އީރާނަށް ނިއުކްލިއާ ހަތިޔާރު ލިބިއްޖިއްޔާ ވާނެ ގޮތެއް ވެސް ނޭނގޭ: ސައޫދީ

އީރާނަށް ނިއުކްލިއާ ހަތިޔާރުގެ ގާބިލުކަން ލިބިއްޖެ ނަމަ، އެއަށް ފަހުގައި ކަންތައް ވެގެންދާނެ ގޮތް ޚިޔާލަށް ވެސް ގެންނަން ނޭނގޭނެ ކަމަށް، ސައޫދީ އަރަބިއްޔާ އިން ބުނެފި އެވެ.

އަބޫ ދާބީގައި އިއްޔެ ނިމުނު މި އަހަރުގެ ވޯލްޑް ޕޮލިސީ ކޮންފަރެންސްގައި އިއްޔެ ދެއްވި އިންޓަވިއުއެއްގައި ސައޫދީ ޚާރިޖީ ވަޒީރު އަމީރް ފައިސަލް ބިން ފަރްހާން ވިދާޅުވީ އީރާނާ އެކުގައި ނިއުކްލިއާ މުއާހަދާއެއް ގާއިމުނުކުރެވިއްޖެ ނަމަ، މުޅި ސަރަހައްދަށް ގެއްލުން ލިބޭނެ ކަމަށެވެ. އޭނާ ވިދާޅުވި ގޮތުގައި އީރާނުން ނިއުކްލިއާ ހަތިޔާރުގެ ގާބިލުކަން ހޯދަން މަސައްކަތް ކުރާނަމަ، ގަލްފުގެ އަރަބި ގައުމުތަކުން ވެސް، އެ ގައުމުތަކުގެ ދިފާއު ވަރުގަދަކުރަން މަސައްކަތް ކުރާނެ ކަމަށެވެ.

"ބަޔަކާ ދެކޮޅަށް ހަމަލާ ދެވޭ ވަރުގެ ނިއުކްލިއާ ހަތިޔާރު އީރާނަށް ލިބިއްޖެ ނަމަ، އެ ހިސާބުން ދެން ހުރިހާ ކަމެއް އެ ނިމުނީ. މުޅި ސަރަހައްދަށް ބަލާއިރު ވެސް އަހަރެމެން މިތިބީ ވަރަށް ނުރައްކާތެރި ތަނެއްގައި،" ސައޫދީ ޚާރިޖީ ވަޒީރު އަމީރް ފައިސަލް ބިން ފަރްހާން ވިދާޅުވި އެވެ.

"އެ ހާލަތަށް ހިނގައްޖެއްޔާ، މި ސަރަހައްދުގެ ހުރިހާ ގައުމުތަކެއް ވެސް އެ ގައުމުތަކުގެ ސަލާމަތާއި ރައްކާތެރިކަން ކަށަވަރުކުރެވޭނެ ގޮތެއް ހޯދަން މަސައްކަތްކުރާ ތަން ބަލަން ތިބޭ."

އީރާނުގެ ނިއުކްލިއާ މަޝްރޫއާ ބެހޭ ގޮތުން ސައޫދީގެ ޚާރިޖީ ވަޒީރު މި މޭރުމުން ވާހަކަ ދެއްކެވި އިރު، އީރާނާ އެކުގައި ނިއުކްލިއާ މުއާހަދާއެއް ގާއިމުކުރުމަށް، އެމެރިކާ އާއި ވިލާތުގެ ގައުމުތަކުން ކުރަމުން އައި މަޝްވަރާތައް ވަނީ ކޮޅެއްގައި ނުޖެހި މެދުކެނޑިފަ އެވެ. ވިލާތުގެ ގައުމުތަކުން ތުހުމަތުކުރާ ގޮތުގައި މުއާހަދާގައި ސޮއިކުރުމަށް އީރާނުން ހުށަހަޅަމުން ދަނީ ގަބޫލުކުރެވޭ ފަދަ ޝަރުތުތަކެއް ނޫނެވެ.

ސައޫދީ ޚާރިޖީ ވަޒީރު ވިދާޅުވި ގޮތުގައި ވިލާތުގެ ގައުމުތަކުން އީރާނާ އެކުގައި ގާއިމުކުރާ މުއާހަދާ ވާންޖެހޭނީ، އީރާންގެ ނިއުކްލިއާ މަޝްރޫއާ ބެހޭ ގޮތުން ކުރެވޭ މުއާމަލާތްތަކުގެ ފެށުމަށެވެ. އެއީ ނިމުމަކަށް ވާ ގޮތަށް ގާއިމުކުރާ މުއާހަދާއަކުން ކުރިމަގަށް މަންފާ ނުކުރާނެ ކަމަށް އޭނާ ވިދާޅުވި އެވެ.

އީރާނާ އެކުގައި ނިއުކްލިއާ މުއާހަދާއެއް ގާއިމުކުރުމަށް ވިލާތުގެ ގައުމުތަކުން މަސައްކަތް ކުރަމުން އައި ދުވަސްވަރު ގަލްފުގެ ގައުމުތަކުން ބާރު އަޅަމުން ދިޔައީ، އީރާންގެ މިސައިލް ޕްރޮގްރާމާއި ޑްރޯން ޕްރޮގްރާމް ވެސް ކޮންޓްރޯލް ކުރެވޭ ފަދަ މުއާހަދާއެއް ގާއިމުކުރުމަށެވެ.

"މިހާރު ފެންނަމުންދާ އަލާމާތްތަކަކީ މާ އީޖާބީ އަލާމާތްތަކެއް ނޫން. އީރާންގެ ފަރާތުން އަހަރެމެންނަށް އަޑު އިވެމުން ދަނީ، ނިއުކްލިއާ ހަތިޔާރުގެ ޕްރޮގްރާމަކަށް އެމީހުންގެ ޝައުގުވެރިކަމެއް ނެތޭ ބުނާ އަޑު. އެ ވާހަކަ ގަބޫލުކުރެވޭ ގޮތް ވުމަކީ ވަރަށް ހިތްހަމަޖެހޭނެ ކަމެއް. އެކަމަކު އެކަން ގަބޫލުކުރެވޭ ފެންވަރުގެ ޔަގީންކަމެއް އަހަރެމެން ބޭނުންވޭ،" ސައޫދީގެ ޚާރިޖީ ވަޒީރު ވިދާޅުވި އެވެ.