ގިނަ ރަށްރަށުގައި ވައުދުތަކުގެ ބޮޑު ޕަސެންޓެއް ފުރިހަމަ ކުރެވިއްޖެ: ރައީސް

މި ސަރުކާރުން ރަށްރަށަށް ވެފައިވާ ވައުދުތަކުގެ ބޮޑު ޕަސެންޓެއް މިހާރު ފުރިހަމަ ވެފައިވާ ކަމަށް ރައީސް އިބްރާހިމް މުހައްމަދު ސޯލިހު މިއަދު ވިދާޅުވެއްޖެ އެވެ.

ނ. އަތޮޅުގެ ފަސް ރަށަކަށް އެ މަނިކުފާނު މިއަދު ފެއްޓެވި ދަތުރުފުޅުގައި، ހެނދުނު އެންމެ ފުރަތަމަ ވަޑައިގަތީ މާފަރަށެވެ. ރައީސް ވަނީ އެ ރަށުގެ ކައުންސިލާއި އަންހެނުންގެ ތަރައްގީ އަށް މަސައްކަތް ކުރާ ކޮމިޓީގެ މެމްބަރުންނާއި ބައްދަލުކުރައްވައި، އެ ބޭފުޅުންގެ ހުރި ކަންބޮޑުވުތައް އަޑުއައްސަވައިފަ އެވެ.

ރައީސް އޮފީހުން ބުނީ އެ ބައްދަލުވުމަށް ފަހު، މާފަރުގެ ރައްޔިތުންނާ ބައްދަލުކުރައްވައި ރައީސް ދެއްކެވި ވާހަކަފުޅުގައި، މި ސަރުކާރުގެ އެންމެ ފުރަތަމަ ދުވަހުން ފެށިގެން ވެސް ވައުދުތައް ފުއްދުމަށް މަސައްކަތް ކުރަމުން އަންނަ ކަމަށާއި ގިނަ ރަށްރަށަށް ވެފައިވާ ވައުދުތަކުގެ 85-99 ޕަސެންޓުގެ ފުރިހަމަ ކުރެއްވިއްޖެ ކަމަށް ވިދާޅުވި ކަމަށެވެ.

މާފަރު އެއާޕޯޓް ބޮޑުކުރުމުގެ މަސައްކަތް މި އަހަރު ފަށަނީ

މާފަރު ސްކޫލުގެ ގޯތިތެރޭގައި ރައްޔިތުންނާއެކު ބޭއްވި ބައްދަލުވުމުގައި، މާފަރު އިންޓަނޭޝަނަލް އެއާޕޯޓް ބޮޑުކުރުމުގެ މަސައްކަތް މި އަހަރު ފަށާނެ ކަން ރައީސް އިއުލާނު ކުރެއްވި އެވެ.

އެ އެއާޕޯޓުގައި އަދިވެސް ފުރިހަމަ ކުރަންޖެހޭ ވަރަށް ގިނަ ކަންކަން އެބަހުރިކަން ފާހަގަކުރައްވައި އެ މަނިކުފާނު ވިދާޅުވީ، ޖާގަ އިތުރުކުރުމާއި ރަންވޭ ބޮޑުކުރުމާއި ޓާމިނަލް ބޮޑުކުރުމާއި އެއާޕޯޓުން ފްލައިޓަށް ތެޔޮ އެޅޭނެ އިންތިޒާމު ހަމަޖެއްސުމާއި އެއާޕޯޓް ހޮޓެލް އެޅުން ފަދަ ކަންކަމަކީ އެއާޕޯޓް ބޮޑުކުރުމުގެ މަޝްރޫއުގެ ތެރެއިން ކުރާނެ ކަންކަން ކަމަށެވެ.

މި ބައްދަލުވުމުގައި ރައީސް ފާހަގަކުރެއްވި އިތުރު ކަންކަމުގެ ތެރޭގައި މާފަރު ސިއްހީ މަރުކަޒު ބޮޑުކޮށް، އެ ތަން ހޮސްޕިޓަލަކަށް ބަދަލުކުރުން ވެސް ހިމެނެ އެވެ.

ނ. އަތޮޅަށް ކުރައްވާ ދަތުރުފުޅުގައި ރައީސް ދެން ވަޑައިގަތީ ލަންދު އަށެވެ. އެ ރަށުގެ ބަނދަރު ރަސްމީކޮށް މިއަދު ރައީސް ހުޅުއްވައިދެއްވާނެ އެވެ.

ރައީސްގެ މި ދެ ދުވަހުގެ ދަތުރުފުޅުގައި މާފަރާއި ލަންދޫ އާއި މަނަދޫ އާއި މަގޫދޫ އަދި ހޮޅުދު އަށް ވަޑައިގަންނަވާނެ އެވެ.