ރައީސް އުތުރުގެ ހަތަރު އަތޮޅަށް ފުރާވަޑައިގެންފި

ރައީސް ޑރ. މުހައްމަދު މުއިއްޒު އުތުރުގެ ހަތަރު އަތޮޅަށް ކުރައްވާ ރަސްމީ ދަތުރުފުޅެއްގައި މިއަދު ފުރާވަޑައިގެންފި އެވެ.

މިއަދުން ފެށިގެން އަންނަ ބުރާސްފަތި ދުވަހުގެ ނިޔަލަށް ކުރައްވާ މި ދަތުރުފުޅުގައި އެ މަނިކުފާނު ވަޑައިގަންނަވާނީ ހއ، ހދ، ށ އަދި ނ އަތޮޅުގެ ބައެއް ރަށްތަކަށެވެ. މިއަދު ފުރަތަމަ ވަޑައިގަންނަވާނީ ހއ. ހޯރަފުއްޓަށެވެ.

ހޯރަފުށީގެ އިތުރުން ހއ. އަތޮޅުން ދެން އެ މަނިކުފާނު ވަޑައިގަންނަވަނީ ތުރާކުނު، އިހަވަންދޫ، ދިއްދޫ، ވަށަފަރު، ކެލާ އަދި ބާރަށަށެވެ.

ހދ. އަތޮޅުން ވަޑައިގަންނަވަނީ ހަނިމާދޫ، ނޮޅިވަރަންފަރު، ނެއްލައިދޫ އަދި މަކުނުދޫ އަދި ކުޅުދުއްފުއްޓަށެވެ. ށ. އަތޮޅުން ވަޑައިގަންނަވަނީ ކަނޑިތީމު، މިލަންދޫ، ކޮމަންޑޫ އަދި ފުނަދުއަށެވެ. އަދި ނ. އަތޮޅުން ކެނދިކުޅުދޫ، މިލަދޫ، ހޮޅުދޫ އަދި މަނަދު އަށް ވެސް ވަޑައިގަންނަވާނެ އެވެ.

ރައީސްގެ މި ދަތުފުޅުގައި އެކި ރަށްރަށުގެ ކައުންސިލްތަކުގެ އިތުރުން އެ ރަށްރަށުގެ ރައްޔިތުންނާ ބައްދަލުކުރައްވާނެ ކަމަށް ރައީސް އޮފީހުން ބުންޏެވެ.

ރައީސް އުތުރުގެ ހަތަރު އަތޮޅަށް މިއަދު ދަތުރުފުޅެއް ފެއްޓެވިއިރު، މިދިޔަ ހަފުތާގައި އައްޑު އާއި ފުވަމުއްލަކާއި ގއ. އަދި ގދ. އަތޮޅަށް ވަޑައިގެންނެވި އެވެ. އަދި އޭގެ ކުރިން ތ. އަތޮޅަށް ވެސް ވަޑައިގެންނެވި އެވެ.

އެމަނިކުފާނު ދެކުނުގެ އަތޮޅުތަކަށް ކުރެއްވި ދަތުރުފުޅުގައި ވަނީ ބޮޑެތި މަޝްރޫއުތަކެއް ވެސް ފައްޓަވައިދެއްވައިފަ އެވެ.