ހަތަރުވަނަ ކުއާޓާގައި ބީއެމްއެލްގެ އެހީ ފަސް ރަށަކަށް

ބީއެމްއެލްގެ ކޮމިއުނިޓީ ފަންޑުގެ ދަށުން މިއަހަރުގެ ހަތަރުވަނަ ކުއާޓާގައި އެހީވާނެ ޕްރޮޖެކްޓުތައް އިއުލާންކޮށްފި އެވެ.

އެ ބޭންކުން ނެރުނު ބަޔާނެއްގައި ބުނީ ކޮމިއުނިޓީ ފަންޑުން މި ކުއާޓާގައި ހުށަހެޅި ޕްރޮޕޯސަލްތަކުގެ ތެރެއިން ފަސް ރަށެއްގައި ހިންގާ ޕްރޮޖެކްޓުތަކަށް އެހީވާނެ ކަމަށެވެ. މިއީ މި ކުއާޓާގައި ހުށަހެޅި ޕްރޮޕޯސަލްތަކުގެ ތެރެއިން އެންމެ ފާހަގަކުރެވޭ ފަސް ޕްރޮޕޯސަލް ކަމަށެވެ.

ކޮމިއުނިޓީ ފަންޑުން އެހީވާނެ ޕްރޮޖެކްޓުތަކާއި ޕްރޮޕޯސަލް ކާމިޔާބުކުރި ފަރާތްތައް

- ނ. ހެނބަދޫގައި ބާބަކިޔު ސަރަހައްދެއް ހެދުން- ހާމިދު ރަޝީދު

- ކ. މާފުށީގައި އައުޓްޑޯ ލައިބްރަރީއެއް ހެދުން- ނައު ސްޓާ ސްޕޯޓްސް ކްލަބް

- ފ. ފީއަލީގައި އައުޓްޑޯ ލައިބްރަރީއެއް ހެދުން- ފަތުހުﷲ ޝާތިރު

- ތ. ބުރުނީގެ ރާގޮނޑި ބީޗް ތަރައްގި ކުރުން- ބުރުނީ ޔޫތު ސްޕޯޓްސް ކްލަބް

- ގދ. ތިނަދޫގައި އިސްރަށްވެހިންނަށް ހާއްސަ ޕާކެއް ހެދުން- އަމީޒާ އަފީފު

ބީއެމްއެލްގެ ޕަބްލިކް ރިލޭޝަންސް މެނޭޖަރު މުހައްމަދު ސައީދު ވިދާޅުވީ ބޭންކުގެ އަމާޒަކީ ކޮމިއުނިޓީ ފަންޑުގެ ދަށުން މުޖުތަމައަށް ފައިދާ ހުރި ޕްރޮޖެކްޓުތައް ހިންގަން އެހީވުން ކަމަށެވެ. އަދި އެހެން ފަހަރުތަކާ އެއްގޮތަށް މި ކުއާޓާގައި ވެސް ގިނަ އަދަދެއްގެ ރަނގަޅު ޕްރޮޕޯސަލްތަކެއް ލިބުނު ކަމަށް އޭނާ ވިދާޅުވި އެވެ.

"މިފަހަރުވެސް ރަނގަޅު ޕްރޮޕޯސަލްތަކެއް ކޮމިއުނިޓީ ފަންޑަށް ލިބުނު ކަން އުފަލާއެކު ފާހަގަކުރަން. މިއިން ދައްކުވައިދެނީ އަމިއްލަ ފަރުދުންނާއި ޖަމިއްޔާތަކުން ރަށުގެ ތަރައްގީއާއި މުޖުތަމައުގެ ކުރިއެރުމަށް މަސައްކަތްކުރަން ބޭނުންވާ މިންވަރު،" ސައީދު ވިދާޅުވި އެވެ.

ބީއެމްއެލް ކޮމިއުނިޓީ ފަންޑަށް ހުށަހަޅާ ޕްރޮޕޯސަލްތަކަކީ އާއްމު ފަރުދުންނާއި ޖަމިއްޔާތަކުން މުޖުތަމައަށް ނުވަތަ ތިމާވެއްޓަށް ފައިދާ ހުރި ޕްރޮޖެކްޓުތައް ހިންގުމަށް ހުށަހަޅާ ޕްރޮޕޯސަލްތަކެކެވެ. މި ފަންޑުގެ ދަށުން މިހާތަނަށް 60 ޕްރޮޖެކްޓަކަށް ބޭންކުން ވަނީ އެހީތެރިކަން ފޯރުކޮށްދީފަ އެވެ.