ދެ ކޮމަންޑޫ ގުޅާލުމުގެ މަޝްރޫއުގެ އީއައިއޭގައި މައްސަލަ އެބަހުރި: ޑްރެޖިން އެސޯސިއޭޝަން

ކޮމަންޑު އާއި އެ ރަށް ކައިރީގައި އޮންނަ މަތި ކޮމަންޑޫ ގުޅައިލުމުގެ މަޝްރޫއުގެ އެންވަޔަރްމަންޓަލް އިމްޕެކްޓް އެސެސްމަންޓް (އީއައިއޭ) ގައި މައްސަލަ އެބަހުރި ކަމަށާއި އެ އީއައިއޭ އަށް އެންވަޔަރްމަންޓަލް ޕްރޮޓެކްޝަން އެޖެންސީ (އީޕީއޭ) އިން ހުއްދަ ދިނީ އާއްމުކޮށް އެފަދަ ރިފޯޓުތަކަށް ހުއްދަ ދޭން ގެންގުޅޭ އުސޫލާ ހިލާފަށް ކަމަށް ޑްރެޖިން އެސޯސިއޭޝަން އޮފް މޯލްޑިވްސް އިން މިއަދު ބުނެފި އެވެ.

އެ ޖަމިއްޔާ އިން ނެރުނު ބަޔާނެއްގައި ބުނީ، މަތިކޮމަންޑޫގެ މަޝްރޫއަށް އެންމެ ފުރަތަމަ ހުއްދަ ދިން އީއައިއޭގައި އެކަށީގެންވާ ވަރަށް ޕްރޮޖެކްޓް ޖަސްޓިފިކޭޝަނާއި ފީލްޑް ސާވޭ ހަދާފައި ނެތް ކަމަށެވެ. އަދި އެ ރަށުގެ ވޭވް ޑައިނަމިކްސް ސާވޭ ހަދާފައިނުވާއިރު، އޭގެ ސަބަބުން ހިއްކާ ބިމާއި ކޮމަންޑޫގެ ގޮނޑުދޮށަށް ބޮޑެތި ބަދަލުތައް އައުން އެކަށީގެންވާ ކަމަށް ބަޔާނުގައި ބުންޏެވެ.

ދެ ކޮމަންޑޫ ގުޅައިލުމުގެ މަޝްރޫއުގެ ދަށުން 16.7 ހެކްޓަރުގެ ބިން ހިއްކަން ނިންމާފައިވާއިރު، އެމްޓީސީސީއާ ހަވާލުކޮށްގެން ގެންދާ 249 މިލިއަން ރުފިޔާގެ އެ މަޝްރޫއު މިދިޔަ އާދިއްތަ ދުވަހުގެ ރޭ ވަނީ ފަށައިފަ އެވެ.

ޑްރެޖިން އެސޯސިއޭޝަން އޮފް މޯލްޑިވްސް ބަޔާނުގައި ބުނީ މަތިކޮމަންޑޫ މަޝްރޫއަށް ވެލި ނަގަނީ ރ. އުނގޫފާރު ބިން ހިއްކުމަށް މިދިޔަ އަހަރުގެ އޭޕްރީލާއި މެއި މަހު ސާވޭ ކުރި ސަރަހައްދުން ކަމަށާއި އެ ކަމަށް ހުއްދަ ދިން އެޑެންޑަމް ރިޕޯޓަކީ ވެސް އީޕީއޭއިން އާއްމުކޮށް އެފަދަ ރިޕޯޓުތަކަށް ހުއްދަ ދިނުމަށް ގެންގުޅޭ ސްޓެންޑާޑަށް ނުފެތޭ ރިޕޯޓެއް ކަމަށެވެ.

"މިފަދަ އެޑެންޑަމް ރިޕޯޓަކީ އިތުރު ފީލްޑް ސާވޭއެއް ނުކޮށް ހުއްދަ ދެވިގެންވާނެ އެއްޗެއް ނޫނެވެ. އޭގެ އިތުރުން ޓާމްސް އޮފް ރިފަރެންސްގައި ބުނެފައިވާ ފަދައިން އެ ރިޕޯޓުގައި ސްޓޭކްހޯލްޑް ކޮންސަލްޓޭޝަން ނެތްކަން ފާހަގަކުރަމެވެ،" ބަޔާނުގައި ވެ އެވެ.

