގަދަ ކުރަން ޔާމީން އަންގަވައިފި

ރާއްޖޭގައި ތިބޭ އިންޑިއާގެ ސިފައިން ރާއްޖެ ދޫކޮށް ދިއުމަށް ގޮވާލައި، އިދިކޮޅުން އިސްވެ ފަށާފައިވާ ހަރަކާތް ވަރުގަދަ ކުރަން ކުރީގެ ރައީސް އަދި އިދިކޮޅު ލީޑަރު އަބްދުﷲ ޔާމީން އެދިވަޑައިގެންފި އެވެ.

ޕީޕީއެމްގެ ނައިބު ރައީސް އަހުމަދު ޝިޔާމް "މިހާރު" ގެ "މެދުސަފުހާ" އަށް ދެއްވި އިންޓަވިއުއެއްގައި އިއްޔެ ވިދާޅުވީ، ސުޕްރީމް ކޯޓުން މިދިޔަ އަންގާރަ ދުވަހު ކުރި ހުކުމާއެކު ޖަލު ހުކުމުން ޔާމީން މިނިވަންވެ، އެ ރޭ ބޭއްވެވި ފުރަތަމަ ބައްދަލުވުންތަކުގައި އެ މަނިކުފާނު އެދިވަޑައިގެންނެވި އެއް ކަމަކީ މިނިވަންކަމުގެ ދިފާއުގައި ހިންގާ ހަރަކާތް ހަރުދަނާކޮށް، ވަރުގަދަ ކުރުމަށް ކަމަށެވެ.

ޕީޕީއެމް/ޕީއެންސީ ކޯލިޝަންގެ އިސްވެރިންނާއި ރައްޔިތުންގެ މަޖިލީހުގެ މިހާރުގެ ޕީޕީއެމްގެ މެމްބަރުންނާއި ކުރީގެ މެމްބަރުން އަދި އެކި ކޮމިޓީތަކާއެކު ޕީޕީއެމްގެ އޮފީހުގައި ބޭއްވި ބައްދަލުވުންތަކުގައި "އިންޑިއާ އައުޓް" ކެމްޕެއިން ހަރުދަނާ ކުރަން ޔާމީން ވަރަށް ބޮޑަށް އިރުޝާދު ދެއްވި ކަމަށް ޝިޔާމް ވިދާޅުވި އެވެ.

"އަދި އެ މަނިކުފާނުގެ ވިސްނުުންފުޅުގައި އެކަމުގައި އަޅުގަނޑުމެންނަށް ކުރެވިދާނެ ބައެއް މުހިންމު ކަންތައް ހުރި ވާހަކަ ވެސް ވިދާޅުވި،" ނައިފަރު ދާއިރާގެ މެމްބަރު ޝިޔާމް ވިދާޅުވި އެވެ.

އޭނާ ވިދާޅުވިގޮތުގައި "ޑިފެންސް މޯލްޑިވްސް" ގެ ނަމުގައި ހަރަކާތް ފެށީ ސީދާ ޔާމީންގެ ވިސްނުންފުޅުގެ ތެރެއިންނެވެ.

"އެންމެ ބޮޑު ބިރުވެރި ކަމަކީ ރާއްޖޭގައި ބޭރުގެ ސިފައިން މި ތިބި ތިބުމުގެ ބިރުވެރިކަން،" ޝިޔާމް ވިދާޅުވި އެވެ.

އޭނާ ވިދާޅުވީ، ޕީޕީއެމަކީ އިންޑިއާއާ ދުރު ޕާޓީއެއް ނޫން ކަމަށާއި "އިންޑިއާ ފަސްޓް" ޕޮލިސީ ނުވަތަ ރާއްޖެ އިން އެ ގައުމަށް އިސްކަން ދިނުމުގެ ވާހަކަ ފެއްޓެވީ ވެސް ޔާމީން ކަމަށެވެ.

"އެއީ ހަގީގަތުގައި ރައީސް ޔާމީން ގެންނެވި ބަހެއް. އިންޑިއާ ފަސްޓް ޕޮލިސީގެ ދަށުން އިންޑިއާއާ އެކީގައި، އިންޑިއާއަކީ އަވަށްޓެރި ގައުމަކަށް ވެފައި ކުރަންޖެހޭ ކަންތައްތަކެއް ހުރޭ. އެހެން ނަމަވެސް ރައީސް ޔާމީން އިގްތިސޯދީ އެޖެންޑާއެއް ހިފައިގެން ވަޑައިގަތީމާ އިގްތިސޯދީ އެޖެންޑާ ތަންފީޒު ކުރުމަށް ހަގީގަތުގައި ފައިސާ ބޭނުންވޭ. ފައިސާ ހުރި ދިމާތައް ޓްރެޕް ކުރަން ޖެހޭ. އަދި އެ ފަރާތްތަކާއެކު މަސައްކަތް ވެސް ކުރަންޖެހޭ،" ޝިޔާމް ވިދާޅުވި އެވެ.

އޭނާ އެ ވިދާޅުވަނީ ޔާމީންގެ ފަސް އަހަރުގެ ވެރިކަމުގައި އިގްތިސޯދީ ބިޔަ މަޝްރޫއުތައް ހިންގުމަށްޓަކައި ޗައިނާ އާއި އެހެން ބައެއް ގައުމުތަކުގެ މާލީ އެހީތެރިކަމާއި ލޯނު ހޯދި ހޯދުމަށް އިޝާރާތް ކޮށެވެ.

"އެއްވެސް ހާލެއްގައި އެ ޕްރޮޖެކްޓްތައް ގެނައުމަށްޓަކައި ކުރެއްވި މަސައްކަތްތަކަކީ އިންޑިއާއާ [އޮތް] ގުޅުން ދުރުވާން ކުރެއްވި ކަންތައްތަކެއް ކަމަކަށް އަޅުގަނޑު ނުދެކެން،" އޭނާ ވިދާޅުވި އެވެ.

ރާއްޖޭގައި އިންޑިއާގެ ސިފައިން ތިބުމާ ދެކޮޅަށް "ޑިފެންޑް މޯލްޑިވްސް" ގެ ހަރަކާތްތައް ދޭތެރެދޭތެއިން މާލެ އާއި ރަށްރަށުގައި އަންނަނީ މެދުކެނޑުމެއް ނެތި ހިންގަމުންނެވެ. އަދި އިންޑިއާގެ ސިފައިން ފައިބައިގެ ދިއުމަށް ގޮވައިލާ ޕެޓިޝަނެއްގައި ވެސް ސޮއިކުރުން ކުރިއަށް ގެންދެ އެވެ.