ކުނބުރުދޫގެ ފެނާއި ނަރުދަމާގެ މަސައްކަތް ފަށައިފި

އދ. ކުނބުރުދޫގެ ފެނާއި ނަރުދަމާ މަޝްރޫއުގެ އަމަލީ މަސައްކަތް އެމްޑަބްލިއުއެސްސީން މިއަދު ފަށައިފި އެވެ.

އެ ރަށުގައި ބޭއްވި ރަސްމިއްޔާތެއްގައި މި މަޝްރޫއުގެ މަސައްކަތް ފައްޓަވައިދެއްވީ އެމްޑަބްލިއުއެސްސީގެ ސީއީއޯ ހަސަން ޝާހެވެ. މި ރަސްމިއްޔާތުގައި އެ ކުންފުނީގެ އިސް ބޭފުޅުންނާއި މަތިވެރި ދާއިރާގެ މެމްބަރު ހަސަން ޒަރީރާއި ކުނބުރުދޫ ކައުންސިލްގެ ރައީސް މުހައްމަދު އަޒުމީ ވެސް ބައިވެރިވެވަޑައިގެންނެވި އެވެ.

މި މަޝްރޫއުގެ މަސައްކަތް ފެށުމަށް ބޭނުންވާ ސާމާނު ކުނބުރުދޫއަށް ގެންގޮސްފައިވާއިރު ފެނުގެ ނިޒާމުގެ މަސައްކަތަށް ބޭނުންވާ ހޮޅި ވަޅުލުމުގެ މަސައްކަތް މިހާރު ދަނީ ކުރަމުންނެވެ. މިއީ 45.12 މިލިއަން ރުފިޔާގެ މަޝްރޫއެކެވެ.

އެ ރަށުގެ ފެނުގެ ނިޒާމު ގާއިމު ކުރުމުގެ މަސައްކަތުގެ ދަށުން 2.75 ކިލޯ މީޓަރުގެ ދިގު ފެން ހޮޅީގެ މައި ނެޓްވޯކެއް އަޅައި އާރުއޯ ފެސިލިޓީއެއް އިމާރާތް ކުރާނެ އެވެ. އަދި ފެން އުފެއްދުމަށް ދެ އާރުއޯ ޕްލާންޓު ބަހައްޓައި ފެން ރައްކާ ކުރުމަށް ތިން ތާންގީ ވެސް ބަހައްޓާނެ އެވެ.

މި މަސައްކަތުގެ ދަށުން ފެނުގެ ކަނެކްޝަން ގެތަކަށް ގުޅައިދީ ފެން މީޓަރު ވެސް ބަހައްޓާނީ އެމްޑަބްލިއުއެސްސީންނެވެ.

ކުނބުރުދޫ ނަރުދަމާ ނިޒާމު ގާއިމް ކުރުމުގެ މަސައްކަތުގެ ދަށުން 2.30 ކިލޯމީޓަރުގެ ނަރުދަމާ މައި ނެޓްވޯކެއް އަޅައި 374 މީޓަރުގެ ޕަންޕިން ލައިނެއް އަޅާނެ އެވެ. އަދި ދެ ޕަމްޕިން ސްޓޭޝަނާއި ސީއައުޓްފްލޯއެއް ގާއިމްކޮށް ގެތަކުގައި ޖަންގްޝަން ބަހައްޓައި، އިދާރީ ބިލްޑިންއެއްގެ މަސައްކަތް ވެސް ކުރާނެ އެވެ.

މީގެ އިތުރުން އެ ރަށުގެ ފެނާއި ނަރުދަމާ ނިޒާމު ހިންގާ ބެލެހެއްޓުމަށް ބޭނުންވާ ޖަނަރޭޓަރު ސެޓާއި ވެހިކަލް އަދި ފެން ތަހުލީލު ކުރަން ބޭނުންވާ ސާމާނު ވެސް އެމްޑަބްލިއުއެސްސީން ފޯރުކޮށްދޭނެ އެވެ.