ޕްރޮޖެކްޓަކުން ތިމާވެއްޓަށް ކުރާނެ އަސަރު ދެނެގަތުމަށް ހަދާ އީއައިއޭ ރިޕޯޓްތަކަށް ހުއްދަ ދެވޭނީ ނުވަތަ ހުއްދަ ނުދީ ހިފެހެއްޓޭނީ ތިމާވެއްޓަށް އަސަރު ފޯރާނެ ވަރު ބަޔާންކުރާ ރިޕޯޓް ހެދުމާ ބެހޭ ގަވާއިދާއި އެ ގަވާއިދަށް ގެނެސްފައިވާ އިސްލާހުތަކާ އެއްގޮތްވާ ގޮތަށެވެ.

އެ ގަވާއިދުގައި ބުނާ ޝަރުތުތައް ހަމަ ނުވާ އީއައިއޭ ރިޕޯޓްތަކަށް ހުއްދަ ދިނުމުގެ ބާރު އީޕީއޭ އަށް ލިބިގެން ނުވެ އެވެ.

ނަމަވެސް ޑްރެޖިން އެސޯސިއޭޝަނުން ބުނިގޮތުގައި، މަތިކޮމަންޑޫ ހިއްކަން ހުއްދަ ދިން ފުރަތަމަ އީއައިއޭގެ އިތުރުން އެޑެންޑަމް ރިޕޯޓުގައި ވެސް ޓާމްސް އޮފް ރިފަރެންސްގައި ބުނާ ޝަރުތުތައް ހަމަ ނުވާކަން ވަރަށް ސާފުކޮށް އެނގެން އޮވެ އެވެ. އެހެންކަމުން އެ ރިޕޯޓްތަކަށް އީޕީއޭ އިން ހުއްދަ ދިނީ ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމާއި ބެހޭ ގަވައިދާއި ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ގާނޫނާ ހިލާފަށް ކަމަށް ޑްރެޖިން އެސޯސިއޭޝަނުން ބުނެ އެވެ.

ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމާ ބެހޭ ގަވާއިދުގެ ތިން ވަނަ މާއްދާ އާއި ހަތަރު ވަނަ މާއްދާ އަދި އެ ގަވާއިދަށް ގެނައި ފަސް ވަނަ އިސްލާހުގެ ދަށުން، އީއައިއޭ ޓާމްސް އޮފް ރިފަރެންސަށް ނުފެތޭ އީއައިއޭ ރިޕޯޓްތަކަށް ބޭނުންވާ އިތުރު މައުލޫމާތު ފޯރުކޮށް އެ ރިޕޯޓެއް ފުރިހަމަ ކުރަން ރިޕޯޓް ހުށަހަޅާ ފަރާތަށް އެންގުމުގެ ބާރު ނުވަތަ ރިޕޯޓް ބަލައި ނުގަތުމުގެ ބާރު އެ އެޖެންސީއަށް އަށް ލިބިދެ އެވެ.

"އެކަމަކު އެއްވެސް ހާލަތެއްގައި، ހާއްސަ ހުއްދައެއްގެ ދަށުން ވެސް ޓާމްސް އޮފް ރިފަރެންސަށް ނުފެތޭ އީއައިއޭ ރިޕޯޓަކަށް ހުއްދަ ދިނުމުގެ ބާރު އީޕީއޭ އަށް ލިބިގެން ނުވެ އެވެ. އަދި އެއީ ސީދާ ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމާއި ބެހޭ ގަވާއިދާއި ހިލާފު ކަމެކެވެ،" ޑްރެޖިން އެސޯސިއޭޝަނުން ބުނެ އެވެ.

ދެ ކޮމަންޑޫ ގުޅައިލުމުގެ މަޝްރޫއުގެ އީއައިއޭ ހެދީ، އެ މަޝްރޫއު ރަސްމީކޮށް އިއުލާނު ކުރުމުގެ ކުރިންނެވެ. ނަމަވެސް އީއައިއޭ ހެދީ ކޮން ކުންފުންޏަކުން ކަމެއް އަދި އެ ހުށަހެޅި ސީދާ ތާރީހެއް ނައީމް ނުބުނެ އެވެ. އެ ރިޕޯޓް އަދި އީޕީއޭގެ ވެބްސައިޓުގައި ވެސް އާންމެއް ނުކުރެ އެވެ