ސަލްމާން ރަސްގެފާނުގެ މެސެޖެއް އީރާނާއި ހިޒްބުﷲ އަށް

ސައޫދީ އަރަބިއްޔާގެ ރަސްގެފާނު ސަލްމާން ބިން އަބްދުލް އަޒީޒް، އީރާނަށާއި އީރާންގެ މަދަދާ އެކު ހިންގާ ހަނގުރާމަވެރި އަދި ސިޔާސީ ޖަމާއަތެއް ކަމަށްވާ ލެބަނާންގެ ހިޒްބުﷲ އަށް ހާއްސަ މެސެޖެއް ދެއްވައިފި އެވެ.

ސައޫދީ އަރަބިއްޔާގެ ޝޫރާ މަޖިލިސް (ގާނޫނު ހަދާ މަޖިލިސް) އާ ދައުރަކަށް އިއްޔެ އިފްތިތާހް ކޮށްދެއްވަމުން، ރަސްގެފާނު ސަލްމާން ވިދާޅުވީ ސަރަހައްދީ ކަންކަމުގައި އީރާނުން ގެންގުޅޭ ސަލްބީ ސިޔާސަތުތަކާއި ސުލޫކު މުޅިން ބަދަލުކުރަންޖެހޭ ކަމަށެވެ. އޭގެ ބަދަލުގައި ދޭދޭ ގައުމުތަކާ އެކުގައި ވާހަކަ ދައްކައި މަޝްވަރާކޮށްގެން، ސަރަހައްދީ މައްސަލަތައް ހައްލުކުރަން އީރާނުން މަސައްކަތް ކުރުމަށް ވެސް، ސަލްމާން ރަސްގެފާނު ގޮވައިލެއްވި އެވެ.

ސަލްމާން ރަސްގެފާނު މިމޭރުމުން އީރާނަށް މެސެޖެއް ދެއްވި އިރު، ދެ ގައުމުގެ ދެމެދުގައި އުފެދިފައިވާ ނުތަވަސްކަން ފިލުވައިލުމަށް އިރާގު މެދުވެރިވެގެން ބާއްވަމުން އަންނަ މަޝްވަރާ ބައްދަލުވުންތަކުގެ އާ ބައްދަލުވުމަކަށް ތައްޔާރަށް އޮތް ކަމަށް، މިދިޔަ ހަފުތާގައި އީރާނުން ވަނީ ބުނެފަ އެވެ. އީރާންގެ ހާރިޖީ ވަޒީރު މިދިޔަ ހަފުތާގައި ވިދާޅުވި ގޮތުގައި، އިރާގުން އިސްނަގައިގެން ފަށާފައިވާ މަޝްވަރާތަކުގައި ބައިވެރިވުމަށް އީރާނުން އެއްވެސް އިރެއްގައި ދެކޮޅެއް ނުހަދަ އެވެ.

ސައޫދީގެ ޝޫރާ މަޖިލީހުގެ ބައްދަލުވުމުގައި، ވީޑިއޯ ކޮންފަރެންސް މެދުވެރިކޮށް ބައިވެރިވެވަޑައިގެން ދެއްވި ތަގުރީރުގައި، އީރާންގެ ނިއުކްލިއާ މަޝްރޫއާ ބެހޭ ގޮތުން ވެސް ސަލްމާން ރަސްގެފާނު ވާހަކަފުޅު ދެއްކެވި އެވެ. ރަސްގެފާނު ވިދާޅުވި ގޮތުގައި އީރާންގެ ނިއުކްލިއާ މަޝްރޫއާއި ބެލެސްޓިކް މިސައިލް ތަރައްގީ ކުރުމުގެ މައްސަލައިގައި ބައިނަލްއަގުވާމީ މުޖްތަމައާ އެކުގައި އީރާނުން އެކަށީގެންވާ ގޮތެއްގައި އެއްބާރުލުން ނުދިނުމަކީ، ސައޫދީ އަރަބިއްޔާ ވަރަށް ބޮޑަށް ކަންބޮޑުވާ ކަމެކެވެ.

މީގެ އިތުރުން ލެބަނަންގެ ސިޔާސީ މަސްރަހަށް، ހިޒްބުﷲ ޖަމާއަތުން ނުފޫޒު ފޯރުވަމުންދާ މައްސަލައިގައި ވެސް ސަލްމާން ރަސްގެފާނު ކަންބޮޑުވުން ފާޅުކުރެއްވި އެވެ. މިހާރު ވެސް އިގްތިސާދީ ގޮތުން ފުން ވަޅުގަނޑެއްގެ ތެރޭގައި އޮތް ލެބަނާންގެ ސިޔާސީ ގުނަންތަކަށް ނުފޫޒު ފޯރުވައިގެން އެ ގައުމުގެ ސިޔާސީ މަސްރަހުގެ ގަޑުބަޑުކުރުން ހުއްޓައިލުމަށް، ސަލްމާން ރަސްގެފާނު ހިޒްބުﷲ އަށް ގޮވައިލެއްވި އެވެ.

ސައޫދީ އަރަބިއްޔާ އާއި އީރާނާ ދެމެދުގައި އޮތް ޑިޕްލޮމެޓިކް ގުޅުން ކަނޑައިލިކަން ސައޫދީން އިއުލާން ކުރީ 2016 ވަނަ އަހަރުގެ ކުރީކޮޅުގެ ތެރޭގަ އެވެ. ސައޫދީން އެ ގުޅުން ކަނޑައިލީ، ސައޫދީގެ ޝީއީ ލީޑަރެއްގެ ގޮތުގައި ބެލެވުނު ނަމްރު ބާގިރުއް ނަމްރުގެ މައްޗަށް، ޖެނުއަރީ 2، 2016ގައި މަރުގެ ހުކުމް ތަންފީޒު ކުރި މައްސަލައިގައި އީރާން ސަރުކާރުން ސައޫދީގެ ރަސްގެފާނަށާއި ސަރުކާރަށް ފާޑު ކިޔުމުގެ އިތުރުން، ތެހެރާންގައި ހުރި ސައޫދީ އެމްބަސީ އަށް އީރާންގެ އާންމުންގެ ބަޔަކު ހަމަލާ ދިނުމާ ގުޅިގެންނެވެ.